မတ်မလီု၊ မေ ၂၃
ပၞောဝ်ကဵုဒေသကောန်ဍုၚ်အရၚ်ဂမၠိုၚ် ပ္ဍဲတွဵုရးဍုၚ်မန် မဟွံဒးဆောံလေၚ် ဗ္ဒိုပ်ဒပ်၊ ဌာန်ဂအုပ် ကံၚ်ဇြဳပၞာန်တံဏီဂှ် သွက်ပေါဲရုဲမာဲ မကၠောန်ဗဒှ်အာဏံ ညံၚ်ပရေၚ်ညိၚ်ဝတ်ဂွံနွံဂှ် သၠုၚ်ပ္တိုန်ပရေၚ်ဂီုကၠီုမာန်ရောၚ် ညးလ္ၚတ်ဂမၠိုၚ်ကဵု ဂကောံပၠန်ဂတးတံ ဟီုရ။
ပ္ဍဲကောံဓရီုပညဳကမၠောန် ဂကောံအလဵုအသဳကံၚ်ဇြဳပၞာန် ပ္ဍဲဂိတုမေ ၂၀ ဂှ် ဒုသ္ကိုပ်ဗိုလ်ဇၞော် သဵုဝေန် ဟီုဏာလဝ် ဒဒှ်ရကၠောန်ဗဒှ်ပေါဲရုဲမာဲ ကၞောတ်သၞာံဏံဂှ်ရ နကဵုသ္ကိုပ်ဝန်ဇၞော်ရးဒေသ ကေုာံ တွဵုရးဂမၠိုၚ် သွက်ဂွံဒစးဒုၚ်ပလေတ်ပလေတ်အာ အရာမနွံပၟိက် ညံၚ်ပေါဲရုဲမာဲဂွံအံၚ်ဇၞးတံဂှ်ရ။
သ္အာၚ်နူဂှ်ပၠန် သွက်ဂွံကၠောန်ဗဒှ်ပေါဲရုဲမာဲဂှ် ပရေၚ်ဂီုကၠီုကဵုပရေၚ်ညိၚ်ဝတ်ဝွံ ဒှ်အဓိကတုဲ ဒၞါဲကၠောန်ပေါဲရုဲမာဲဂွံသီုဖအိုတ် ညံၚ်ဂွံၜိုဟ်သြိုဟ်ညိၚ်ဝတ်ဂှ် စၞောန်ကၠုၚ်လဝ်ရ။
တွဵုရးဍုၚ်မန် ပေါဲဗ္တိုက်သီဗ္ဒိုပ်သီဍုၚ် ဟွံဂွံဒှ်ဏီဂှ်ဝွံ ညံၚ်ရဴဒေသတၞဟ်ဟ်တံဂှ် ပေါဲဗ္တိုက်ရပ်လွဟ် ဟွံသ္ကာတ်မြဟ်ဂှ်ရ ၜိုတ် ၇၀ တၟံကၠံဂှ် ကၠောန်အာပေါဲရုဲမာဲဂွံဏောၚ် မဒှ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် ပအဓိကကဵု တွဵုရးဍုၚ်မန်တုဲ ပတေၚ်ဂြတ်ကၠုၚ်ပရေၚ်ဂီုကၠီုမာန်ဂှ်ရ ဒှ်အခိၚ်ကာလဗြဲကီုလေဝ် ၚးတးကၠုၚ်တိဍာ်မာန်ရောၚ် ဟီုရ။
“ယဝ်ကၠောန်ဗဒှ်ပေါဲရုဲမာဲမ္ဂး စနူအခိၚ်ဗြဲဏံဂှ် ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် မာန်ဏောၚ်။ ကၠောန်ကၠုၚ်ပရေၚ်ၚးတးတိဍာ်တံဏောၚ်။ ဟိုတ်ဂှ်ရ ပ္ဍဲတွဵုရးဍုၚ်မန် ဗွဲတၟေၚ် လ္ပာ်ပွိုၚ်ဍုၚ်ရေဝ်ကဵု ပွိုၚ်ဍုၚ်ဇြပ်ဗုဂှ် ကံၚ်ဇြဳပၞာန် ထပ်ဗပေၚ်လဝ်ဇြဟတ်ကောန်ဒပ် နကဵုကောန်ပၞာန်စှ်ေနူတန်ဗ္တောန်တၟိတၟိတံဂှ် ပိုယ်တံ ဂွံမိၚ်ကေတ်ရ” သာ်ဝွံ သ္ဂးရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF မလလောၚ်တြးလဝ် ပ္ဍဲကၞောတ်သၞာံတုဲတေံဂှ်မ္ဂး ပ္ဍဲတွဵုရးဍုၚ်မန်ဂှ် ပေါဲဗ္တိုက်သီဗ္ဒိုပ် ဟွံဂွံဒှ်ကၠုၚ်ဏီတုဲ ယဝ်ဆက်အာ အတိုၚ်အကာဲအရာလၟုဟ်ရမ္ဂး ကံၚ်ဇြဳပၞာန် ကၠောန်ကၠုၚ်ပေါဲရုဲမာဲ လှဲလှဲလးလးမာန်ဏောၚ် သ္ၚဳဂၠိပ်လဝ်ရ။
အခိၚ်လၟုဟ်ဂှ်လေဝ် ပ္ဍဲတွဵုရးဍုၚ်မန်ဂှ် ပ္ဍဲပွိုၚ်ဍုၚ်ဂမၠိုၚ် နူသ္ကုတ်သၠုၚ်ကျာ ပါလုပ်သီုကဵု ခရိုၚ်သဓီု မဒှ်ဒၞါဲဂကောံဇြဟတ်ပၠန်ဂတးတံ ချဳဒရာၚ်မံၚ်ဂှ် ဝေၚ်ကၠုၚ်ပေါဲဗ္တိုက်ဇၞော်ဇၞော် ဟွံမွဲဏီဂှ်ရ ပရေၚ်ကံၚ်ဇြဳပၞာန် အုပ်ဓလီုတိဍာ်ဂှ်လေဝ် ဟွံယအ်စှ်ေအာရ။
ပ္ဍဲဗ္ဒိုပ်ဒပ်လ္ၚဵုတံဂှ်တှ်ေ ဒပ်ပၠန်ဂတးတံ ဗ္တိုက်ကၠုၚ် နနဲဓလုက်တံ နွံတုဲ လ္ပာ်ကံၚ်ဇြဳပၞာန်ဂှ်လေဝ် ပ္ဍဲကွာန်လ္ၚဵုတံဂှ် ထ္ပက်ကရောၚ်ပၞာန် လုပ်စိုပ်ကၠုၚ် နကဵုဇြဟတ်လၟိဟ် ဗွဲမဂၠိုၚ်ဂၠေၚ်နွံတုဲ ဗ္တိုက်ကၠုၚ်ကဵုလွဟ်ဇၞော် ကေုာံ ပၞာန်ကျာတံလေဝ် နွံဒၟံၚ်ရ။
ဒှ်သာ်ဂှ်ရ ယဝ်ကလေၚ်ရံၚ် လိက်ဒုၚ်စဳရေၚ် NRFF ဂှ်မ္ဂး ပ္ဍဲပွိုၚ်ဍုၚ်မတ်မလီု၊ ပွိုၚ်ဍုၚ်ၜါသွာၚ် ကေုာံ ပွိုၚ်ဍုၚ်ပံၚ် ဂွံကံက်လဝ်စရၚ်လၟိဟ်မၞိဟ်ပေၚ်ၚ်ဂှ် ကၠောန်ဗဒှ်ပေါဲရုဲမာဲ တၟံကၠံပေၚ်ၚ်မာန်တုဲ ပ္ဍဲပွိုၚ်ဍုၚ်သှ်ေတံဂှ်တှ်ေ နကဵုအရီုဗၚ်ဂကောံဒပ်ဂီုကၠီုတံကဵုဒှ် နကဵုစက်ကဵုမာဲ အဳလက်ထရဝ်နေတ်တံကဵုဒှ် ဒဵုကဵုဗ္ၜတ်မွဲမွဲ ကၠောန်ဗဒှ်မာန်ရောၚ် ထ္မံက်ထ္ၜးလဝ်ရ။
ပေါဲရုဲမာဲကံၚ်ဇြဳပၞာန် မကၠောန်ဗဒှ်အာ ပ္ဍဲကၞောတ်သၞာံဏံဂှ်ဝွံ ရပ်စပ်အာ နကဵုစက်ကဵုမာဲ အဳလက်ထရဝ်နေတ်ဏောၚ်တုဲ စဵုကဵုဂိတုဂျာန္နဝါရဳ သတ္တာဟဒုတိယ အပ္ဍဲပွိုၚ်မွဲဂိတုဂှ် ရန်လဝ် သွက်ဂွံကၠောန်အာ သ္ကုတ်ညးကဵုညးရ။
နာဲနဂါဂှ်တှ်ေ သၞဂှ် ကလောန်ဍေံ ဍေံဆက်ကၠောန်အာဏောၚ်တုဲ ပရေၚ်ပၠန်ဂတဂှ်လေဝ် ညံၚ်ဂွံတုပ်ကဵုပၠန်ဂတး နွံပၟိက်ဂှ်ရ ကုညးမပါလုပ် ပ္ဍဲပေါဲရုဲမာဲတံဂှ် ဟွံကေတ်လျိုၚ်ပုဟ်ဂှ် ဟီုရ။
“အခိၚ်ကသီုမ္ဂး လ္ပာ်တွဵုရးဍုၚ်မန်ဂှ် အာကၠုၚ်ဝါတ်ကီုလေဝ် လ္ပာ်သၞတအ်ဂှ် ယဝ်ဍေံတံထ္ပက်ပၞာန် အပ္ဍဲအခိၚ်ကသီုမ္ဂး လ္ပာ်ပိုယ်တံလေဝ် ဒှ်ဒၟံၚ်ဒတုဲကီုရ။ ပလေဝ်ပလေတ်လဝ်ဂှ် နွံ။ သ္အာၚ်နူဂှ်ပၠန် ဂကောံပၠန်ဂတးတံ ကဵုကတိ လလောၚ်တြးလဝ် ဒဒှ်မဒစဵုဒစးဗ္တိုက်သရိုဟ်အာ ပေါဲရုဲမာဲ တုဲဂှ်ရ သွက်ညးမပါလုပ် ပ္ဍဲပေါဲရုဲမာဲဏံ သွက်ညးမပူဗိုၚ်တအ်ဂှ် ပိုယ်တံ ဟွံကေတ်လျိုၚ်ပုဟ်ဂှ် မိက်ဂွံဟီုဏာလဝ် နူကဵုဒၞါဲဏံရ” သာ်ဝွံ သ္ဂးရ။
ပ္ဍဲတွဵုရးဍုၚ်မန်ဂှ် ဗော်ညဳသၟဟ်မန် ပ္တိုန်လဝ်စရၚ် နဒဒှ်ဗော်စန်ဒက်အာ အပ္ဍဲတွဵုရးတုဲ ဗော်ဗျဳခိုၚ်ဖျဵု ဒပ်ပၞာန်မၞုံလက္ကရဴဂှ်ကီု ဗော်ဖျေံသ္ဇိုၚ်ၝောံဍုၚ်လ္ၚဵုတံလေဝ် သ္ဂောံစန်ဒက်အာ အပ္ဍဲတွဵုရး နွံဒၟံၚ်ရ။
သွက်ဂွံကၠောန်ဗဒှ်ပေါဲရုဲမာဲဂှ် ကံၚ်ဇြဳပၞာန် ကလိဂွံလဝ် ပရေၚ်ထံက်ဂလာန် နူကြုက်ကဵုရုယှာကီုလေဝ် ဟိုတ်နူပေါဲဗ္တိုက်ရပ်လွဟ်ကဵု တိဍာ်ဒးဗလးလဝ်တဲဂမၠိုၚ်ဂှ်တုဲ ဂွံကၠောန်ဗဒှ် အလုံဗ္ၜတ်ဍုၚ်မွဲဂှ် ဝါတ်ဂါတ်တဴရ။
ညးလ္ၚတ်ဂမၠိုၚ်ဂှ်တှ်ေ နကဵုကံၚ်ဇြဳပၞာန် သွက်ဂွံလုပ်သၞောဝ်တုဲ ပ္ဍဲတိဍာ်ဍဵုဍိုက်ဂွံတံဂှ် ကၠောန်ကၠုၚ်ပေါဲရုဲမာဲ နကဵုနဲကဲနာနာသာ်မာန်ဂှ်ရ ပရေၚ်ဖံက်ပ္ကဝ်အခေါၚ်အရာမၞိဟ်တံ နွံကၠုၚ်တၟာဂလိုၚ်မာန်ရောၚ် ထံက်ထ္ၜးလဝ်ရ။
အတိုၚ်ဂလာန် နူဗွိုၚ်ဒပ်ပၞာန် သ္ပလဝ်ဇြဳဒဳအာမ်တံဂှ်မ္ဂး နကဵုကံၚ်ဇြဳပၞာန် ကၠာပေါဲရုဲမာဲဏံ ၜိုတ်ဂွံဂှ် သွက်ဂွံကလေၚ်ကေတ်အာ တိဍာ်မဒးဗလးလဝ်တဲတံဂှ်တုဲ အခိၚ်ကာလဗြဲဏံ သၠုၚ်ပ္တိုန်အသိၚ် ပၞာန်ထ္ပက်ကဵု ပရေၚ်ဗ္တိုက်ကဵုပၞာန်ကျာတံမာန်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media (File Photo)

