ကအ်ကြိက်၊ မေ ၂၁
ပ္ဍဲတွဵုရးကရေၚ် ပွိုၚ်ဍုၚ်ကအ်ကြိက် ပ္ဍဲဍုၚ်ကြုၚ်ဒဵုဂှ် အ္စာဘာ CDM မွဲတၠ ပါဲဘဲပၞာန်တုဲ ကလေၚ်စဴကၠုၚ်သ္ၚိမွဲလစုတ်ဂှ် ဒးအာကဝေက်လွဟ်ဇၞော်တုဲ ဒးချိုတ်အာလဝ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ ၁၉ အခိၚ်လဒေါဝ်တ္ၚဲ ၜိုတ် ၁ နာဍဳဂှ် အ္စာဘာ CDM ကိုဝ်တိတ်ဥူဝွံ အဃောစဴကပှ်ကပေါတ်ဂှ် လွဟ်ဇၞော်မွဲမ ဒတုံဗ္တိုဟ်ထ္ကးအာလဝ် ဗ္ဒါဲသ္ၚိညးရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ အ္စာဘာ CDM ကိုဝ်တိတ်ဥူဝွံ ဒးကဝေက်လွဟ်ဇၞော် ကလိဂွံဝပ်တုဲ ဒးချိုတ်အာလဝ်ရ။
ကမ္မထာန်အ္စာဘာ ဒးအာလွဟ်ဇၞော်တုဲ လမျီုဒးအိုတ်အာဂှ် ညးမသှ်ေသၟေဟ်ဒၟံၚ်လ္တူဍုၚ်တံ သွက်ဂွံရေၚ်တၠုၚ်ကဵုဂှ် ဖန်ဇန်ကၠောန်ၜိုတ်ကဵုလဝ်ရောၚ် ဂွံတီကေတ်ရ။
အတိုၚ်ဂလာန် ညးဒေသတံဂှ်မ္ဂး လွဟ်ဇၞော်ဏံဝွံ ဒှ်လွဟ်ဇၞော် ပန်ပှော်နၚ် နူကဵုတမ်ဒပ်ကံၚ်ဇြဳပၞာန် ခမရ စၟတ် ၅၄၆ ဖျေံသ္ဇိုၚ်ကြုၚ်ဒဵုဂှ်ရောၚ် သ္ၚဳဂၠိပ်ဟီုဂးဒၟံၚ်တံ နွံဒၟံၚ်ရ။
ပ္ဍဲဂိတုဨပရဴမံက်တုဲကၠုၚ်တေံ ဟိုတ်နူပေါဲဗ္တိုက်ပွဳဗွိုၚ်ကရပ်ဍုၚ်ကြုၚ်ဒဵုကဵု ဍုၚ်ကအ်ကြိက်ဂှ်တုဲ ညးဒေသလ္တူဍုၚ်ကြုၚ်ဒဵုဂမၠိုၚ်ဝွံ ဒးပါဲဒလေတ်ဒၟံၚ် ပ္ဍဲဒၞါဲဗၠးဘဲတုဲ ၜိုတ်ရဲမၚ်သ္ၚိညိညရ သှ်ေဒၟံၚ်ဂှ် ဂွံတီကေတ်ရ။
စဵုကဵုဂိတုမေ ၂၀ ဂှ်လေဝ် ပ္ဍဲပွဳဗွိုၚ်ဍုၚ်ကြုၚ်ဒဵုဂှ် ပေါဲဗ္တိုက် ဆက်ဒှ်ဒၟံၚ်တုဲ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။
ပ္ဍဲဂိတုမေ ၉ တုဲကၠုၚ်တေံဂှ်လေဝ် ဟိုတ်နူလွဟ်ဇၞော် ဒတုံဗ္တိုဟ်ထ္ကးအာ လ္တူဘာလကျာ် ကွာန်ကြုၚ်ကွေဟ် ပွိုၚ်ဍုၚ်ကအ်ကြိက်ဂှ်တုဲ ကျာ်ဇၞော်အ္စာဂ္ဇအ်ဘာ ဒးပဝ်အာလဝ်ရ။
အပ္ဍဲပေါဲဗ္တိုက် ဗ္ဒါဲဍုၚ်ကအ်ကြိက်ကဵု ဍုၚ်ကြုၚ်ဒဵုဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုလွဟ်ဇၞော် ကေုာံ ဗ္တိုက်ကဵုပၞာန်ကျာတံဂှ်တုဲ ညးဍုၚ်ကွာန်ဒေသ ဟွံအောန်နူ ၂၀ တၠ ဒးချိုတ်အာလဝ်တုဲ ညးကလိဂွံဝပ် ဗ္ဒါဲ ၄၀ တၠ နွံတုဲ လၟိဟ်ညးဒးပါဲဘဲပၞာန် ဂၠိုၚ်တိုန်ကၠုၚ် စဵုကဵုမွဲကိုဋ်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ