ၜဳကလေၚ်၊ မေ ၂၃
တွဵုရးဍုၚ်မန် ပွိုၚ်ဍုၚ်ၜဳကလေၚ် ပ္ဍဲကွာန်(ပဏ္ဍိကုန်း)ဂှ် ဟိုတ်နူဒပ်ကံၚ်ဇြဳပၞာန် ပန်ကဵုလွဟ်ဇၞော်တုဲ ညးဗြဴမွဲတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။
ပ္ဍဲဂိတုမေ ၂၁ အခိၚ်ဇိုၚ်သဝ်တ္ၚဲ ၜိုတ် ၈ နာဍဳ တုဲကၠုၚ်တေံဂှ် နူတမ်ဒပ်ကံၚ်ဇြဳပၞာန် ခမရ စၟတ် ၃ ဖျေံသ္ဇိုၚ်ၜဳကလေၚ်ဂှ် ပေါဲဗ္တိုက်ဟွံမွဲမွဲသာ် ပန်ပှော်လဝ် လွဟ်ဇၞော်ဟွံအောန်နူၜါမ အပ္ဍဲကွာန်(ပဏ္ဍိကုန်း) ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ညးမဒှ်တၠသ္ၚိ ဒဝ်အေနာၚ် အာယုက် ၄၀ သၞာံဂှ် ချိုတ်အာ ပ္ဍဲဒၞါဲဒှ်ပရူဂှ်တုဲ ကောန်ၚာ်သၟတ် အာယုက် ၁၁ သၞာံ မွဲတၠကဵု ညးဗြဴ ဇီုကပိုက်ကလိဂွံလဝ်ဝပ်ရ။
အပ္ဍဲပရေၚ်ဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်ဂှ် သ္ၚိၜါမ ဇီုကပိုက်လီုလာ်အာလဝ်တုဲ ညးဍုၚ်ကွာန်ဒေသလ္ၚဵု ဒးပါဲဒလေတ်လဝ် နွံဒၟံၚ်ရောၚ် ဂွံတီကေတ်ရ။
ပ္ဍဲကွာန်(ပဏ္ဍိကုန်း) ဒပ်ကံၚ်ဇြဳပၞာန် ပန်နၚ်လွဟ်ဇၞော်ဂှ် ပေါဲဗ္တိုက်ဟွံမွဲတုဲ ဒပ်ပၠန်ဂတးတံ ဖျေံလဝ်ဒပ်လေဝ် ဟွံမွဲပုဟ်ဂှ် ညးဒေသတံ ဟီုရ။
ပ္ဍဲဂိတုဨပရဴ ၁၉ တုဲကၠုၚ်တေံဂှ်လေဝ် ဘာလကျာ် ကွာန်မေန်သဝ် ပွိုၚ်ဍုၚ်ၜဳကလေၚ် တွဵုရးမန် ဒးဒုၚ်ထောံဂြာတ်မခတိုဟ်တုဲ ကောန်အရာပ်ၜါတၠ ချိုတ်တုဲ ၁၀ တၠပြၚ် ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− KHRG