တၞၚ်သဳ၊ မေ ၂၂
ရးတၞၚ်သဳ မဒှ်တိဍာ်ဌာန်ဂအုပ်ပၞာန်ရးရေၚ်ၜဳဂှ် အပ္ဍဲပေါဲဗ္တိုက်ၜါလ္ပာ်တအ်ဂှ် လ္ပာ်ကံၚ်ဇြဳပၞာန် သာတုဲဗ္တိုက်ကၠုၚ်ကဵုပၞာန်ကျာ ဂၠိုၚ်ကၠုၚ်ရောၚ် ဂကောံဇြဟတ်ပၠန်ဂတးဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ ဗွဲတၟေၚ် ပ္ဍဲကဵုအကာဲအရာဗ္ဒိုပ်ဒပ်ညးတံ ဒးဒုၚ်ဗ္တိုက်၊ ဒးဒုၚ်လုပ်စိုပ်ဗ္တိုက် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ် သာတုဲရပ်စပ်ကၠုၚ် ပရေၚ်ဗ္တိုက်ပၞာန်ကျာတံရ။
ပ္ဍဲကဵုဏံ အခိၚ်ဗ္တိုက်သီ ဗ္ဒိုပ်ဗျူဟာထဳထ မၞုံဒေသထဝါဲ (အရှေ့တော) ဗ္ဒါဲပယျဵုသေံ−ဗၟာဂှ်ကဵု အခိၚ်ဗ္ဒိုပ်ဗၠာဲသၟိၚ်ဝေန်ဝ မၞုံပွိုၚ်ဍုၚ်တယိတ်ချံၚ် လ္တူဂၠံၚ်ပျဳထံၚ်သု ထဝါဲ−ဗိက် ဒးဒုၚ်ဗ္တိုက်ဂှ် အာတ်အရီုဗၚ်ပၞာန်ကျာတုဲ ဒးတဝ်စၞေဟ်လဝ် ဗွဲမသ္ကာတ်မြဟ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ မ္ၚးနူဒၞါဲဒပ်ပၠန်ဂတးဂမၠိုၚ် နွံမာန်ဂှ် သီုကဵုကွာန်ဒၞါဲညးဍုၚ်ကွာန်တံ မံၚ်တန်တဴတံဂှ် ရပ်စပ်ကၠုၚ်က္ၜၚ်ကျာဗ္တိုက်၊ က္ၜၚ်ကျာသၞေၚ်ဝဲ ကေုာံ က္ၜၚ်ကျာပရေၚ်ပလံၚ်ဗစိုပ်တံဂှ်တုဲ ထောံဂြာတ်မံၚ်မခတိုဟ်သၟးဟွံက ဆက်ပန်ပှော်လဝ် ကဵုသၞာတ်စက်ရ။
ညးဒုၚ်တာလျိုၚ်လလောၚ်ပရိုၚ် ဒပ်ပံၚ်ကောံ ခရိုၚ်ထဝါဲဂှ် ပ္ဍဲပေါဲဗ္တိုက်သီဗ္ဒိုပ်ဂှ် လ္ပာ်ကံၚ်ဇြဳပၞာန် ယဝ်ပန်ကၠုၚ်ကဵုပၞာန်ကျာမ္ဂး ကောန်ဒပ်ကံၚ်ဇြဳပၞာန် မဖျေံအာလွဟ်တအ် ဟွံဒှ်ဖျေံရတုဲ ဒှ်ကၠုၚ်အကာဲအရာ ကလေၚ်တဝ်စၞေဟ်တံဂှ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ အဓိကဂှ် ပ္ဍဲပေါဲဗ္တိုက်သီဗ္ဒိုပ်တံဏံဂှ် ယဝ်အရီုဗၚ်ပန်ကဵုပၞာန်ကျာတံ ကၠုၚ်ယျမ္ဂး မၞိဟ်လ္ပာ်ကံၚ်ဇြဳပၞာန် မဖျေံအာလွဟ်တံဂှ် ဟွံဒှ်ဖျေံရတုဲ ဒှ်ကၠုၚ်ကလေၚ်တဝ်စၞေဟ်ရ။ ဍေံလအ်အာညိရ။ လဆောဝ်လဆောဝ် လ္ပာ်ပိုယ်တံလေဝ် အခိၚ်ဒးကလေၚ်ဆုတ်အာဂှ်နွံ။ အခါဂှ်တှ်ေ ဍေံတံသာတုဲ ဂွံအာဇြဟတ်ရ” သာ်ဝွံ သ္ဂးရ။
အပ္ဍဲဂိတုဨပရဴတုဲကၠုၚ်တေံ ပ္ဍဲရးတၞၚ်သဳဂှ် ပရေၚ်ဗ္တိုက်ကဵုပၞာန်ကျာ ဒှ်အာလဝ် ဟွံအောန်နူ ၄၅ ဝါတုဲ ယဝ်ဒးၜတ်ကၞာတ်ကဵု ဂိတုမာတ်တုဲကၠုၚ်တေံဂှ်မ္ဂး လၟိဟ်ပရေၚ်ဗ္တိုက်ကဵုပၞာန်ကျာဂှ် သၠုၚ်တိုန်ကၠုၚ် ၜါဆပြၚ်ရ။
မွဲလ္ပာ်ဂှ်ပၠန်လေဝ် ပ္ဍဲရးတၞၚ်သဳဂှ် ဟိုတ်နူကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတုဲ ဒပ်ပၠန်ဂတးတံ ဇီုကပိုက်ကၠုၚ်နွံကီုလေဝ် ကောန်အရာပ်ဇီုကပိုက်ချိုတ်ဂှ် သာဂၠိုၚ်ကၠုၚ်လဝ်ရ။
အပ္ဍဲဂိတုမာတ်တုဲကၠုၚ်တေံဂှ်လေဝ် ပ္ဍဲကဵုပေါဲဗ္တိုက်ရးတၞၚ်သဳဂှ် ဘိုၚ်ပန်ကဵုပၞာန်ကျာတုဲ ကံၚ်ဇြဳပၞာန် ဒးရပ်စပ်လဝ် က္ၜၚ်ကျာနူဒပ်ကျာဗိက် ဂၠိုၚ်အိုတ်တုဲ အပံၚ်ဖအိုတ် ၂၀ ဝါပြၚ် သ္ပကၠုၚ်လဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ

