ဂျဳနဳဗာ၊ မေ ၂၂
ပ္ဍဲအကာဲအရာကြပ်ဒးဗလးဒၟံၚ်တဲ ဍုၚ်အမေရိကာန် မဒှ်ဍုၚ်တၠဒါန်ကဆံၚ်လ္တူဂှ် အခိၚ်ပ္တိတ်ဒၟံၚ်ဇြဟတ် ဂွံဂွံသြန်ဗွဝ်ဂှ် ပ္ဍဲကောံဓရီုပရေၚ်ထတ်ယုက်ဂၠးတိ မကၠောန်ဗဒှ်လဝ် ပ္ဍဲဂိတုမေ ၂၀ ဂှ် သွက်ပွိုၚ် ၅ သၞာံဂတဏံဂှ် ဍုၚ်ကြုက် ထပ်ကဵုအာ ဂကောံပရေၚ်ထတ်ယုက်ဂၠးတိ WHO ၅၀၀ ပြကောဋိကိုဋ်ပၠန်ဏောၚ် မဒှ်ရ။
အပ္ဍဲကဵုဂလာန် မဟီုလဝ် ပ္ဍဲဍုၚ်ဂျဳနဳဗာဂှ် အထံက်သ္ကိုပ်ဝန်ဇၞော် ကံၚ်ဇြဳဍုၚ်ကြုက် လွဳကျိုဝ်ကျုၚ်ဂှ် လလောၚ်တြးကၠုၚ်လဝ် သာ်ဏံရ။
အခါလၟုဟ် ဂၠးတိဝွံ ဒးဆေၚ်ဒၟံၚ်မုက်ကဵု ပရေၚ်ဇီုကပိုက် နူဍုၚ်မစကာဒြဟတ်တအ် မွဲလ္ပာ်တံဂှ်တုဲ သွက်ဂီုကၠီုပရေၚ်ထတ်ယုက် အလုံဂၠးမွဲဂှ် ဒးဆေၚ်ဒၟံၚ်မုက်ကဵု တၚ်ကော်ဆဴဇၞော်ကဵုဇြဟတ်တုဲ ဍုၚ်ဂမၠိုၚ် ပါလုပ်မှဟေၚ် တတ်ကၠောံ အခက်အခုဲတံဏံမာန်ရောၚ်ဂှ် အထံက်သ္ကိုပ်ဝန်ဇၞော် လွဳ ဟီုလဝ် ကုညးစၞးဂမၠိုၚ်ရ။
ဟိုတ်နူတၚ်သ္ဂုတ်သွာတ် အလဵုအသဳဒဝ်နေဝ်ထြာမ်တုဲ အခက်အခုဲပရေၚ်ဘဏ္ဍာ မက္တဵုဒှ်ကၠုၚ် အဓိကဂှ်ရ WHO ကလေၚ်ဖအောန်ဖျေံလဝ် သြန်ဗာတ်ဂျက် ၂၀၂၆−၂၀၂၇ စဵုကဵု ၂၄ တၟံကၠံ၊ ၄ ဒဿမ ၂ ဗဳလျာန်ဒဝ်ဠာရ။
အတိုၚ်သြန်ဗာတ်ဂျက်တၟိ နူကဵုကောံဓရီု မသ္ဂုတ်သွာတ်လဝ် ပ္ဍဲဂိတုမေ ၂၀ ဂှ်မ္ဂး အပ္ဍဲပွိုၚ်ၜါသၞာံဂတဏံ လၟိဟ်သြန်ဍုၚ်ဂမၠိုၚ် မဒးစုတ် ဟွံဒေါအ်ဟွံဂွံဂှ် သၠုၚ်ပ္တိုန်အာ ၂၀ တၟံကၠံဏောၚ်တုဲ ဍုၚ်ကြုက်ဝွံ ဒှ်ကၠုၚ်ဍုၚ်စုတ်သြန်မဒါန် ဂၠိုၚ်အိုတ်ရ။
ဆ္ဂး သြန် ၅၀၀ ပြကောဋိကိုဋ်ဒဝ်ဠာ ကြုက် မလလောၚ်တြးလဝ်ဂှ်ဝွံ ပ္ဍဲကဵုမဒါန်သြန် မသၠုၚ်ပ္တိုန်လဝ်ဂှ် ပါလုပ်တုဲယျဟာ၊ ဟွံဂွံပါလုပ်ဏီဟာဟီုဂှ် ဟွံဂွံတီကေတ် သောၚ်ၚ်ကၠးကၠးရ။
Ref: Reuters