ဒပ်ပံၚ်ကောံ KNLA ထပ်ဗ္တိုက် ဗ္ဒိုပ်ဒပ်ပၞာန်ၜါ ပ္ဍဲပယျဵုသေံ−ဗၟာ

ဗြဝတဳ၊ မေ ၂၂

ပပ္တံနူဂိတုမေ စၟတ်တ္ၚဲ ၂၀ တုဲ ဒပ်ပၠန်ဂတးဂမၠိုၚ် ဝေၚ်ဒၟံၚ်ပေါဲဗ္တိုက်သီဗ္ဒိုပ် ကုဗ္ဒိုပ်ဒပ်ကံၚ်ဇြဳပၞာန်ၜါ ပါလုပ်သီုကဵုဗ္ဒိုပ်(မော်ခီး) ဗမဖျေံလဝ်ဒပ် ဗ္ဒါဲဍုၚ်သုကလိကဵု ဍုၚ်ဝဝ်လေ တွဵုရးကရေၚ် ပယျဵုသေံ−ဗၟာဂှ်ရောၚ် တမ်ရိုဟ်ပရိုၚ်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗ္ဒိုပ်(မော်ခီး) မပါလုပ် ဗ္ဒိုပ်ဒပ်ကံၚ်ဇြဳပၞာန်ၜါဂှ် ဒပ်ပၞာန်ဗၠးၜးကောန်ဂကူကရေၚ် KNLA ၊ ကဝ်တူလေဝ်အာမဳ KTLA တံ ရပ်စပ်ဒရုၚ်တုဲ နူကဵုထောံဂြာတ်မခတိုဟ်ဗ္တိုက်ကၠုၚ်ဂှ် ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရ။

ဟိုတ်နူအကာဲအရာပေါဲဗ္တိုက် ဒှ်လဝ် အပ္ဍဲဒေသသုကလိ၊ ဝဝ်လေဂှ်တုဲ ဒပ်ပၞာန်သေံဝွံ သၠုၚ်ပ္တိုန်ပရေၚ်ဂီုကၠီုပယျဵု ဖျေံလဝ်တုဲ မၚ်ကျောဝ်ဒၟံၚ် ပွိုၚ် ၂၄ နာဍဳဂေတ်ကၠောံရောၚ်ဂှ်လေဝ် တမ်ရိုဟ်ပရိုၚ်သေံပယျဵုတံ ထ္မံက်ထ္ၜးလဝ်ရ။

အပ္ဍဲသၞာံ ၂၀၂၂ တုဲကၠုၚ်တေံ ဒပ်ပံၚ်ကောံဒပ်ပၠန်ဂတး ဒပ်မဟာ ၆ KNLA ကေၚ်ဗ္တိုက်သီကေတ်လဝ် ဗ္ဒိုပ်(မော်ခီး) တုဲ ကြဴနူဂှ်တုဲ ဒပ်ကံၚ်ဇြဳပၞာန် ကလေၚ်ထ္ပက်ကၠုၚ်ပၞာန် နကဵုဇြဟတ်လၟိဟ် ဗွဲမဂၠိုၚ်ဂၠေၚ်ဂှ်တုဲ ဒးဆုတ်ကလေၚ်အာလဝ်ဗ္ဒိုပ်ရ။

မွဲလ္ပာ်ဂှ်ပၠန်လေဝ် ဗ္ဒိုပ်ဒပ်ကံၚ်ဇြဳပၞာန် နွံပ္ဍဲတိဍာ်ဒပ်မဟာ ၇ KNU သ္ကုတ်သၟဝ်ကျာ ဍုၚ်ဗြဝတဳဂှ် ဒပ်ပံၚ်ကောံ KNLA KNDO တအ် စထ္ပက်ပၞာန်ဗ္တိုက်သီဂွံလဝ်တုဲ အပ္ဍဲပွိုၚ် ၃ ဂိတုဂှ် သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ၇ တုဲ အပ္ဍဲဒေသဏံဂှ် ဗ္ဒိုပ်ကံၚ်ဇြဳပၞာန် သှ်ေဒၟံၚ်ညိညဓဝ်ရ။

သ္အာၚ်နူဂှ်ပၠန် ပ္ဍဲဒေသတိဍာ် KNU ဒပ်မဟာ ၆ မပ္တံကဵုဒေသကအ်ကြိက်၊ ကြုၚ်ဒဵုဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံမဟာမိတ်ပၠန်ဂတး သၟဝ်သ္ကိုပ်သ္က KNLA တံဂှ် စနူဂိတုဨပရဴတုဲကၠုၚ်တေံတုဲ ပေါဲဗ္တိုက်ၜါလ္ပာ် က္တဵုဒှ်လဝ်ဇၞော်ကဵုဇြဟတ်တုဲ သီုၜါလ္ပာ် ဇီုကပိုက်ပြဟ်လလုဲအာ နွံတုဲ ဒပ်ပံၚ်ကောံတံ သီဂွံလဝ် ဗ္ဒိုပ်ကၚ်စဵုဒၞါ ဒပ်ကံၚ်ဇြဳပၞာန်ကဵု ဗ္ဒိုပ်သၞေဟ်ကၚ်ညိညရ။

ဣဏံဝွံ ပ္ဍဲကဵုပေါဲဗ္တိုက်ဂမၠိုၚ် ကေုာံ ပ္ဍဲကဵုအကာဲအရာပေါဲဗ္တိုက် သ္ကာတ်မြဟ်ကၠုၚ်ဒၟံၚ် အပ္ဍဲတိဍာ် KNU ဂှ် ဒပ်ကံၚ်ဇြဳပၞာန် စွံကၠုၚ်ပွန် လ္တူညးဍုၚ်ကွာန်ကောန်အရာပ်တံရ။

ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ၊ ပန်ကၠုၚ်ကဵုလွဟ်ဇၞော်၊ ထောံဂြာတ်ကၠုၚ်မခတိုဟ် နကဵုဒရုၚ်တံဂှ်တုဲ ညးဍုၚ်ကွာန်ကောန်အရာပ် ဇီုကပိုက်ချိုတ် ကလိဂွံဝပ် နွံတုဲ လၟိဟ်ကောန်အရာပ် ဒးပါဲဘဲပၞာန်တံဂှ်လေဝ် ထပ်ဂၠိုၚ်တိုန်ကၠုၚ်ဒၟံၚ်ရောၚ် ဂွံတီကေတ် အတိုၚ်ဂလာန် ဂကောံမှာဇန်ကရေၚ်တံရ။

ပရိုၚ်−သြၚ်လောန်တိုၚ်(မ်)

ဗီုရုပ်− Social Media

Leave a Reply

Your email address will not be published. Required fields are marked *