မတ်မလီု၊ မေ ၂၅
ဒပ်မန်ရာမည မပံၚ်ကောံဒက်ပ္တန်လဝ်ဂှ် ဒုၚ်ဂိုၚ်ကေတ် နဒဒှ်မဟာမိတ်ပၠန်ဂတးဘဝတုပ်တုဲ ညံၚ်တိုၚ်ပ္ကဴတၚ်ရန်တၟအ်ပၠန်ဂတး ဂွံအံၚ်ဇၞး ဗွဲမပြဟ်ဂှ် ပံၚ်တောဲရေၚ်တၠုၚ်အာဏောၚ် ဒပ်ပၞာန်တအာၚ် TNLA လလောၚ်တြးလဝ်ရ။
ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ကဵု ဒပ်ပၞာန်ဗၠးၜးဍုၚ်မန် MLA တံ ပံၚ်တောဲတုဲ စပ်ကဵုမဒက်ပ္တန်လဝ် နဒဒှ်ဒပ်မန်ရာမည RMA ဂှ်တုဲ ဌာန်ဂအုပ်ဗဟဵု ဒပ်ပၞာန်တအာၚ် /ဒပ်ပၠတရဴဗၠးၜးတွဵုရးပလံၚ် (PSLF/TNLA) လလောၚ်ပ္တိတ်ကၠုၚ် လစွံစိုတ်ရ။
ဌာန်ဂအုပ်ဗဟဵု ဒပ်ပၞာန်တအာၚ်/ဒပ်ပၠတရဴဗၠးၜးတွဵုရးပလံၚ် (PSLF/TNLA) ဒဒှ်ရဒုၚ်တၠုၚ် ပ္တိုန်စရာဲ လ္တူမဒက်ပ္တန်လဝ် ဒပ်မန်ရာမညဂှ်ကီု၊ ပွမဒက်ပ္တန် ဒပ်မန်ရာမညဂှ်ဝွံ ဒှ်ပွမစိုပ်ကၠုၚ် လ္တူဂၠံၚ်တရဴပၠန်ဂတး မဍာံပြဏောၚ်ဂှ် သ္ဂးရ။
နကဵုတၚ်ရန်တၟံ သ္ဂောံဗ္တိုက်သရိုဟ်တၠအဝဵုပၞာန်၊ သ္ဂောံဓမံက်ပ္တိုန်ဍုၚ်မန် မဍိုက်ပေၚ်ကဵု အခေါၚ်အရာတုပ်သၟဟ် ကေုာံ အခေါၚ်ကံကုသိုလ်ဇကု ဇကုဖန်ဖက်ကေတ်မာန်ဂှ်တုဲ ပ္ဍဲဂိတုမေ ၂၄ ဂှ် ဒက်ပ္တန်လဝ် ဒပ်မန်ရာမညတုဲ ဒပ်ပၞာန်ဗၠးၜးကောန်ဂကူမန် MNLA AD ကေုာံ MLA တံ ပံၚ်ကောံဒက်ပ္တန်လဝ် နဒဒှ်ဒပ်မွဲရ။
ဂကောံက္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန် ဗော်ဍုၚ်မန်တၟိ AD ကဵု ဂကောံက္ဍိုက်ပ် MLA တံ ပါလုပ်တုဲ ကလေၚ်ဒက်ပ္တန်လဝ် ကမ္မတဳပရေၚ်ဍုၚ်ကွာန်၊ ပရေၚ်ပၞာန် NMSP(AD) ၂၆ တၠရ။
ပ္ဍဲကဵုဏံ နူကဵုကမ္မတဳက္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန် ဗော်ဍုၚ်မန်တၟိ AD ဂှ် ရုဲစှ်လဝ် ၉ တၠတုဲ ဥက္ကဌ နာဲဇဲယ၊ ဒုဥက္ကဌ နာဲလျးဂကူ၊ ညးအုပ်ကာ နာဲဗညာလဴ တအ် ပါလုပ်ရ။
သၟဝ်ပၠတရဴ ပရေၚ်ဍုၚ်ကွာန် ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) AD ဂှ် ဒက်ပ္တန်လဝ် ကမ္မတဳပၞာန် (၇) တၠ သွက်ဂွံထ္မံက်ရုပ်ရဴ ကမၠောန်စပ်ကဵုပရေၚ်ပၞာန် ဒပ်မန်ရာမည RMA ရ။
နဒဒှ်ညးဂအုပ် က္ဍိုက်ပ်ဒပ်ပၞာန်ဂှ် ဒုသ္ကိုပ်ပၞာန်စၠန်ထဝ်၊ ဒုညးဂအုပ်က္ဍိုက်ပ်ဒပ်ပၞာန် (၁) သ္ကိုပ်ဗိုလ်ဇၞော်သဵုဝေန် ကေုာံ ဒုညးဂအုပ်က္ဍိုက်ပ် ဒပ်ပၞာန် (၂) သ္ကိုပ်ဗိုလ်ဇၞော်ကျဳဇြာန်တအ်ဂှ် ခါန်ကၞက်ပ္တိုန် ပအပ်ကဵုလဝ်တာလျိုၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ၜါဂကောံဂှ်ရ။
ဍုၚ်မန်မဍိုက်ပေၚ်ကဵု အခေါၚ်ကံကုသဵုဇကု ဇကုဖန်ဖက်ကေတ် သ္ဂောံမံက်တိုန်မာန်၊ သၞောတ်တၠအဝဵုပၞာန် သ္ဂောံဒတုံသရိုဟ်စှ်ေအာ ပြဟ်ဟ်မာန်ဂှ် ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) AD ၊ ဒပ်မန်ရာမည (RMA) တအ် ပံၚ်တောဲကဵု ဂကောံမဟာမိတ်ပၠန်ဂတးကောန်ဍုၚ်အရၚ်ဘဝတုပ်ဂမၠိုၚ် ကေုာံဒပ်ပၠန်ဂတး စဵုဒၞါညးဍုၚ်ကွာန်ဂမၠိုၚ်တအ်တုဲ လုပ်အာပေါဲဗ္တိုက်ရောၚ် လလောၚ်တြးကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီုရုပ်− TNLA