နေဗျဳဒဝ်၊ မေ ၂၁
ကံၚ်ဇြဳပၞာန် ဆက်ဗ္တိုက်ဒၟံၚ်ကဵုပၞာန်ကျာ လ္တူဘာဗ္တောန်လိက် အလုံဍုၚ်မွဲဂှ် ရပ်စပ်စကာဝေါဟာ သၟာပကီုပရာပ် ကုဂကောံဇြဟတ်ပၠန်ဂတးတံတုဲ ညံၚ်ဟွံဂွံပလာပ်ပထုဲ ပ္ဍဲကဏ္ဍပရေၚ်ပညာဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုကၠုၚ်ရ။
ပ္ဍဲကောံဓရီုပညဳပညပ်ကမၠောန် ဂကောံအလဵုအသဳကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုမေ ၁၉ ဂှ် အခိၚ်က္ဍိုပ်သ္ကိုပ်ပၞာန် ဟီုဂလာန်ဗ္ကန်ဂှ် ဟီုစုတ်ဏာလဝ် ပရေၚ်မဆက်စပ်ကဵုကဏ္ဍပရေၚ်ပညာရ။
က္ဍိုပ်သ္ကိုပ်ပၞာန်ဂှ်တှ်ေ ယဝ်ပလာပ်ပထုဲပလီုပလာ်ဒၟံၚ် ကဏ္ဍပရေၚ်ပညာမ္ဂး နကဵုဒေသတံဏံဂမၠိုၚ် သှ်ေၜက်အာ လက္ကရဴဒေသတၞဟ်ဟ်ဏောၚ်တုဲ ပွမပလီုပလာ် ကဏ္ဍပရေၚ်ပညာဂှ်ဝွံ ပလီုဒၟံၚ်အနာဂတ်ဇကုတံဂှ်ရ ဒးတီကၠိုဟ်လဝ်ဏောၚ်ဂှ် ကၟာတ်လဒဵုဒုဟ်ညးတုဲ ဟီုကၠုၚ်လဝ်ရ။
အ္စာၝောံ CDM မွဲတၠဂှ်တှ်ေ ကံၚ်ဇြဳပၞာန်ဂှ် အလဵုညးတံ ဗက်ထောံမခတိုဟ်တုဲ ဟီုကၠုၚ် လ္ပပလာပ်ပထုဲ ကဏ္ဍပရေၚ်ပညာဂှ်ဝွံ လီဠာန်ဒၟံၚ်ဂတမတ်ဏောၚ်ဂှ် ပါ်ပါဲလဝ်ရ။
“ ကံၚ်ဇြဳပၞာန် ဗက်ထောံမံၚ်မခတိုဟ် ကုဘာဗ္တောန်လိက်တံဂှ်တှ်ေ ညးဂၠးတံလေဝ်တီ ညးဍုၚ်ကွာန်တံလေဝ် တီဒၟံၚ်သီုဖအိုတ်ရ။ တီမံၚ်သီုညးဖအိုတ်တုဲ ဍေံတံ ကလေၚ်ဟီုကၠုၚ်ဒၟံၚ်ဏီဂှ်တှ်ေ လီဠာန်ဒၟံၚ် ဂတမတ်ဏောၚ်” သာ်ဝွံ သ္ဂးရ။
နကဵုကံၚ်ဇြဳပၞာန် ထောံဂြာတ်မခတိုဟ် လ္တူဘာဗ္တောန်လိက် ဒၞါဲပွန်ပရေၚ်ပၞာန်ဟွံသေၚ်တံဂှ်တုဲ ဗ္တိုက်ပြိုက်ဂစိုတ်ဒၟံၚ် ကွးဘာဂမၠိုၚ်ဂှ်ဝွံ ညံၚ်ကွးဘာဂမၠိုၚ် လုပ်ပ္ဍဲအခန်ဗ္တောန်လိက်ဟွံမာန်ဂှ် ကၠောန်သ္ပဒၟံၚ်တုဲ အနာဂတ်တေံ ညံၚ်ညးမလေပ်ပညာ ဟွံဂွံမွဲဂှ် ကၠောန်ဒၟံၚ်ရောၚ် ညးဆက်ဟီုရ။
ကံၚ်ဇြဳပၞာန် ဟီုကၠုၚ် လ္ပပလီုကဏ္ဍပရေၚ်ပညာဂှ်ဝွံ ပ္ဍဲဂိတုမေ ၁၂ တုဲကၠုၚ်တေံ ထောံဂြာတ်မခတိုဟ်ဗ္တိုက်ကၠုၚ်လဝ် ဘာဗ္တောန်လိက် နွံပ္ဍဲကွာန်အိုဝ်တုၚ်တွေန် ပွိုၚ်ဍုၚ်ဒဳပေဝ်ယေန် ရးသက်ကိုၚ်ဂှ်တုဲ အ္စာၝောံဂမၠိုၚ်မပါလုပ် ကောန်ၚာ်သၟတ် ၂၄ တၠ ဒးချိုတ်အာလဝ်ရ။
ဘာဗ္တောန်လိက် ကွာန်အိုဝ်တုၚ်တွေန် နူကဵုဒပ်ကံၚ်ဇြဳပၞာန်တံ မကလိလောန်လဝ် ပရေၚ်ဗ္တိုက်ပၞာန်ကျာဂှ်ဝွံ ဒှ်ဘာပရေၚ်ပညာ သၟဝ်ဌာနဝန်ဇၞော်ပရေၚ်ပညာ အလဵုအသဳညဳသၟဟ်ဂကူ NUG ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ကံၚ်ဇြဳပၞာန် ၜိုန်ဟီုဒၟံၚ် ညံၚ်ဟွံဂွံပလာပ်ပထုဲ ကဏ္ဍပရေၚ်ပညာကီုလေဝ် အလဵုညးတအ် စွံပွန်ဗ္တိုက်ဒၟံၚ် ဘာဗ္တောန်လိက်ဂမၠိုၚ်ဂှ်ဝွံ ဝးပ္ကဝ်ဒၟံၚ် အခေါၚ်အရာမၞိဟ်ကဵု သၞောဝ်ဍုၚ်သ္အာၚ်တံဂှ်တုဲ ဒှ်ပွပကီုပရာပ် ပရေံဂိမွဲရောၚ် ဟီုရ။
“ အပ္ဍဲပေါဲဗ္တိုက်ဂှ် အခေါၚ်စွံပွန် လ္တူရုၚ်ဂဥုဲကေုာံဘာဗ္တောန်လိက်တံ ဟွံမွဲပုဟ်ဂှ် ကုလသမဂ္ဂ လလောၚ်ပ္တိတ်လဝ်နွံ။ ဗ္တိုက်ဘာဗ္တောန်လိက်ဟီုဂှ် ဝးပ္ကဝ်ဒၟံၚ်အခေါၚ်အရာမၞိဟ် ဇၞော်ကဵုဇြဟတ်တုဲ သီုကဵုဒှ်သဘဴဖံက်ပလီု သၞောဝ်ဍုၚ်သ္အာၚ်တအ် မတုပ်လဝ်စိုတ်ဂှ်ရ။ ထောံဂြာတ်မခတိုဟ် ဗ္တိုက်ဒၟံၚ်ဘာဗ္တောန်လိက်ဂှ်ဝွံ ပၞောဝ်ကဵုပွပကီုပရာပ်ပရေံဂိအိုတ် ၆ သာ်ဂှ် ပါလုပ်မံၚ်မွဲရ” သာ်ဝွံ သ္ဂးရ။
ကံၚ်ဇြဳပၞာန် ဗ္တိုက်ကၠုၚ်ဒၟံၚ် ဘာဗ္တောန်လိက်ဂမၠိုၚ် နကဵုတၚ်ရန်တၟံနွံနွံဂှ်ဝွံ ညံၚ်ညးဍုၚ်ကွာန်တံ ဟွံဂွံပံၚ်တောဲကဵု ဂကောံဇြဟတ်ပၠန်ဂတးတံဂှ် ဘပဠဒၟံၚ်တုဲ ညံၚ်ဟွံဂွံဒးဒုၚ်ဓရတ်ကဵုဍုၚ်သ္အာၚ်တံဂှ်လေဝ် လီဠာန်ကၠုၚ်ဒၟံၚ် နူကဵုသဵုယှေဝ်မဳဒဳယျာတံဂှ်ရောၚ် ညးဆက်ဟီုရ။
ကံၚ်ဇြဳပၞာန် ဗက်ထောံမံၚ်မခတိုဟ် ဘာဗ္တောန်လိက်ဂမၠိုၚ်ဂှ်တှ်ေ ဟွံဒေါအ်ဟွံဂွံ ဒးထ္မံက်အာရုပ်ရဴ တမ်ရိုဟ်မၞိဟ် ညးမလေပ်ပညာတအ်ဂှ်ဏောၚ်တုဲ တၠပညာ နွံမှဟေၚ် ဂွံဖျေံစိုတ် သွက်အနာဂတ်ကၟိန်ဍုၚ်ဏောၚ် သွက်ဂွံဒုၚ်ဂိုၚ်ကေတ်လဝ်သာ်ဏံလၟိုန်ဂှ် နွံပၟိက်ရောၚ် က္ဍိုပ်သ္ကိုပ်ပၞာန် သ္ဂးရ။
အတိုၚ်တၚ်နၚ် ဌာနဝန်ဇၞော်အခေါၚ်အရာမၞိဟ် NUG မ္ဂး နူသၞာံ ၂၀၂၃ ဂိတုဂျာန္နဝါရဳ ၁ စဵုကဵုသၞာံဏံ ဂိတုမေ ၁၂ ဂှ် အလုံဍုၚ်မွဲ ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ကောန်အရာပ် ၃၀၀၀ ပြၚ် ချိုတ်အာလဝ်တုဲ ပ္ဍဲကဵုဏံ ဘာဗ္တောန်လိက် ၂၄၀ ပြၚ် ဒးဒုၚ်ထောံလဝ်မခတိုဟ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−SAC