နေဗျဳဒဝ်၊ မေ ၂၁
မ္ၚးနူစက်ယန်တြးဝါဒဂမၠိုၚ် မပ္တံကဵုလိက်ပရိုၚ်၊ ထဳဝဳကၟိန်ဍုၚ်ပိုၚ်၊ ပလာတ်ဝှမ်လပှ်ကျာတံဂှ် ကံၚ်ဇြဳပၞာန် စကာကၠုၚ်ညးထံက်ဂလာန်ဒပ်ပၞာန်တုဲ နကဵုတၚ်ရန်တၟံနွံနွံ တြးကၠုၚ်ဝါဒ ကၟာတ်လဒဵုကၠုၚ်ဂှ် ဂၠိုၚ်ကၠုၚ်ရ။
ပ္ဍဲကဵုလၟေၚ်ဒဒှ် ဘာဗ္တောန်လိက် အိုဝ်တုၚ်တွေန် ဒးဒုၚ်ထောံမခတိုဟ်ဂှ် သွက်ဂွံကၟာတ်လဒဵု ပရေၚ်ကံၚ်ဇြဳပၞာန် မကလိလောန်လဝ်ဂမၠိုၚ်ဂှ်တုဲ တြးကၠုၚ်ဝါဒ ကၟာတ်လဒဵုကၠုၚ် နကဵုပရူဒဒှ်ဟွံဍာံပြတံဂှ် ဂွံဆဵုကေတ်ဒၟံၚ် ဒဒှ်ရချူဒၟံၚ်ကဵုဂကောံ နကဵုအကံက်ပတောံ သၟဝ် Post ပရိုၚ်မဳဒဳယျာတံဂှ်ရ။
လအာတုပ်သာ်ဂှ်ကီု နူပရိုၚ်မဳဒဳယျာကၟိန်ဍုၚ်ပိုၚ်မွဲကဆံၚ် ဒဒှ်ရဟွံကလိလောန်လဝ် အမှုရာဇဝတ်ပၞာန်တံဂှ် တြးပ္တိတ်ကၠုၚ်ပရိုၚ် မကယျာန်ပါဲ သောၚ်ၚ်ကၠးကၠးဂှ်ကီု၊ ပ္ဍဲကဵုထလဳဂရာမ် ကေုာံ Tik Tok တံဂှ်လေဝ် ရဲထံက်ဂလာန်ဒပ်ပၞာန်ဂမၠိုၚ် တြးကၠုၚ်ဝါဒ နကဵုတၚ်နၚ်ဗၠေတ်တ်ဂမၠိုၚ်ရ။
စပ်ကဵုပရေၚ်ဏံတုဲ အလဵုအသဳညဳသၟဟ်ဂကူ NUG ဂှ်တှ်ေ ပွမကဵုလှုဲတုဲစကာဒၟံၚ်ရဲထံက်ဂလာန်ဒပ်ပၞာန်ဂမၠိုၚ် ကဵုတြးဒၟံၚ်တၚ်နၚ် မပလီုလဝ်ရုပ်ရဴ၊ ပရိုၚ်ပတောံတံဂှ်ဝွံ ပ္တိတ်ဒၟံၚ်ဇြဟတ် သ္ဂောံကၟာတ်လဒဵု အမှုရာဇဝတ်ပၞာန် မကလိလောန်တံဂှ်ဏောၚ် ခၠေဝ်ပလန်လဝ်ရ။
ဥူတိုဝ်ဇြဝ်လာတ် ညးအုပ်ကာ ကံၚ်ဇြဳပရိုၚ်မဳဒဳယျာဗၠးၜးဍုၚ်ဗၟာ IPCM ဂှ် ပ္ဍဲ Facebook အခိၚ်ဒေါအ်ဇူလဝ် ပရေၚ်ဖာဲပ္တိတ်ပရိုၚ်ပတောံ ပရိုၚ်ဗၠေတ် ဒပ်ပၞာန်တံဂှ် ကေတ်အခေါၚ်ခိုဟ်တုဲ ရပ်စပ်စကာဒၟံၚ် ညံၚ်ရဴလွဟ်မွဲရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ရပ်စပ်စကာပရိုၚ် ညံၚ်ရဴလွဟ်မွဲတုဲတှ်ေ အခိၚ်သဵုယှေဝ်မဳဒဳယျာ Facebook ဒေါအ်ဇူလဝ် အရာမဖာဲပ္တိတ်ကၠေံပရိုၚ်တံဂှ် ကေတ်အခေါၚ်ခိုဟ်တုဲ ကၠာတေံဂှ်တှ်ေ ယဝ်ပရိုၚ်ပတောံ ပရိုၚ်ဗၠေတ် ချာန်နေဝ်ဒပ်ပၞာန်မ္ဂး ဌာနတာဒၞါ မဂွံဖာဲပ္တိတ်တံဂှ် နွံဒၟံၚ်သက်က်ဏောၚ်။ ညအ်ဂှ် လၟုဟ်ပြဟ်ဟ်ဏံ ဟွံကၠောန်ကလောန်ပုဟ်၊ ဒေါအ်ဇူလဝ်ရ။ ကေတ်အခေါၚ်ခိုဟ်ကဵုအရာဏံတုဲ ညံၚ်ရဴပရူဒဒှ်သ္ဒးအောန်စိုတ်သာ်ဏံတံဂှ် ဍေံတံ သာတုဲရပ်စပ်စကာကၠုၚ် မတုပ်သၟဟ်ကဵုလွဟ်မွဲရောၚ် မိက်ဂွံဟီုရ” သာ်ဝွံ သ္ဂးရ။
ပ္ဍဲဂိတုမေ ၁၁ တေံ ဘာဗ္တောန်လိက်မွဲ မပံက်လဝ် သၟဝ်ဌာနဝန်ဇၞော်ပရေၚ်ပညာ အလဵုအသဳညဳသၟဟ်ဂကူ NUG ပ္ဍဲကွာန်အိုဝ်တုၚ်တွေန် ပွိုၚ်ဍုၚ်ဒဳပေဝ်ယေန် ရးသက်ကိုၚ်ဂှ် ဒးဒုၚ်ထောံဂြာတ်လဝ်မခတိုဟ်ရ။
ပရေၚ်ဗ္တိုက်ဏံဂှ် ကံၚ်ဇြဳပၞာန် ကၠုၚ်စိုပ်ထောံဂြာတ်ဏာလဝ်မခတိုဟ် နူကဵုဒပ်ပၞာန် နကဵုက္ၜၚ်ကျာဂျက်ဖိုက်တာ မွဲဖ္ဍိုက်တုဲ အ္စာဗ္တောန်လိက် နွံဒၟံၚ်ပ္ဍဲဘာဂှ်ၜါတၠ မပါလုပ်ဂှ် ကွးဘာ ၂၄ တၠ လမျီုဒးအိုတ်အာလဝ်တုဲ ၄၀ ပြၚ် ကလိဂွံလဝ်ဝပ်ရ။
ရဲထံက်ဂလာန်ဒပ်ပၞာန်တံဂှ်တှ်ေ ချူဒၟံၚ် သၟဝ် Post ပရိုၚ်မဳဒဳယျာဂမၠိုၚ် ဒဒှ်ရ PDF တအ် ကၠောန်မာၚ်တဲ ပ္ဍဲဘာတုဲ ဗ္တိုဟ်ထ္ကးအာဂှ် ပဒုဟ်စဒၟံၚ်ဒပ်ပၞာန် သာ်ဏံနွံတုဲ ဗဒှ်ကေတ်ပရူဂှ်တုဲ လီဠာန်ဒၟံၚ်ဂးတုဲလေဝ် ညံၚ်ပရေၚ်ပရူဒဒှ်ဏံ ဂွံသဗုၚ်သပါအာဂှ် ပလီုဒၟံၚ်ရုပ်ရဴ ကၠောန်သ္ပဒၟံၚ်ရ။
စပ်ကဵုပရေၚ်ဏံတုဲ ညးထံက်ဂလာန်ပၠန်ဂတး၊ ထံက်ပလံၚ်၊ ညးဍုၚ်ကွာန် နွံအပ္ဍဲဍုၚ် မဒစဵုဒစး သၞောတ်တၠအဝဵုပၞာန်တံဂှ်တှ်ေ ခၠေဝ်ပလန်ကၠုၚ် နကဵုတၚ်နၚ်ဂွံဓလီုအာ ပရေၚ်ရဲထံက်ဂလာန်ဒပ်ပၞာန်တံ တြးဝါဒ ပလီုဒၟံၚ်ရုပ်ရဴတံဂှ် သ္ပကၠုၚ်ဟွံမာန်ရ။
ဟိုတ်ဍေံဂှ်တှ်ေ ကြဴနူသီအဝဵုတုဲ ဒဵုကဵုတ္ၚဲဏံ ကၟာတ်လဒဵုလဝ် အခေါၚ်ထ္မံက်ပ္တိတ်ဟီုဂး ချူခၞံ ဗွဲမဗၠးၜး နကဵုၝောံပိုဒ်သၞောဝ် ကေတ်အရေဝ်ဖျေံထံၚ်ဂွံတံဂှ်တုဲ ကုညးမရပ်စပ်စကာဇာဇၞိက်ပရေၚ်မၞိဟ်တံဂှ်လေဝ် ကံၚ်ဇြဳပၞာန် မၚ်ရံၚ်ဒၟံၚ်ရ။
ဗိုလ်ဇၞော်ဇြေန်ယဝ် သ္ပလဝ် CDM ဂှ်တှ်ေ နကဵုကံၚ်ဇြဳပၞာန် ဗက်ကၠောန်ဒၟံၚ် အတိုၚ်ရဲထံက်ဂလာန်ဒပ်ပၞာန်တံ ဟီုဒၟံၚ်ဂှ်တုဲ ပရေၚ်လီဠာန်ဟီုဂးဒၟံၚ်တံဏံဂှ် ညးမပါလုပ် လ္ပာ်ပၠန်ဂတးဏံ ထေက်ကဵုဒးကလေၚ်ခၠေဝ်ပလန် နကဵုတၚ်နၚ်ဂမၠိုၚ်ရောၚ် ထံက်ထ္ၜးလဝ်ရ။
“ အရာဍေံတံ လီဠာန်ဟီုဒၟံၚ် ဂွံကၠးဖ္ဍးကၠုၚ်ဂှ် ညးဍုၚ်ကွာန်ပၠန်ဂတးတံကီု ညးဍုၚ်ကွာန်မံၚ်အကြာတံကီု သီုညးဍုၚ်ကွာန်ထံက်ဂလာန်ဒပ်ပၞာန်တံကီု သီုညးဖအိုတ် ဂွံပတှ်ေဂှ် လ္ပာ်ပိုယ်တံလေဝ် ဒးကလေၚ်ဗ္တိုက်အာဏောၚ်။ လဝ်ဗဳဍေံတံဂှ်တှ်ေ ကဆံၚ်ဟွံမွဲပုဟ်။ ပ္ဍဲကဵုပူဂဵုဒယှ်ဒယှ် မပါလုပ်ဒၟံၚ် ပ္ဍဲပၠန်ဂတးက္ညၚ်ဏံ ညးမလေပ်ပညာ တၠပညာဂမၠိုၚ်လေဝ် ပါလုပ်ဂၠိုၚ်ဒၟံၚ်ရ၊ သီုကဵုတၠအနုပညာဂမၠိုၚ်ရ။ ပူဂဵုတံဏံလေဝ် ၜိုန်ဟွံဒးကလေၚ်ခၠေဝ် အရာလဝ်ဗဳကံၚ်ဇြဳပၞာန်တံ မကၠောန်သ္ပဒၟံၚ်ဂှ်ကီုလေဝ် ညံၚ်ဍုၚ်ကွာန်ဂမၠိုၚ် ဂွံတီကေတ်ဒဒှ်ဍာံဂှ် ဒးသောၚ်ကလးထေက်” သာ်ဝွံ သ္ဂးရ။
နကဵုကံၚ်ဇြဳပၞာန် အခိၚ်ကာလသီလဝ်အဝဵုပြဟ်ဟ်တေံ ဟိုတ်နူသဵုယှေဝ်မဳဒဳယျာ Facebook ကၟာတ်လဒဵုကၠုၚ်လဝ်တုဲ ပရိုၚ်တြးဝါဒ ဒပ်ပၞာန်တံဂှ် ပြံၚ်ကၠုၚ် နူကချာန်နေဝ်ထလဳဂရာမ်ရ။
ရဲထံက်ဂလာန်ဒပ်ပၞာန်၊ လဝ်ဗဳဒပ်ပၞာန်တံ မပါလုပ် မၞိဟ်ပူဂဵု နူကဵုပရိုၚ်မဳဒဳယျာ မကဵုလဝ်အထံက်အပၚ်တံဂှ်လေဝ် ဆက်ပၠောပ်လဝ်လမျီု စက်ယန်တြးဝါဒကံၚ်ဇြဳပၞာန် ပ္ဍဲချာန်နေဝ်ထလဳဂရာမ်တံဂှ်ရ။
ပ္ဍဲကဵုရဲထံက်ဂလာန်ဒပ်ပၞာန်တံ ပလီုရုပ်ရဴဂြောပ်လဒဵုကၠုၚ်ဒၟံၚ်ဂှ် ဂၠံၚ်ဒဒန်ဂမၠိုၚ် ဒးဒုၚ်ခတိုဟ်ဗုမ်ပလီုပလာ်တုဲ ပရေၚ်အာကၠုၚ် ပရေၚ်ပလံၚ်ဗစိုပ် ခက်ခုဲတုဲ ၚုဟ်ဗၞိက်ဖျာတိုန်ကီု၊ တိုၚ်ဓာတ်လလဳတံ ဒးဒုၚ်ပလီုတုဲ ပၟတ်ဟွံကၠုၚ်တံဂှ်လေဝ် ညံၚ်ဂွံထေၚ် ဟိုတ်နူ PDF တံဂှ် တြးဒၟံၚ်ဝါဒရ။
ဣဏံဝွံ ဟိုတ်နူဒပ်ပၞာန်သီလဝ်အဝဵုတုဲ ကၟိန်ဍုၚ် ဂြုဲဂြေဟ်စှ်ေဒၟံၚ် နူသွာၚ်ဇဳဂှ် ပါဲဒလေတ်ကၠေံ အရာညးဍုၚ်ကွာန်တံ စၞောန်တဲပ္တိုန်ဒုဟ် ကုကံၚ်ဇြဳပၞာန်ဂှ်တုဲ သွက်ဂွံဒှ်ပကၠေံဒုဟ် ဂကောံပၠန်ဂတးတံဂှ် ဒဒှ်ရဒးပသတိ ဗွဲတၟေၚ်ဂှ် ထံက်ထ္ၜးဒၟံၚ်တံလေဝ် နွံဒၟံၚ်ပၠန်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ယဝ်ကလေၚ်ခၠေဝ်အာ ကုပရေၚ်ရဲထံက်ဂလာန်ဒပ်ပၞာန်တံ တြးဒၟံၚ်ဝါဒ ပလီုဒၟံၚ်ရုပ်ရဴ နနဲနာနာသာ်တံဏံ ဟွံမာန်မ္ဂး ပရေၚ်ညးဍုၚ်ကွာန်တံ ထံက်ဂလာန်ဂှ် ယအ်စှ်ေကၠုၚ်ဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂွံတတ်ကၠောံအာညအ်မာန်ဂှ် ဂကောံပၠန်ဂတးသီုဖအိုတ် သၠုၚ်ပ္တိုန်အသိၚ် လ္ပာ်ပရေၚ်ပၞာန်တုဲ လ္ပာ်မဳဒဳယျာတံဂှ်လေဝ် ဒးကလေၚ်ဗ္တိုက်အာ နကဵုအသိၚ်ဏောၚ်။ ဟွံသေၚ်မ္ဂး ပိုယ်တံ ဒးထေၚ်ဗၠေတ်ကဵုညးဍုၚ်ကွာန်တံတုဲ ပရေၚ်ထံက်ဂလာန်တံလေဝ် ယအ်စှ်ေကၠုၚ်ဏောၚ်” သာ်ဝွံ သ္ဂးရ။
ညးလ္ၚတ်ဂမၠိုၚ်ဂှ်တှ်ေ လၟေၚ်ဒဒှ်ကံၚ်ဇြဳပၞာန် ကလိလောန်လဝ် လ္တူကောန်အရာပ်တံဂှ် ရဲထံက်ဂလာန်ဒပ်ပၞာန်တံ ဓရိုဟ်ပလံၚ်ဒၟံၚ် ညံၚ်ဒုဟ်ဇကု ဂွံဒှ်ဒုဟ်ညးတၞဟ်တုဲ ညံၚ်ညးဍုၚ်ကွာန်တံ စိုတ်သံသယဂွံဂၠိုၚ်တိုန် ညံၚ်ညးဍုၚ်ကွာန်မံၚ်အကြာတံ ဂွံဂၠိုၚ်ကၠုၚ်ဂှ်ဏောၚ် သ္ၚဳဂၠိပ်လဝ်ရ။
NUG ဂှ်လေဝ် ဂွံကေတ်အရေဝ်ကဵုဒုဟ်ဒဏ် ဗွဲမဗဗွဲကဵုသၞောဝ် ကုရဲထံက်ဂလာန်ဒပ်ပၞာန် မကၟာတ်လဒဵုလီဠာန်ဒၟံၚ် ပရိုၚ်မဍာံဂမၠိုၚ်ဂှ် ပ္တိတ်အာဇြဟတ်ဏောၚ်တုဲ ညံၚ်ဒပ်ပၞာန် ကလိလောန်ဒၟံၚ်ဂမၠိုၚ် ဂွံဒေါအ်ဒေၚ်အာဂှ် နကဵုဗွိုၚ်ဍုၚ်သ္အာၚ်ဂမၠိုၚ် ပါလုပ်သီုကဵုကုလသမဂ္ဂတံလေဝ် သွက်ဂွံကၠောန် ပရေၚ်ကဵုဇြဟတ်ဓရိုဟ် ကေတ်အရေဝ် မစှ်ေကဵုနတဲတံဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CINCDS