ကအ်ကြိက်၊ မေ ၂၃
အလုံဍုၚ်မွဲ သၞာံဏံ အပ္ဍဲပွိုၚ်မသုန်ဂိတုဂှ် ဟိုတ်နူကံၚ်ဇြဳပၞာန်တုဲ နူကဵုသွာၚ်ပညာဂှ် အ္စာ၊ အ္စာၝောံ၊ ကွးဘာ အပံၚ်ဖအိုတ် ၅၀ တၠ ဒးချိုတ်အာလဝ်ရောၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ် ပ္ဍဲဂိတုမေ ၂၁ တေံရ။
သၞာံဏံ နူဂိတုဂျာန္နဝါရဳ ၁ စဵုကဵုဂိတုမေ ၂၁ အလုံဍုၚ်မွဲဂှ် ဟိုတ်နူဂကောံပၞာန်တုဲ အ္စာ၊အ္စာၝောံ၊ ကွးဘာ နူကဵုသွာၚ်ပညာဂှ် မၞိဟ်ဗြဴ ၃၁ တၠကဵု မၞိဟ်တြုံ ၁၈ တၠ အပံၚ်ဖအိုတ် ၅၀ တၠဒးချိုတ်အာလဝ်ရောၚ် သ္ပဒတန်ကၠုၚ်လဝ်သီုကဵုယၟုယၟာဂမၠိုၚ်ရောၚ် သ္ဂးရ။
ပ္ဍဲကဵုဏံ ကောန်ၚာ်သၟတ် သၟဝ်အာယုက် ၁၈ သၞာံ ၃၈ တၠ ပါလုပ်တုဲ ပ္ဍဲကဵုညးဒးပြဟ်လလုဲအာဂမၠိုၚ် ၄၀ တၠဝွံ ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ဒးချိုတ်အာလဝ် ဂၠိုၚ်အိုတ်တုဲ ဟိုတ်နူပန်ပှော်ဗ္တိုက်ကဵုလွဟ်ဇၞော်တုဲ ၄ တၠ ချိုတ်အာလဝ်ရ။
ပ္ဍဲဂိတုမေ ၁၉ ဂှ်လေဝ် ပ္ဍဲတွဵုရးကရေၚ် ဍုၚ်ကြုၚ်ဒဵုဂှ် အ္စာဘာ CDM မွဲတၠ စဴကၠုၚ်သ္ၚိမွဲလစုတ် မၞုံယၟု ဥူတိတ်ဥူဝွံ ဟိုတ်နူလွဟ်ဇၞော် ဒပ်ကံၚ်ဇြဳပၞာန်တုဲ လမျီုဒးအိုတ်အာလဝ်ရောၚ် ထ္မံက်ထ္ၜးလဝ်ရ။
အတိုၚ်တၚ်နၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP တံဂှ်မ္ဂး အပ္ဍဲကာလသီအဝဵု ပွိုၚ်ပန်သၞာံပြၚ််ဏံ ဟိုတ်နူကံၚ်ဇြဳပၞာန်ကဵု ကောန်ရဲတဝ်ခွါဂမၠိုၚ်တုဲ ညးဍုၚ်ကွာန် ၆၇၁၀ တၠ ဒးချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ

