မတ်မလီု၊ မေ ၂၅
အပ္ဍဲတွဵုရးဍုၚ်မန် ပ္ဍဲပွိုၚ်ဍုၚ်လ္ၚဵုတံဂှ် ကံၚ်ဇြဳပၞာန် ဗက်ရပ်ဒၟံၚ်ကွဳစက်၊ ကွဳလိုန်ဓာတ်လာၚ်ဇြေန်ဟွံမွဲတအ် ဒဵုကဵုအပ္ဍဲသ္ၚိတုဲ ဘပဠအာတ်မိက်ဒၟံၚ်သြန်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပရေၚ်ရပ်ဒက်ယာန်လာၚ်ဇြေန်ဟွံမွဲတံဂှ်ဝွံ ဒှ်ဒၟါနူအမိၚ်က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ပ္ဍဲကဵုကောံဓရီုပညဳကမၠောန် ဂကောံကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုမေ ၂၀ တုဲကၠုၚ်တေံဏောၚ်ဂှ် ညးမစုက်လုက်ကဵုကံၚ်ဇြဳပၞာန်ဂမၠိုၚ် သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ ဒးထ္မံက်ပ္တိတ် ပရေၚ်မဍိုက်ဒၟံၚ်ကွဳစက်ကေုာံကွဳလိုန်ဓာတ် လာၚ်ဇြေန်ဟွံမွဲတအ်ဂှ်ဏောၚ်တုဲ ဂွံဆဵုကေတ်ဒၟံၚ်ကၠောန်ကေတ်ဂၞန်ပတောံ၊ လာၚ်ဇြေန်ပတောံတံဂှ်ရ နကဵုညးတာလျိုၚ်ဂမၠိုၚ် သွက်ဂွံကေတ်အရေဝ် ထ္မံက်ပ္တိတ်ကဵု ညးမပါလုပ်ဆက်စပ်ဒၟံၚ်သီုဖအိုတ်ဂှ် စၞောန်ကၠုၚ်လဝ်ရ။
ဟိုတ်နူပရေၚ်မဍိုက်ယာန်လာၚ်ဇြေန်ဟွံမွဲတံဂှ်တုဲ နကဵုကၟိန်ဍုၚ် ပ္ဍဲအရာအကံက်အခေါန်တအ်ဂှ် ဒးဂိဒၟံၚ်တၟာဂလိုၚ်တုဲ ပ္ဍဲကိစ္စစပ်ကဵုပရေၚ်ဂီုကၠီုတံဂှ်လေဝ် ဒှ်ကၠုၚ်အခက်အခုဲမာန်ဂှ်ရ ပ္ဍဲကဵုရးဒေသ ကေုာံ တွဵုရးတံဂှ် ပရေၚ်ဍိုက်ကွဳလိုန်ဓာတ်ကေုာံကွဳစက်လာၚ်ဇြေန်ဟွံမွဲတံ ညံၚ်ဟွံဂွံမွဲ သွက်ဂွံကောပ်ကာဲကဵုဂှ် စၞောန်ကၠုၚ်လဝ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ လုပ်စိုပ်စၟဳတ်ဒၟံၚ် ယာန်လာၚ်ဇြေန်ဟွံမွဲတအ် စဵုကဵုအပ္ဍဲသ္ၚိ နကဵုဗီုပြၚ်လုပ်စၟဳတ်စရၚ်ကၟုဲဂှ်တုဲ ရပ်ဒက်ကၠုၚ်ဒၟံၚ်ရောၚ် ဟီုရ။
“ဍေံတံ မုပရောဟီုတှ်ေ ဟိုတ်နူပရေၚ်ဂီုကၠီုရဏောၚ်၊ ထ္ၜးကၠုၚ်ဟိုတ် ပန်ပှော်ကၠုၚ်ဒၟံၚ် မၞိဟ်လ္ပာ်ဍေံတံ နကဵုယာန်လာၚ်ဇြေန်ဟွံမွဲတံဂှ်ဏောၚ်ဂးတုဲ ပ္ဍဲကဵုသ္ၚိတအ်ဂှ် နကဵုဗီုပြၚ်စၟဳတ်စရၚ်ကၟုဲဂှ် လုပ်စၟဳတ်ဒၟံၚ်တုဲ အခိၚ်ဗ္တံ လုပ်ဂၠါဲမၞိဟ်ဟွံသေၚ် လုပ်စၟဳတ်ဒၟံၚ် ကွဳလိုန်ဓာတ်၊ ကွဳစက် လာၚ်ဇြေန်ဟွံမွဲတအ်ဏံဂှ် ကၠောန်ကၠုၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် က္ဍိုပ်သ္ကိုပ်ပၞာန် ကြဴနူဟီုကၠုၚ် သွက်သ္ဂောံရပ်ဒက် ယာန်လာၚ်ဇြေန်ဟွံမွဲတအ်တုဲဂှ် ပ္ဍဲဂၠံၚ်ပိပန်သွာၚ်တံဂှ်တှ်ေ ပတေၚ်ဂြတ်ကၠုၚ် ပရေၚ်စၟဳတ်တံဂှ်တုဲ စၟဳတ်ကၠုၚ်ဒၟံၚ်လာၚ်ဇြေန်နွံ၊ဟွံမွဲဂှ် စဵုကဵုအခိၚ်ဗ္တံရောၚ် ညးဒေသဂမၠိုၚ် ဟီုအိုတ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ကံၚ်ဇြဳပၞာန် ရပ်ဒက်ဒၟံၚ် ယာန်လာၚ်ဇြေန်ဟွံမွဲတအ် နကဵုကိုန်စဳမာန်တုဲ အခိၚ်ဗ္တံတံဂှ်လေဝ် လုပ်စၟဳတ်စရၚ်ကၟုဲတုဲ ရပ်ဒက်ဒၟံၚ် ကွဳစက်၊ကွဳလိုန်ဓာတ် လာၚ်ဇြေန်ဟွံမွဲတံဂှ်နွံရောၚ် ဟီုရ။
“ ရပ်ဒက်ဟီုဂှ် အစဳဇန်ဍေံတံ နွံတှ်ေ ရပ်ရ။ ရပ်ဒၟံၚ် သီုလာၚ်ဇြေန်။ ဍိုက်မၞိဟ်ၜါလေဝ် ရပ်။ ကွဳစက်၊ ကွဳလိုန်ဓာတ် ၜိုတ်နွံ၊ သီုကဵုဍိုက်မၞိဟ်ၜါ၊ သီုလာၚ်ဇြေန် နွံ၊ဟွံမွဲတံဂှ် ရပ်ဒၟံၚ်ရ။ အခိၚ်ဗ္တံတှ်ေ လဆောဝ်လဆောဝ် စၟဳတ်စရၚ်ကၟုဲညိညဂှ် နွံ၊ ကွဳလိုန်ဓာတ် ကွဳစက်တံဂှ်တှ်ေ ရပ်ဒၟံၚ်လာၚ်ဇြေန်ဟွံမွဲတံဂှ်ရ” သာ်ဝွံ သ္ဂးရ။
ယဝ်ကွဳစက်လာၚ်ဇြေန်ဟွံမွဲ ဒးဒုၚ်ရပ်မ္ဂး ယဝ်ဒဒှ်ေညးမစုက်လုက်ကဵုကံၚ်ဇြဳပၞာန်နွံမ္ဂး ကဵုဏာသြန်ကဵုကိုဋ်တှ်ေ ကလေၚ်ဗလးကဵုဒၟံၚ်နွံကီုလေဝ် ယဝ်ညးမစုက်လုက်ကဵုကံၚ်ဇြဳပၞာန် ဟွံမွဲမ္ဂး ဒးဒုၚ်ရပ်ဒၟံၚ်တံ နွံဒၟံၚ်ရ။
အပ္ဍဲဒေသဂှ် ကံၚ်ဇြဳပၞာန် ကၠောန်သ္ပကၠုၚ်ဒၟံၚ် ပရေၚ်ရပ်ဒက်ယာန်လာၚ်ဇြေန်ဟွံမွဲတအ် ဗွဲမတေၚ်ဂြတ်တုဲ ဂွံအာကၠုၚ်ကွာ်ဂၠံၚ်ရဂှ် အခက်အခုဲနွံကၠုၚ်တုဲ မ္ၚးနူကွဳစက်ဂှ် မၞိဟ်လေဝ် ဒးဒုၚ်ရပ်ကၠုၚ်မာန် ဒှ်ဒၟံၚ်အကာဲအရာဏံရ။
ပရေၚ်ကံၚ်ဇြဳပၞာန် ရပ်ဒက်ဒၟံၚ်ယာန်လာၚ်ဇြေန်ဟွံမွဲတံဂှ်ဝွံ သွက်ဒပ်ကံၚ်ဇြဳပၞာန်၊ ဗၠာဲသၟိၚ်၊ သၞာဲဒဴနူဌာနမဆေၚ်စပ်တံဂှ် ဖန်ဗဒှ်ကဵုဒၟံၚ်အခေါၚ်အရာဂွံစဏောၚ်တုဲ ယာန်လာၚ်ဇြေန်ဟွံမွဲဗွဲမဂၠိုၚ်ဂှ် သၞာဲဒဴကံၚ်ဇြဳပၞာန်တအ်ရဟေၚ် ရပ်စပ်စကာဒၟံၚ်ဂှ် ညးဒေသဂမၠိုၚ် ပါ်ပါဲလဝ်ရ။
အတိုၚ်တၚ်လလောၚ်တြး ကံၚ်ဇြဳပၞာန်မ္ဂး ပ္ဍဲဂိတုမေ ၂၂ ဂှ် ပ္ဍဲပွိုၚ်ဍုၚ်ရေဝ်၊ ပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်မုဟ်ဍုၚ်တံဂှ် ရပ်ဂွံလဝ် ကွဳလိုန်ဓာတ်လာၚ်ဇြေန်ဟွံမွဲ ၄ ဖ္ဍိုက်တုဲ ကေတ်လဝ်အရေဝ် နကဵုသၞောဝ်ဗၞိက်ပၠောပ်ဗၞိက်ပ္တိတ်ရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ