ဗြဝတဳ၊ မေ ၂၄
ပ္ဍဲတွဵုရးကရေၚ် ပွိုၚ်ဍုၚ်ဗြဝတဳ ဒေသဝဝ်လေဂှ် အကြာဒပ်ပံၚ်ကောံ KNLA KNDO ကဵု ဒပ်ကံၚ်ဇြဳပၞာန်တံ ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်တုဲ ဒပ်ကံၚ်ဇြဳပၞာန် ကၠုၚ်ဘိုၚ်ပန်ကဵုဒၟံၚ် ပၞာန်ကျာရောၚ် တမ်ရိုဟ်ပရိုၚ်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုမေ ၂၁ တုဲ ဒပ်ပံၚ်ကောံ ဒပ်စဵုဒၞါကောန်ဂကူကရေၚ် KNDO ၊ ဒပ်မဟာ ၆ ဒပ်ပၞာန်ဗၠးၜးကောန်ဂကူကရေၚ် KNLA တံ ရပ်စပ်ဒရုၚ်တုဲ စဗ္တိုက်ဒၟံၚ် ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်(ဘလက်ဒို၊ သေဘောဘိုး၊ မော်ခီး၊ ကနဲလေး) မၞုံပ္ဍဲဒေသဝဝ်လေ သ္ကုတ်သၠုၚ်ကျာဍုၚ်ဗြဝတဳ ဗ္ဒါဲပယျဵုသေံဂှ်ရ။
ပ္ဍဲဂိမေ ၂၃ ပေါဲဗ္တိုက်ဒှ်ဂွံ မရနုက်ကဵု ၃ တ္ၚဲဂှ် မွဲဒမြိပ်ဗ္ဒိုပ် (ဘလက်ဒို၊ ဘေဘောဘိုး) ဂှ် ဂွံမိၚ်ကေတ်ဒၟံၚ် ဗြုရမျာၚ်ပန်ပှော်ကဵု ဒဒှ်မထောံဂြာတ်မခတိုဟ်နကဵုဒရုၚ်တံဂှ်တုဲ လဒေါဝ်တ္ၚဲ ၜိုတ် ၁၂ နာဍဳဂှ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာရောၚ် တမ်ရိုဟ်ပရိုၚ်ပယျဵုဂမၠိုၚ် သ္ဂးရ။
ဟိုတ်နူပေါဲဗ္တိုက်တုဲ ကၟာတ်လဝ် ဂၠံၚ်ကွဳစက်ဇၞော် ဗြဝတဳ−ဝဝ်လေ မဆက်စၠောံလဝ် ဍုၚ်ဗြဝတဳကဵု ဍုၚ်ဝဝ်လေ ဂွံပိတ္ၚယျဂှ် ညးဒေသ မအာကၠုၚ်ဒၟံၚ် လ္ပာ်ဂၠံၚ်ဏံမွဲတၠ ဟီုရ။
ဟိုတ်နူအကာဲအရာပေါဲဗ္တိုက် မက္တဵုဒှ်လဝ် ပ္ဍဲဒေသပယျဵုဏံဂှ်တုဲ ဒပ်ပၞာန်သေံဝွံ သၠုၚ်ပ္တိုန်ဂီုကၠီုပယျဵု ဖျေံလဝ်တုဲ မၚ်ရံၚ်ဒၟံၚ် ပွိုၚ် ၂၄ နာဍဳရောၚ် တမ်ရိုဟ်ပရိုၚ်ပယျဵုဂမၠိုၚ် ထ္မံက်ထ္ၜးလဝ်ရ။
ဗွဲဒိုဟ်သၠုၚ်ကျာ ဍုၚ်ဗြဝတဳ တိဍာ်ဒပ်မဟာ ၆ KNU ဂှ် ဍုၚ်ဝဝ်လေကဵု ဍုၚ်သုကလိနွံတုဲ ဗ္ဒိုပ်ဒပ်ကံၚ်ဇြဳပၞာန်ဂမၠိုၚ် နွံပ္ဍဲဍုၚ်သုကလိဂှ် ဒပ်ပံၚ်ကောံ KNLA KNDO သီဂွံလဝ် ပ္ဍဲသၞာံ ၂၀၂၄ သၞာံတုဲတေံ ဂိတုဂျောန်ဂှ်တုဲ ဗ္ဒိုပ်ဒပ်ကံၚ်ဇြဳပၞာန်ဂမၠိုၚ် သှ်ေဒၟံၚ် ပ္ဍဲဒေသဝဝ်လေသၟးရ။
ပ္ဍဲဍုၚ်ဝဝ်လေဂှ် မ္ၚးနူဗ္ဒိုပ်ဗျူဟာ ဒပ်ကံၚ်ဇြဳပၞာန်ဂှ် ဗ္ဒိုပ် ( ဥကရစ်ထ၊ ကနဲလေး၊ ထီးကပလယ်၊ မော်ခီး၊ ဝါးမီးထ၊ ဘလက်ဒို၊ သေဘောဘိုး) တံ သှ်ေဒၟံၚ်ဏီရ။
ဒပ်ပံၚ်ကောံ KNLD KNDO မဒှ်ဒပ်သၟဝ်တဲ KNU တံဂှ်ဝွံ အပ္ဍဲဂိတုမေဏံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန်ဂမၠိုၚ် နွံပ္ဍဲတိဍာ်ဒပ်မဟာ ၇ သ္ကုတ်သၟဝ်ကျာ ဍုၚ်ဗြဝတဳဂှ် ကြပ်သီုဖအိုတ်တုဲ ကုဗ္ဒိုပ်ဒပ်ကံၚ်ဇြဳပၞာန် နွံပ္ဍဲတိဍာ်ဒပ်မဟာ ၆ သ္ကုတ်သၠုၚ်ကျာဍုၚ်ဗြဝတဳဂှ် ထ္ပက်ပၞာန် ဗ္တိုက်ကၠုၚ်ဒၟံၚ်ရ။
ဒပ်ကံၚ်ဇြဳပၞာန်ဂှ်တှ်ေ ညံၚ်ဗ္ဒိုပ်ဒပ်ဂမၠိုၚ် ဟွံဂွံစှ်ေအာဂှ် သ္ပအဓိက ဒးရပ်စပ်စကာဒၟံၚ် အရီုဗၚ်ပၞာန်ကျာတံဂှ်တုဲ နူကဵုဗလးတိ ဂွံကၠုၚ်စိုပ်ကဵုပၞာန်ရီုဂှ် ဟွံလောဲသွာပုဟ်ဂှ် တမ်ရိုဟ်ပရိုၚ်ပရေၚ်ပၞာန် အပ္ဍဲဒေသဂမၠိုၚ် သ္ဂးရ။
ပွဳဗွိုၚ်ကရပ်ဍုၚ်ကအ်ကြိက်−ကြုၚ်ဒဵု မဒှ်အကြာတိဍာ် ဒပ်မဟာ ၆ ကဵု ဒပ်မဟာ ၇ KNU ဂှ် ပေါဲဗ္တိုက် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံမဟာမိတ် KNLA မစက္တဵုဒှ်လဝ် ပ္ဍဲဂိတုဨပရဴတုဲကၠုၚ်တေံဂှ်ဝွံ ဒဵုကဵုအခိၚ်လၟုဟ် ဆက်ဒှ်ဒၟံၚ်ဖိုဟ်တုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ဂၠိုၚ်ကဵုဠက် ဒးဂြိပ်ဒဴဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ