ကျာ်ထဝ်၊ မေ ၂၀
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ်ဂှ် ဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ် နကဵုဇြဟတ်လၟိဟ် ဗွဲမဂၠိုၚ်ဂၠေၚ်ကီု သီုကဵုဗ္တိုက်ကၠုၚ်ကဵုပၞာန်ကျာ ကေုာံ လွဟ်ဇၞော်တုဲ ညးဒေသ ၁၇၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ခရိုၚ်သဓီု KNU ရ။
စနူဂိတုမေ ၁၄ တုဲကၠုၚ်တေံတုဲ ကရောၚ်ပၞာန်ကံၚ်ဇြဳပၞာန် ဇြဟတ်နွံဗ္ဒါဲ ၅၀၀ ပါလုပ်သီုကဵု ၝောံဒပ်ကံၚ်ဇြဳပၞာန် ၝောံဒပ် ၁၀၁ ဖျေံသ္ဇိုၚ်ပခုက္ကူ၊ ဒပ်ခမရ ၂၀၇ ဖျေံသ္ဇိုၚ်ဒုၚ်သယိတ်တံဂှ်ဝွံ ထ္ပက်ကရောၚ်ပၞာန် လုပ်စိုပ်ကၠုၚ် ပ္ဍဲပွိုၚ်ဍုၚ်ကျာ်ထဝ် ဂကောံကွာန်ဝေန်ကာန်၊ ခယဲ၊ ပျေန်ကတိုဝ်ကုန်၊ ဇြဳပျံၚ် ကေုာံ ကျံက်ဖျာတံရ။
ဟိုတ်နူထ္ပက်ကရောၚ်ပၞာန်လုပ်စိုပ်ကၠုၚ်ဂှ်တုဲ နူကဵုဂကောံကွာန်ဝေန်ကာန်၊ ခယဲ၊ ပျေန်ကတိုဝ်ကုန်၊ ဇြဳပျံၚ် ကေုာံ ဂကောံကွာန်ကျံက်ဖျာဂှ် ကွာန် ၃၈ ကွာန် လၟိဟ်မၞိဟ် ၁၇၆၀၂ တၠ ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
ညးဍုၚ်ကွာန်ပါဲဘဲပၞာန် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ဝွံ ပပ္တံနူကဵုဇွောံမစၞစ၊ ဂဥုဲဇဗ ကေုာံ ဒၞါဲမံၚ်တအ်ဒှ်တမ် နွံပၟိက်ဒၟံၚ်ကဵု အရီုဗၚ်ပရေၚ်မၞိဟ်ဂၠိုၚ်တိုန်ကၠုၚ်ဂှ် ပဒိုဝ်သဝ်အေနာၚ် ညးအုပ်ကာ ခရိုၚ်သဓီု ဗော်သွးကောန်ဂကူကရေၚ် KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဍုၚ်ကွာန်ပါဲဘဲပၞာန်ဂမၠိုၚ်ဝွံ အခိၚ်လၟုဟ် ဒးပါဲမံၚ်ဒၟံၚ် ပ္ဍဲကဵုဍုၚ်ကွာန်ဗၠးဘဲ ပ္ဍဲသ္ၚိမသကလောကောဒေံ၊ ပ္ဍဲကၠအ်ဂူဝါ ကေုာံ ပ္ဍဲဒဵုဂြိုပ်တံဂှ်တုဲ တ္ၚဲလအ်ကၠုၚ်ဗက် ဒးဆေၚ်မုက်ကဵု ပြဒ္ဒညာဇွောံမစၞစ ဟွံရုမ်ဂပ်တံဂှ်ရောၚ် သ္ဂးရ။
အခိၚ်လၟုဟ် ကရောၚ်ပၞာန်ကံၚ်ဇြဳပၞာန်ဝွံ ဟိုတ်နူဆက်ထ္ပက်လဝ်ပၞာန် ပ္ဍဲကွာန်ဝေန်ကာန်ကဵု ကွာန်ကျံက်ဗုမ်ကျဳတံဂှ်တုဲ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ ဒှ်ဒၟံၚ်အကာဲအရာ အခိၚ်ဟွံရုဲ ပေါဲဗ္တိုက်သ္ကာတ်မြဟ်ကၠုၚ်မာန်ရ။
အတိုၚ်တၚ်နၚ် ဂကောံသုတေသန ဂကောံလ္ၚတ်မဟာဗျူဟာ ကေုာံ ကေၚ်ကာမူဝါဒ ဍုၚ်ဗၟာ ISP-Myanmar ဂှ်မ္ဂး အပ္ဍဲကာလသီလဝ်အဝဵုဏံ ဟိုတ်နူပဋိပက္ခရပ်လွဟ် မက္တဵုဒှ်ဒၟံၚ်ဂှ်တုဲ အပ္ဍဲဍုၚ်ဗၟာဏံ လၟိဟ်ညးပါဲဘဲပၞာန် ဂၠိုၚ်တိုန်ကၠုၚ် စဵုကဵု ၆ ဒဿမ ၆ ပြကောဋိကိုဋ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− KPSN