ညံၚ်လေဝ်ပေန်၊ မေ ၂၅
ပ္ဍဲရးဗဂေါ ခရိုၚ်ညံၚ်လေဝ်ပေန် ပ္ဍဲပွိုၚ်ဍုၚ်ကျံက်ကျဳကဵု ပွိုၚ်ဍုၚ်ယှိုဲကျေန်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်ဒၟံၚ်တုဲ ညးဍုၚ်ကွာန်ဒေသ ပန်တၠ ချိုတ်တုဲ မွဲတၠ ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ် ပ္ဍဲဂိတုမေ ၂၄ တေံရ။
ပ္ဍဲဂိတုမေ ၂၁ တုဲကၠုၚ်တေံ ကောန်ဒပ်ကံၚ်ဇြဳပၞာန် နူဗ္ဒိုပ်(သံဆိပ်) ပွိုၚ်ဍုၚ်ယှိုဲကျေန်ဝွံ မၚ်ဒၟံၚ် ပ္ဍဲဒဒန်(နတ်စဉ်) ကၠအ်ထၜိုတ်(ထၚ်ကျော်) တုဲ ဟိုတ်ဟၟဲမွဲသာ် ပန်လဝ်ညးဍုၚ်ကွာန်ဒေသဂမၠိုၚ် နကဵုသေနာတ်ရ။
ဟိုတ်နူဒးဒုၚ်ပန်လဝ်ကဵုသေနာတ်တုဲ ဥူမေန်အံၚ် အာယုက် ၅၄ သၞာံ ဒၟံၚ်ကွာန်ဝိုၚ်ကျောန်၊ ဒဝ်သာန်ထေ အာယုက် ၆၂ သၞာံ ဒၟံၚ်ကွာန်တပေန်ချံၚ်တံ ဒးချိုတ်အာလဝ်တုဲ အံၚ်ဇေယျထောန် အာယုက်မၞုံ ၂၁ သၞာံ ဒၟံၚ်ကွာန်တပေန်ချံၚ်ဂှ် ဇီုကပိုက်ကလိဂွံအာလဝ်ဝပ်ရ။
လအာတုပ်သာ်ဂှ်ကီု ပ္ဍဲဂိတုမေ ၂၃ ဂှ်လေဝ် ဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော် အပ္ဍဲကွာန်(မတောကုန်း) ဂှ်တုဲ ဒဝ်သာန်ကျဳ အာယုက် ၄၃ သၞာံကဵု ဒဝ်အေယှိုဲ အာယုက် ၇၅ သၞာံ ပါဲကၠုၚ်ဘဲပၞာန်တံ ဒးအာလွဟ်ဇၞော်တုဲ ဒးပြဟ်လလုဲအာလဝ်ရ။
အပ္ဍဲကာလသီအဝဵုဏံ အပ္ဍဲပွိုၚ်ဍုၚ်ကျံက်ကျဳကဵု ပွိုၚ်ဍုၚ်ယှိုဲကျေန်ဂှ် ဟိုတ်နူလ္ပာ်ကံၚ်ဇြဳပၞာန် ထောံဂြာတ်မခတိုဟ် နူပၞာန်ကျာ၊ ပန်ပှော်ကဵုလွဟ်ဇၞော်တံဂှ်တုဲ ညးဍုၚ်ကွာန်ဒေသ ဒးဇီုကပိုက်ပြဟ်လလုဲအာ နွံဒၟံၚ် မွဲဏှမွဲဏှရ။
စပ်ကဵုတၚ်လလောၚ်တြး ဗော်သွးကောန်ဂကူကရေၚ် KNU ဗဟဵုတုဲ လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ် မမိက်ကဵုမွဲမွဲဂှ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီုရုပ်− KNU