လိုၚ်ဗၠဲ၊ မေ ၂၀
ဟိုတ်နူပေါဲဗ္တိုက်သီဗ္ဒိုပ်ပၞာန် (မော်ဖိုးကေ) ပ္ဍဲကွာန်(ကျော်ကေထ) ပွိုၚ်ဍုၚ်လိုၚ်ဗၠဲ တွဵုရးကရေၚ်ဂှ်တုဲ ညးဍုၚ်ကွာန်ဒေသ ၁၀၀ ပြၚ် နူကဵုကွာန်ပွဳဗွိုၚ်ဒၞါဲပေါဲဗ္တိုက်ဒှ်ဂမၠိုၚ်ဝွံ ဂြိပ်ပါဲကၠုၚ် အပ္ဍဲဍုၚ်သေံရောၚ် တမ်ရိုဟ်ပရိုၚ်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကုဗ္ဒိုပ်ဗျူဟာဒပ်ကံၚ်ဇြဳပၞာန် နွံဒၟံၚ် ပ္ဍဲပွဳဗွိုၚ်ကရပ်ပယျဵုသေံ တိဍာ်ဒပ်မဟာ ၇ ခရိုၚ်ဘာအၚ် KNU ဂှ် ဒပ်ပံၚ်ကောံ သၟဝ်က္ဍိုက်ပ် ဒပ်မဟာ ၇ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုက်သီဒၟံၚ်တုဲ အခါလၟုဟ် စထ္ပက်ကၠုၚ်ဒၟံၚ်ပၞာန် ကုဗ္ဒိုပ်(မော်ဖိုးကေ) မဒှ်ဗ္ဒိုပ်ဒပ်ကံၚ်ဇြဳပၞာန် သှ်ေဒၟံၚ်မွဲဂှ်ရ။
ဗ္ဒိုပ်(မော်ဖိုးကေ) ဒပ်ကံၚ်ဇြဳပၞာန် နွံဒၟံၚ်ပ္ဍဲပယျဵုသေံဂှ် စနူဂိတုမေ ၁၉ အခိၚ်ဍုၚ်သေံ ၁ နာဍဳ ၄၅ မိနေတ်ဂှ်တုဲ ဒပ်မဟာ ၇ ဒပ်ပၞာန်ဗၠးၜးကောန်ဂကူကရေၚ် KNLA ၊ ဒပ်စဵုဒၞါကောန်ဂကူကရေၚ် KNDO တံ စထောံဂြာတ်လဝ်မခတိုဟ် နကဵုဒရုၚ်ရောၚ် တမ်ရိုဟ်ပရိုၚ်ပယျဵုဂမၠိုၚ် သ္ဂးရ။
ဒပ်ပံၚ်ကောံ KNLA KNDO တံ စကာဒရုၚ်တုဲ ထောံဂြာတ်မခတိုဟ်ဗ္တိုက်လဝ်ဂှ်ရ မွဲဒမြိပ်ဗ္ဒိုပ်(မော်ဖိုးကေ) ဒပ်ကံၚ်ဇြဳပၞာန်ဂှ် ဂွံမိၚ်ကေတ်ဒၟံၚ် ဗြုရမျာၚ်ဗ္တိုဟ်ထ္ကး ထတ်တ်တုဲ ညးဍုၚ်ကွာန်ဒေသ ၁၀၀ ပြၚ်ဝွံ တတ်ကၠောံၜဳ(သောၚ်ရၚ်း) တုဲ စိုပ်ကၠုၚ်လ္ပာ်ကွာန်(မဲ့တန်) ပွိုၚ်ဍုၚ်ထသံက်ယာန်၊ လ္ပာ်ဍုၚ်သေံရ။
ဟိုတ်နူပေါဲဗ္တိုက်တုဲ ညးပါဲဘဲပၞာန်နူလ္ပာ်ဍုၚ်ဗမာ မဂြိပ်စိုပ်ကၠုၚ်တံဂှ် ဒုၚ်တၠုၚ် ရီုဗၚ် ဒုၚ်တဲ ဖျေံကဵုလဝ်ဒၞါဲတုဲ ကဵုဒၟံၚ်အရီုဗၚ်ပရေၚ်ဗ္စာရဏာမၞိဟ်တံတုဲ ပရေၚ်ဂီုကၠီုပယျဵုဂှ်လေဝ် ပတေၚ်ဂြတ်လဝ်တုဲ မၚ်ရံၚ်ဒၟံၚ် ၂၄ နာဍဳ ဟွံသ္ကုတ်ရောၚ် လ္ပာ်ဒပ်ပၞာန်သေံလေဝ် လလောၚ်ပ္တိတ်လဝ်ရ။
ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ်ကေတ်လဝ်ဒၞါဲ မွဲဒမြိပ်ပယျဵုသေံ−ဗၟာ တိဍာ်ဒပ်မဟာ ၇ ခရိုၚ်ဘာအၚ် KNU မပ္တံကဵု ဗ္ဒိုပ်မေဝ်ဠ၊ ဗ္ဒိုပ်ပူးလူးတူ၊ ဗ္ဒိုပ်ခလယ့်ဒေး၊ ဗ္ဒိုပ်တခေါဘီခီး၊ ဗ္ဒိုပ်မော်ဖားသူ ကေုာံ ဗ္ဒိုပ်ဗျူဟာတာလယ် တံဂှ် နူဂိတုမာတ်တုဲကၠုၚ်တေံ စဵုကဵုအပ္ဍဲဂိတုမေဏံ ဒပ်ပံၚ်ကောံ KNLA KNDO တံ သီဂွံလဝ်ရ။
အပ္ဍဲကဵုပရေၚ်ဗ္တိုက်သီကေတ် ဗ္ဒိုပ်ဒပ်ကံၚ်ဇြဳပၞာန် နွံမွဲဒမြိပ်ပယျဵုတံဂှ် ကောန်ဒပ်ကံၚ်ဇြဳပၞာန်ဂမၠိုၚ် ထောံလသာဗ္ဒိုပ် ဒးဂြိပ်အာလဝ် နွံဒၟံၚ်တုဲ ဒပ်ပံၚ်ကောံ KNLA KNDO တံ ဒးဗက်ပသောၚ်ဗ္တိုက်ဒၟံၚ်ဂှ်လေဝ် ဂွံတီကေတ် နူကဵုတၚ်လလောၚ်တြး KNU ဗဟဵုရ။
ပရိုၚ်−သြၚ်လောန်တိုၚ်(မ်)
ဗီုရုပ်−Aung Aung