ကျာ်ထဝ်၊ မေ ၂၃
ဒပ်ကံင်ဇြဳပၞာန် မထ္ပက်ကၠုၚ်ကရောၚ်ပၞာန် ပ္ဍဲကွာန်ဝေန်ကာန် ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် လုပ်ကၠတ်ဂၠံက်လဝ် သ္ၚိဂၠိုၚ်ကဵုကၠံရောၚ် ပဒိုဝ်သဝ်အေနာၚ် ညးအုပ်ကာ ခရိုၚ်သဓီု ဗော်သွးကောန်ဂကူကရေၚ် KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဇြဟတ် ၁၀၀ ပြၚ်ပါဂှ်ဝွံ စနူဂိတုမေ ၁၆ တုဲ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ဝေန်ကာန်တုဲဂှ် ဖျေံလဝ်ဒပ် ပ္ဍဲသ္ၚိ ကေုာံ ပ္ဍဲဘာလကျာ်ဂမၠိုၚ်ရ။
ကရောၚ်ပၞာန်ဏံဝွံ အခိၚ်လၟုဟ် လုပ်ကၠတ်ဂၠံက်ဒၟံၚ် သ္ၚိနွံပ္ဍဲကွာန်ဝေန်ကာန် ဂၠိုၚ်ကဵုကၠံဂှ်တုဲ ကေတ်ဏာလဝ် ကပေါတ်မၞုံကဵုၚုဟ်မးဂမၠိုၚ် ပါလုပ်သီုကဵုကပေါတ်ကညောတ်သ္ၚိဂမၠိုၚ်ရောၚ် သ္ဂးရ။
ကရောၚ်ပၞာန်ကံၚ်ဇြဳပၞာန် မလုပ်ကၠတ်ဂၠံက်ဒၟံၚ်သ္ၚိဂမၠိုၚ်ဝွံ ပ္ဍဲဂိတုမေ ၂၀ တေံဂှ်လေဝ် စံၚ်ဏာလဝ် သ္ၚိမသုန်မ ပါလုပ်သီုကဵုသ္ၚိ ညးမဒှ်မိ သ္ကိုပ်အုပ်ဓုပ်ကွာန်ဝေန်ကာန် (ဇဖားဇီးကွက်) တိဍာ် KNU ဂှ်ရောၚ် ဂွံတီကေတ်ရ။
ကရောၚ်ပၞာန်ကံၚ်ဇြဳပၞာန်ဝွံ ဒဵုကဵုအခိၚ်လၟုဟ် ဟိုတ်နူဆက်ဖျေံလဝ်ဒပ် အပ္ဍဲကွာန်ဝေန်ကာန်ဂှ်ရ လၟိဟ်သ္ၚိဒးဒုၚ်လုပ်ကၠတ်ဂၠံက်တံကဵု ၚုဟ်မးကပေါတ် မဒးဆောံလေၚ်အာတံဂှ် ဟွံဂွံကၠောန်စရၚ်ဏီပုဟ်ဂှ် ဂွံတီကေတ်ရ။
ပ္ဍဲကွာန်ဝေန်ကာန် ကရောၚ်ပၞာန်ကံၚ်ဇြဳပၞာန် မဖျေံလဝ်ဒပ်ဂှ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်တုဲ အခိၚ်ဟွံရုဲ ပေါဲဗ္တိုက်သ္ကာတ်မြဟ်ကၠုၚ်မာန်ရောၚ် ဂွံတီကေတ် အတိုၚ်ဂလာန် ဂကောံဇြဟတ်ပၠန်ဂတးတံရ။
ပ္ဍဲပွိုၚ်ဍုၚ်ကျာ်ထဝ်ဂှ် စနူဂိတုမေ သတ္တာဟပထမတုဲ ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ်ကီု၊ သီုကဵုပန်ကဵုလွဟ်ဇၞော် ဗ္တိုက်ကၠုၚ်ကဵုပၞာန်ကျာဂှ်တုဲ ညးဍုၚ်ကွာန်ဒေသ ၁၇၀၀၀ ပြၚ် ဒးပါဲဒဴမံၚ်ဘဲပၞာန်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ