ကအ်ကြိက်၊ မေ ၂၂
ပ္ဍဲတွဵုရးကရေၚ် ပွိုၚ်ဍုၚ်ကအ်ကြိက် ပ္ဍဲကွာန်(လေးတိုင်) ဂှ် ဟိုတ်နူကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတုဲ ညးဍုၚ်ကွာန်ကောန်အရာပ်ၜါတၠ ဇီုကပိုက်ချိုတ်အာလဝ်ရောၚ် ဂွံတီကေတ် ဇရေၚ်ဂကောံရီုဗၚ်ပရေၚ်မၞိဟ်ဒေသတံရ။
ပ္ဍဲဂိတုမေ ၂၀ အခိၚ်တ္ၚဲစေၚ် ၜိုတ် ၂ နာဍဳပြၚ်ဂှ် က္ၜၚ်ကျာဗ္တိုက် ဂျက်ဖိုက်တာ ဒပ်ကံၚ်ဇြဳပၞာန် မွဲဖ္ဍိုက်ဝွံ ကၠုၚ်ထောံဏာလဝ်မခတိုဟ်ပန်မ လ္ပာ်ကွာန်(အံကောင်း) ကဵု ကွာန်(လေးတိုင်) ရ။
ဟိုတ်နူပရေၚ်ဗ္တိုက်ကဵုပၞာန်ကျာဂှ်တုဲ ညးဗြဴအာယုက် ၃၀ သၞာံပြၚ်မွဲတၠ ဒးပအာကာဂစိုတ်ဒၞါဲဂှ်တုဲ မၞိဟ်တြုံမွဲတၠဂှ်တှ်ေ ကလိဂွံဝပ်သ္ကာတ်မြဟ်တုဲ အဃောဖ္ဍိုက်ဏာ အာလွဳယဲဂှ် ဆီတိတ်ဂၠိုၚ်တုဲ ဒးချိုတ်အာလဝ် ပ္ဍဲဂၠံၚ်ရ။
ပ္ဍဲပွဳပွူ ဍုၚ်ကအ်ကြိက်ကဵု ဍုၚ်ကြုၚ်ဒဵုဂှ် ပေါဲဗ္တိုက်ဆက်နွံဒၟံၚ် စဵုကဵုဂိတုမေ ၂၁ တုဲ လ္ပာ်ကံၚ်ဇြဳပၞာန်ဂှ်လေဝ် ထောံဂြာတ်မံၚ်မခတိုဟ် နူကဵုပၞာန်ကျာတုဲ တမ်ဒပ်ဖျေံသ္ဇိုၚ်ဂမၠိုၚ်လေဝ် ပန်ပှော်ဒၟံၚ်ကဵုလွဟ်ဇၞော်ရ။
ပ္ဍဲဂိတုမေ ၁၉ တုဲကၠုၚ်တေံဂှ်လေဝ် လ္တူဍုၚ်ကြုၚ်ဒဵု အရာပ်စၟတ် ၄ လ္ပာ်(ကျွန်းကလေး) ဂှ် အ္စာဘာ CDM မွဲတၠ နူကဵုပါဲမံၚ်ဘဲပၞာန် စဴကၠုၚ်သ္ၚိမွဲလစုတ်ဂှ် ဒးကဝေက်လွဟ်ဇၞော်တုဲ ချိုတ်အာလဝ်ရောၚ် ဂွံတီကေတ်ရ။
အပ္ဍဲပေါဲဗ္တိုက်ၜါလ္ပာ် ဗ္ဒါဲဍုၚ်ကအ်ကြိက်ကဵု ဍုၚ်ကြုၚ်ဒဵုဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုလွဟ်ဇၞော်ကေုာံပၞာန်ကျာတုဲ ကောန်အရာပ် ဟွံအောန်နူ ၂၀ တၠ ချိုတ်အာလဝ်တုဲ ညးကလိဂွံဝပ် နွံကၠုၚ်လဝ် စဵုကဵု ၄၀ တၠရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media