နေဗျဳဒဝ်၊ မေ ၂၂
ပ္ဍဲကဵုကၟိန်ဍုၚ်ဏံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မကေတ်လဝ်ကဆံၚ်သၠုၚ်အိုတ် ၄ ဒၞါဲဂှ် သွက်ဂွံဒှ်သမ္မတ အလဵုအသဳဂွံဒုၚ်ရုဲစှ်ဂှ် ဟီုပ္တိတ်ကၠုၚ် အကာဲအရာကၠောန်ဗဒှ်ပေါဲရုဲမာဲဂွံတံဂှ်ရ။
ကၠောန်ဗဒှ်ပေါဲရုဲမာဲတုဲ ပွမရေၚ်တၠုၚ်ပရေၚ်ဍုၚ်ကွာန် နကဵုအလဵုအသဳဂွံဒုၚ်ရုဲစှ်ဂှ်ဝွံ သွက်ကၟိန်ဍုၚ်ဂှ် ဒှ်ခိုဟ်အိုတ်ရောၚ် ဟီုဏာလဝ် ပ္ဍဲကောံဓရီုပညဳကမၠောန် ဂကောံအလဵုအသဳကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုမေ ၁၉ တေံရ။
ပ္ဍဲအရာကၠောန်ဗဒှ်ပေါဲရုဲမာဲဂှ် ဒဒှ်ရရေၚ်တၠုၚ် နကဵုတၚ်သ္ဂုတ်သွာတ် ကံၚ်ဇြဳဂီုကၠီုစဵုဒၞါ (ကာလုံ) ဂွံဂှ် စၞောန်ပျးလဝ် ပ္ဍဲသၞောဝ်သ္ဇိုၚ်ရောၚ်ဂှ်လေဝ် က္ဍိုပ်သ္ကိုပ်ပၞာန် သ္ဂးရ။
နူဂိတုဒဳဇြေမ်ဗာ သတ္တာဟတတိယ စဵုကဵုဂိတုဂျာန္နဝါရဳ သတ္တာဟဒုတိယ ဂွံကၠောန်ဗဒှ်ပေါဲရုဲမာဲ သ္ကုတ်ဍေံကဵုဍေံမာန်ဂှ် နကဵုကံၚ်ဇြဳပၞာန် ရုပ်သီအကာဲအရာကာတၟေၚ် မလလောၚ်တြးလဝ် ပ္ဍဲကၟိန်ဍုၚ်ဂှ်တုဲ ဒးဒက်ပ္တန်အလဵုအသဳအကြာမွဲရ။
အာယုက်ကာလကာတၟေၚ် မပပဵုပ္တိုန်လဝ် ၆ ဂိတုလၟုဟ်ဂှ်ဝွံ ပ္ဍဲဂိတုဂျူလာၚ် ၃၁ ဏံမ္ဂး အိုတ်ဏောၚ်တုဲ ပ္ဍဲကဵုတ္ၚဲဂှ် ကော်ကေတ် ကံၚ်ဇြဳဂီုကၠီုစဵုဒၞါကောန်ဂကူ (ကာလုံ) ဂှ်တုဲ ဒးကဵုသ္ဂုတ်သွာတ်ဏောၚ် မဒှ်ရ။
လ္တူတၚ်နၚ် မပ္တိုန်ထ္ၜးကၠုၚ် ပ္ဍဲကောံဓရီုဂီုကၠီုစဵုဒၞါဂှ် သမ္မတယာယဳ မဒှ်ပူဂဵုအဝဵုသၠုၚ်အိုတ်ဂှ်ရ ဒးသ္ဂုတ်သွာတ်ကဵုဏောၚ်တုဲ နကဵုက္ဍိုပ်သ္ကိုပ်ပၞာန် မလှဲပြံၚ်ကေတ်လဝ် ကဆံၚ်သမ္မတယာယဳဂှ်တှ်ေ ဗီုပၟိက်စိုတ် သ္ဂုတ်သွာတ်မာန်ရောၚ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။
ညးရေၚ်တၠုၚ်ဂဗုတ်ကၠတ်ထဝ် ဥူကျဳမျေတ်ဂှ်တှ်ေ က္ဍိုပ်သ္ကိုပ်ပၞာန်မွဲတၠဓဝ် ကောပ်ကာဲဖန်ဇန် သီုအဝဵုပိတန်တုဲ ကြဴနူလလောၚ်တြး ဒဒှ်ရပလီုကၠေံအကာဲအရာကာမံက်တိုန် အတိုၚ်သၞောဝ်တုဲမ္ဂး ဒးကၠောန်ပေါဲရုဲမာဲ အပ္ဍဲပွိုၚ်တြဴဂိတုဏောၚ်ဂှ် ဟီုရ။
“ ဒဒှ်ရလှဲပြံၚ်အဝဵု နူတဲပါဲ လ္ပာ်တဲပုၚ်တုဲဂှ် မေန်အံၚ်လှာၚ် ဆက်တုဲအုပ်ဓုပ်အာ လ္ပာ်(ကာလုံ) ဂှ်ဏောၚ်။ တုဲတှ်ေ ပရေၚ်အုပ်ဓုပ်၊ ပရေၚ်ခၞံသၞောဝ်၊ ပရေၚ်စဳရေၚ်ဂဗုတ်တံဂှ််လေဝ် ညးရ ကောပ်ကာဲတုဲ ညးပၠန်ရ ဒးခါန်ကၞက်ပ္တိုန် (ကာလုံ) တၟိ။ ကဝ်မယှေန်ဂှ်လေဝ် ဒးပ္တိုန်တၟိဏောၚ်။ တုဲမှ နူကဵုကဝ်မယှေန်ဂှ် ဒးကၠောန်ပေါဲရုဲမာဲ အပ္ဍဲပွိုၚ်တြဴဂိတုဏောၚ်။ နူကဵုသ္ကိုပ်က္ဍိုက်ပ်ကာစဵုဒၞါဏံဂှ် ပ္ဍဲတ္ၚဲဒုၚ်စဳရေၚ် (ပ္ဍဲကောံဓရီုဂီုကၠီုစဵုဒၞါ) ဂှ်ရ လလောၚ်တြး ဒဒှ်ရပလီုကၠေံ (အကာဲအရာကာမံက်တိုန်) တုဲ အပ္ဍဲပွိုၚ်တြဴဂိတု ဒးကၠောန်ပေါဲရုဲမာဲဏောၚ်။ အရာတံဏံဂှ် ဒှ်အရာစၞောန်ပျးလဝ် ပ္ဍဲသၞောဝ်ဥပဒေရ” သာ်ဝွံ သ္ဂးရ။
အတိုၚ်သၞောဝ်သ္ဇိုၚ်ဒက်ပ္တန်ဂှ် ယဝ်လလောၚ်တြးကၠုၚ် ဒဒှ်ရရုပ်သီကၠေံ အကာဲအရာကာမံက်တိုန် ပ္ဍဲဂိတုဂျူလာၚ် ၃၁ တေံဂှ်မ္ဂး ဒက်ပ္တန်အလဵုအသဳကောန်အရာပ်မွဲတုဲ ကဝ်မယှေန်ပေါဲရုဲမာဲဂှ်လေဝ် ဒးဒက်ပ္တန်တၟိဏောၚ်ဂှ် ဥူကျဳမျေတ် ဆက်ဟီုရ။
ဆ္ဂး အပ္ဍဲပရေၚ်သီအဝဵု ပွိုၚ်ပန်သၞာံပြၚ်ဏံ နကဵုက္ဍိုပ်သ္ကိုပ်ပၞာန် သ္ပဒၟံၚ်အပြံၚ်အလှာဲ ကောန်ဂကောံကံၚ်ဇြဳပၞာန် မွဲဏှမွဲဏှဂှ် ဒဒှ်ရအလဵုအသဳအကြာဂှ်လေဝ် ဆက်ကၠောန်အာ နကဵုကောန်ဂကောံလၟုဟ်ဂွံဂှ် ညးထံက်ထ္ၜးလဝ်ရ။
က္ဍိုပ်သ္ကိုပ်ပၞာန်ဂှ်တှ်ေ နကဵုညး ကေတ်လဝ်တာလျိုၚ်ကၟိန်ဍုၚ် ဗွဲမဗဗွဲကဵုသၞောဝ်သ္ဇိုၚ်ဒက်ပ္တန် ၂၀၀၈ ဂှ်ရ ဒးဂါံကွာ်အာ သၞောတ်ဒဳမဝ်ကရေဇြဳဗော်ဇဳ အရာညးဍုၚ်ကွာန်တံ မၞုံပၟိက်ဂှ်တွဵုဏောၚ် ဟီုရ။ ဟိုတ်ဂှ်ရ အတိုၚ်တၚ်ရန်တၟံတမ်မူလတေံရ ဒးကၠောန်အာပေါဲရုဲမာဲဏောၚ်ဂှ် ဟီုဏာလဝ် ပ္ဍဲကောံဓရီုပညဳကမၠောန် ဂကောံအလဵုအသဳကံၚ်ဇြဳပၞာန်ရ။
ညးလ္ၚတ်ဂမၠိုၚ်ဂှ်တှ်ေ သွက်ဂွံသောၚ်ကလး အကြေပ်အဂြတ် မက္တဵုဒှ်ကၠုၚ် နူကဵုပရေၚ်သီအဝဵုဂှ်တုဲ ကၠောန်ဗဒှ်ပေါဲရုဲမာဲ နဒဒှ်ပၞော်တိတ်ပရေၚ်ဍုၚ်ကွာန်ဂှ်ဝွံ ဒှ်သွက်အဝဵုဂွံတန်ကြန်ဏောၚ်တုဲ သီုကဵုထ္မံက်ရုပ်ရဴ သွပ်လ္ပအ်ဂွံဒှ်သမ္မတဏောၚ်ဂှ် သ္ၚဳဂၠိပ်လဝ်ရ။
အတိုၚ်သၞောတ်ရုဲစှ်သမ္မတဂှ်မ္ဂး ညးမဒှ်ဒုသမ္မတ နူကဵုဂကောံပိဂကောံ မရုဲစှ်ပ္တိုန်လဝ် ပါလုပ်သီုကဵုဒပ်ပၞာန်ဂှ် မွဲတၠတုဲမွဲတၠ အခါကဵုမာဲရုဲစှ်မ္ဂး အတိုၚ်လဝေၚ်ဇာတ် မလးလဝ်ဂှ် က္ဍိုပ်သ္ကိုပ်ပၞာန် ဒှ်ကၠုၚ်သမ္မတဏောၚ် ဥူကျဳမျေတ် သ္ၚဳဂၠိပ်လဝ်ရ။
“ အတိုၚ်သၞောတ်ရုဲစှ်သမ္မတဂှ်မ္ဂး နူကဵုကၠတ်ထဝ်ဂှ် ဒးပ္တိုန်ဂလာန် သီုသမ္မတပိတၠဂှ်ဏောၚ်။ ညးစၞးနူဒပ်ပၞာန်ဂှ်တှ်ေ ညးမပ္တိုန်ဂလာန်မာန် နူဒပ်ပၞာန်ဂှ်မွဲတၠ၊ ပ္ဍဲကဵုညးမရုဲစှ်ပ္တိုန်လဝ်ဂှ်မွဲတၠ၊ ပ္ဍဲကဵုညးဟွံဂွံဒုၚ်ရုဲစှ်ပ္တိုန်လဝ်ဂှ်မွဲတၠ အာအတိုၚ်ဏံရ။ နူကဵုဒပ်ပၞာန်ဂှ်တှ်ေ မေန်အံၚ်လှာၚ်ရ ဒှ်အလံၚ်ဒုသမ္မတ မရုဲစှ်ပ္တိုန်လဝ်၊ နူကဵုပိတၠဏံရ ဒးကလေၚ်ကဵုမာဲဏောၚ်ဟီုတှ်ေ မေန်အံၚ်လှာၚ်ရဏောၚ်ဂွံ။ အတိုၚ်လဝေၚ်ဇာတ် ညးတံမလးလဝ်ဂှ်ရ အတိုၚ်သၞောဝ် ၂၀၀၈ မ္ဂး မေန်အံၚ်လှာၚ်ရ ဒှ်သမ္မတ ဗွဲစၟတ်ဏောၚ်” သာ်ဝွံ သ္ဂးရ။
အတိုၚ်သၞောဝ်ပ္တိုန်စရၚ်ဗော်ပရေၚ်ဍုၚ်ကွာန် ကံၚ်ဇြဳပၞာန် မစၞောန်ပျးလဝ်ဂှ်မ္ဂး ပ္ဍဲကဵုဗော်မစန်ဒက်အာ အလုံဍုၚ်မွဲဂှ် သီုကဵုဗော်ကျဖောအ် မဒှ်ဗော်ဒပ်ပၞာန်နွံလက္ကရဴဂှ်မပါလုပ် ဗော်ပရေၚ်ဍုၚ်ကွာန် နွံ ၉ ဗော်ဓဝ်ရ။
မွဲလ္ပာ်ဂှ်ပၠန် အတိုၚ်သၞောဝ်သ္ဇိုၚ် ၂၀၀၈ မ္ဂး ညံၚ်ဒပ်ပၞာန် ဂွံထိၚ်ဒက်အလဵုအသဳမာန်ဂှ် ကဵုလဝ်က္ဍိုပ်တုဲ သၞာဲဒဴလလ္ပာ်ပၞာန် မဂွံဒုၚ်ရုဲစှ်လဝ်ဟွံသေၚ် ၂၅ တၟံကၠံဂှ်ဝွံ ကဵုလဝ်ဒၞါဲ ပ္ဍဲကၠတ်ထဝ်ကၟိန်ဍုၚ် နဒဒှ်ဒၞါဲတၞဟ်ခြာရ။
နကဵုကံၚ်ဇြဳပၞာန် အခိၚ်လၟုဟ် ဟိုတ်နူပေါဲဗ္တိုက်ရပ်လွဟ် ထပိုတ်ရိုဟ်ကၞက်သၞောတ်တၠအဝဵုပၞာန်ဂှ်တုဲ နဗ္ၜတ်အလုံဍုၚ်မွဲဂှ် ကၠောန်ဗဒှ်ပေါဲရုဲမာဲဟွံဂွံတုဲ ဒးဗလးလဝ်တိဍာ် ဗွဲမဂၠိုၚ်ရ။
စပ်ကဵုပရေၚ်ဏံတုဲ က္ဍိုပ်သ္ကိုပ်ပၞာန်ဂှ်တှ်ေ ပ္ဍဲကဵုပေါဲရုဲမာဲတုဲကၠုၚ် သီုပိဝါဂှ် ဂွံကၠောန်ဗဒှ်ကၠုၚ်လဝ် တၟံကၠံပေၚ်ၚ် ဟွံမွဲပုဟ်ဂှ် ကလေၚ်ခၠေဝ်လဝ်ကီုလေဝ် လ္ဂောံကဵုအကာဲအရာလၟုဟ်မ္ဂး ပ္ဍဲကဵုပွိုၚ်ဍုၚ်ဂမၠိုၚ်ဂှ် ၜိုတ်ပိဂအုံ မွဲဂအုံရဏောၚ် ကၠောန်ဂွံဂှ် ညးလ္ၚတ်ဂမၠိုၚ် ထံက်ထ္ၜးလဝ်ရ။
ယဝ်ကလေၚ်ရံၚ်အာ နကဵုသၞောဝ်သ္ဇိုၚ် ၝောံပိုဒ် ၈၅၊ ၝောံပိုဒ် ၁၂၈၊ ၝောံပိုဒ် ၁၅၅ တံဂှ်မ္ဂး ညံၚ်ပေါဲရုဲမာဲဂွံတုဲဒှ် ရေၚ်တၠုၚ်မာန်ဂှ် ဂွံဆဵုကေတ်ရောၚ် က္ဍိုပ်သ္ကိုပ်ပၞာန် ထပ်ဟီုလဝ်ရ။
ၝောံပိုဒ်တံဏံဝွံ ပ္ဍဲကဵုကောံဓရီု သီုကၠတ်ထဝ်ပိတန် တ္ၚဲပထမဂှ် ပ္ဍဲကဵုလၟိဟ်ညးစၞး ဂွံအခေါၚ်တိုန်စိုပ်ဂမၠိုၚ် ၜိုတ်ကဝက်ပြၚ် ယဝ်တိုန်စိုပ်ကၠုၚ်မ္ဂး ကောံဓရီုအံၚ်ဇၞးဏောၚ်တုဲ ယဝ်ပဆုဲမ္ဂးလေဝ် ဗွဲတွဵုမအောန် ညးစၞး ပိဂအုံမွဲဂအုံ တိုန်စိုပ်မ္ဂး အံၚ်ဇၞးဏောၚ်ဂှ် ထ္မံက်ထ္ၜးလဝ်ရ။
ဂွံကၠောန်ဗဒှ်ပေါဲရုဲမာဲမာန် ပရေၚ်ဂီုကၠီုကဵု ပရေၚ်ညိၚ်ဝတ်ဂှ်ဝွံ ဒှ်အဓိကတုဲ ညံၚ်ဒၞါဲမကၠောန်ပေါဲရုဲမာဲဂွံသီုဖအိုတ် ဂွံညိၚ်ဝတ် သွက်ဂွံရေၚ်တၠုၚ်အာဂှ် ဒုက္ဍိုပ်သ္ကိုပ်ပၞာန် စၞောန်ကၠုၚ်လဝ် ပ္ဍဲကောံဓရီုပညဳကမၠောန် တ္ၚဲဒုတိယရ။
အကြာဒပ်ဇြေယျ သ္ပလဝ်ဇြဳဒဳအာမ် နူဒပ်ကျာဂှ်တှ်ေ နကဵုကံၚ်ဇြဳပၞာန် ကၠာပေါဲရုဲမာဲဏံ ညံၚ်ဍုၚ်ညံၚ်ကွာန်ဂမၠိုၚ် ဟွံဂွံစှ်ေအာဂှ် ၜိုတ်ဂွံဂှ် ဂလိုၚ်ပ္တိုန်သ္ပကၠုၚ် သီုကဵုပၞာန်ထ္ပက် သီုကဵုပၞာန်ကျာတံမာန်ရောၚ် သ္ၚဳဂၠိပ်လဝ်ရ။
“ကၠာပေါဲရုဲမာဲဏံဂှ်တှ်ေ ဍေံတံဂွံထ္ပက်ပၞာန် သ္ကာတ်တ်မြဟ်ဟ်ဂှ် နူကၠာတေံ ဍေံတံဖျေံလဝ်ဗျူဟာနွံ။ အေ ဂှ်တှ်ေ ဗွဲအဓိက အခိၚ်ကသီုမ္ဂး ညံၚ်ဍုၚ်ညံၚ်ကွာန် ဗ္ဒိုပ်ဍေံတံ ဟွံဂွံကလေၚ်စှ်ေအာဂှ် အစဳဇန်ဂွံကလေၚ်ကၠောန်ဂှ်နွံ။ ၜိုတ်ဍေံတံကေတ်မာန်ဂှ် ကၠောန်ဏောၚ်ဟီုမ္ဂး ပရေၚ်ဗ္တိုက်ဂမၠိုၚ် သာတုဲသ္ကာတ်မြဟ်ကၠုၚ်ဏောၚ်။ ပရေၚ်ဗ္တိုက်ကဵုပၞာန်ကျာကီု ပရေၚ်ဗ္တိုက်တံကီုဂှ် သာတုဲဂၠိုၚ်ကၠုၚ်ဏောၚ်” သာ်ဝွံ သ္ဂးရ။
ပေါဲရုဲမာဲကံၚ်ဇြဳပၞာန် မကလိဂွံလဝ် ပရေၚ်ထံက်ဂလာန် နူကဵုက္ဍိုပ်သ္ကိုပ်ကၟိန်ဍုၚ်လ္ၚဵု ပါလုပ်သီုကဵု ဍုၚ်ကြုက်ဂှ်ဝွံ ရန်လဝ် သ္ဂောံကၠောန်ဗဒှ်အာ ပ္ဍဲဂိတုဒဳဇြေမ်ဗာဏောၚ်ကီုလေဝ် ဟွံဂွံလလောၚ်ပ္တိတ် သၞောဝ်ဥပဒေ၊ နဲသၞောဝ်ဥပဒေ စပ်ကဵုပေါဲရုဲမာဲတံဂှ်ဏီရ။
ကဝ်မယှေန်ဂှ်တှ်ေ ကၞာတ်ဂစိုတ်လဝ်တ္ၚဲကၠောန်ဗဒှ်တုဲဂှ်ရ ဗွဲမဂတာပ်အခိၚ် လလောၚ်ပ္တိတ်ကဵုဏောၚ်တုဲ အခိၚ်စၟဳတ်စရၚ်ယၟု အလံၚ်ညးစၞးလုပ်ပြိုၚ်ပေါဲရုဲမာဲတံဂှ်တုဲမ္ဂး လလောၚ်တြးအာ ကာလစန်ဒက်မာဲဏောၚ်ဂှ် ကဵုလဝ်သမ္တီရ။
စပ်ကဵုပရေၚ်ဏံတုဲ လ္ပာ်ဗော်ပရေၚ်ဍုၚ်ကွာန်တံဂှ်တှ်ေ လ္ပာ်ကဝ်မယှေန် လလောၚ်တြးကဵု ဒေသဆန္ဒမာဲ ကၠောန်ပေါဲရုဲမာဲဂွံတံဂှ်ကၠာမှဟေၚ် ဂွံချပ်အာ သွက်ဂွံရုဲစှ်အလံၚ်ညးစၞး၊ သွက်ဂွံစန်ဒက်မာဲ သီုကဵုပရေၚ်ဂီုကၠီုတံဏောၚ်ဂှ် သ္ဂးရ။
NUG ကေုာံ NUCC ဂှ်တှ်ေ ပ္ဍဲပေါဲရုဲမာဲဟွံလုပ်သၞောဝ် မဟွံဍိုက်ပေၚ်ကဵုသၞောဝ်အစာံ မကၠောန်သ္ပအာ ညံၚ်သၞောတ်တၠအဝဵုပၞာန် အာယုက်ဂွံဂၠိၚ်ဏံဂှ် နကဵုဗော်ပရေၚ်ဍုၚ်ကွာန် မပ္တိုန်လဝ်စရၚ်ဂမၠိုၚ် လ္ပပါလုပ်ညိဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− MOI

