မတ်မလီု၊ မေ ၂၇
နကဵုဒပ်ရပ်လွဟ်မန်ဂမၠိုၚ် မပၠန်ဂတးဒၟံၚ် သၞောတ်တၠအဝဵုပၞာန် ဂွံပံၚ်ကောံကၠုၚ် ပ္ဍဲဒပ်မန်မွဲဂှ်သၟးဟွံက နွံပၟိက်ဒၟံၚ်ကဵု သီုကဵုဒးရေၚ်တၠုၚ်ပရေၚ်ပၞာန်မာန်ရောၚ် ညးလ္ၚတ်ဂမၠိုၚ် ထံက်ထ္ၜးလဝ်ရ။
နကဵုတၚ်ရန်တၟံ သ္ဂောံရေၚ်တၠုၚ်အာ မွဲဂကောံမွဲကရောံ ပ္ဍဲအရာဒက်ပ္တန်ဍုၚ်မန် မဍိုက်ပေၚ်ကဵုအခေါၚ်တုပ်သၟဟ် ကေုာံ အခေါၚ်ကံကုသိုလ်မန် မန်ဖန်ဖက်ကေတ် အရာညးဍုၚ်ကွာန်မန်တအ် မၞုံပၟိက်ဂှ်တုဲ ဒက်ပ္တန်လဝ္ ဒပ်မန်ရာမည RMA ပ္ဍဲဂိတုမေ ၂၄ တေံရ။
ပ္ဍဲဒပ်မန်ရာမညဂှ် ဒပ်ပၞာန်ဗၠးၜးကောန်ဂကူမန် MNLA AD မပါ်တိတ်နူဗော်မိဂှ်ကဵု ဒပ်ပၞာန်ဗၠးၜးဍုၚ်မန် MLA တအ် ပါလုပ်ရ။
ဣဏံဝွံ ဒပ်ရပ်လွဟ်မန်သီုဖအိုတ်ပါလုပ်တုဲ ညံၚ်ဒပ်မန်မွဲသ္ဂောံဒှ်ဂှ် ဒှ်ဂၠံၚ်စတုဲ ဟိုတ်နူဒှ်အပြံၚ်အလှာဲပၠန်ဂတးမန်ဂှ်ရ ဂွံထ္မံက်ရုပ်ရဴ လ္ဂောံကဵုပရေၚ်ပၞာန်မာန်ဂှ် ပၟိက်ဇၞော်တဴရောၚ် ညးလ္ၚတ်ဂမၠိုၚ် သ္ၚဳဂၠိပ်လဝ်ရ။
မေန်တာန်လွေန် ညးဒုၚ်တာလျိုၚ် ဇြဟတ်ရာမညဖေဝ်ဒရာခေတ်တၟိ NRFF ဂှ် သွက်ဂွံထ္မံက်ရုပ်ရဴပရေၚ်ပၞာန်ဂှ် ညးဍုၚ်ကွာန်မန်တအ် နွံပၟိက်ကဵုဒပ်မန်မွဲ မထ္ၜးအစောံမာန်ဂှ်ဏောၚ်ဟီုဂှ် လ္ပဝိုတ်ညိဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဗ္တိုက်တုဲ ဟွံပံၚ်တှ်ေ မုဟွံတၟေၚ်ပုဟ်၊ အခိၚ်အိုတ်ဒၟံၚ် ပ္ဍဲပရေၚ်ပံၚ်ကောံတံဂှ်တုဲ ဟွံဗ္တိုက်ပၠန်မ္ဂးလေဝ် ဓဝ်ပတှ်ေညးဍုၚ်ကွာန်တအ် တန်ကြန်အာဍာ်ဇမၠိၚ်ဟွံသေၚ်ပုဟ်ဟီုဂှ် ဒးစွံသတိဏောၚ်။ ဟိုတ်ဂှ်ရ နကဵုညးက္ဍိုက်ပ်ပရေၚ်ဍုၚ်ကွာန် ပရေၚ်ပၞာန်ဂမၠိုၚ် ထ္ၜးအစောံတုဲ ညးဂှ်က္ဍိုက်ပ်ဒပ်ဏံရောဟီုဂှ် ကၠောန်ဟာ၊ ဟွံသေၚ်မ္ဂး ကေတ်တၚ်တုပ်စိုတ် ညးလဵုမွဲအာက္ဍိုပ်ရောတုဲမှ ဗ္တိုက်ဟာဟီုဂှ်တှ်ေ ပ္ဍဲကဵုက္ဍိုပ်သ္ကိုပ်ပရေၚ်ဍုၚ်ကွာန်ပရေၚ်ပၞာန်တံရဏောၚ် ဒးသ္ဂုတ်သွာတ်။ ညးဍုၚ်ကွာန်တအ် နွံပၟိက်ဂှ်တှ်ေ ဒှ်ဒပ်မန်မွဲတုဲ မွဲလ္ပာ်ဂှ်ပၠန် ဒးဒှ်ဒပ်မန် ထ္ၜးအစောံမာန် သွက်ဂွံထ္မံက်ရုပ်ရဴပရေၚ်ပၞာန်တံဂှ်ဏောၚ်ဟီုဂှ်လေဝ် လ္ပဝိုတ်ညိ” သာ်ဝွံ သ္ဂးရ။
ကံၚ်ဇြဳဖေဝ်ဒရာဍုၚ်မန် MSFC မဒက်ပ္တန်လဝ် နကဵုဇြဟတ်အပ္ဍဲတွဵုရး နူကဵုပၠန်ဂတးက္ညၚ်ဏံဂှ် နကဵုညးတအ် ဒုၚ်ဂိုၚ်ကေတ်လဝ် လညာတ်ကသပ် ဒပ်မန်သ္ဂောံဒှ်မွဲ ဗိုန်န်ရောၚ် ပ္ဍဲဂိတုမေ ၂၅ တေံ လလောၚ်ပ္တိတ်လဝ်လစွံစိုတ်ရ။
ဟိုတ်ဂှ်ရ နကဵု MSFC ဗမံက်ကၠုၚ်ရုပ်ရဴမွဲစွံ စပ်ကဵုကမၠောန် ဒပ်မန်သ္ဂောံဒှ်မွဲ စပ္တံနူကဵုကရောၚ်ပၞာန်ရာမညရောၚ်ဂှ် သ္ဂးရ။
ပ္ဍဲအရာဒးပံၚ်ဗစပ်ဂှ် စွံဂတ ဓဝ်ပရေၚ်ညဳသၟဟ် အကြာဂကောံဒြဟတ်ပၠန်ဂတး ပ္ဍဲဍုၚ်မန်တအ်တုဲ နဲကဲပံၚ်တောဲရေၚ်တၠုၚ်အာမွဲစွံ ( Coming Together Model) ဂှ်ရ ဂၠံၚ်ဍာန်ထေက်ကြိုက်အိုတ်ရောၚ်ဂှ် နကဵု MSFC ဒုၚ်ဂိုၚ်ကေတ်ရ။
ပ္ဍဲပရေၚ်သဳကၠဳပရေၚ်ဍုၚ်ကွာန် ကုဗော်ဍုၚ်မန်တၟိ AD ပ္ဍဲသၞာံ ၂၀၂၅ ဂိတုမာတ် စၟတ်တ္ၚဲ ၂၁ ဂှ် စၞးပရေၚ်ပံၚ်တောဲရေၚ်တၠုၚ်အာဂှ် နူ NMSP AD ပ္တိုန်ထ္ၜးသဳကၠဳကၠုၚ် (Coming Under Model) ဒးလုပ်ပံၚ်သၟဝ်တဲ ညးတအ်က္ဍိုက်ပ်ရောၚ်ဂှ် သ္ဂးလဝ်ရ။
ဟိုတ်ဂှ်ရ နကဵုပရေၚ်ဍုၚ်ကွာန်မ္ဂး MSFC အာဒၟံၚ် ဗီုပြၚ်ဒပ်ပံၚ်ကောံ ရန်တၟအ် ဒက်ပ္တန်ရးဍုၚ်မန်တုဲ ပရေၚ်ပံၚ်တောဲရေၚ်တၠုၚ် ဟွံအံၚ်ဇၞးပုဟ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒံက်တာသဳရိမန်ဆာန် ကောန်ဂကောံကံၚ်ဇြဳ MSFC ဂှ် လ္ဂောံကဵုတၚ်ဆဵုဂဗ ပၠန်ဂတးမန်မ္ဂး ဟိုတ်နူပရေၚ်က္ဍိုက်ပ် ပရေၚ်ပၞာန်၊ ပရေၚ်ဍုၚ်ကွာန် နူကဵုဗော်မွဲဓဝ်ဂှ်တုဲ ယဝ်ဖျေံဒးသ္ဂုတ်သွာတ်ဗၠေတ်မှာအာမ္ဂး ထိၚ်ဒက်မာန်ဟွံသေၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟိုတ်နူဂကောံက္ဍိုက်ပ်ပရေၚ်ဍုၚ်ကွာန်ပရေၚ်ပၞာန် မ္ဒးက္ဍိုက်ပ် ဒပ်မန်ရာမည နကဵုပရေၚ်ဍုၚ်ကွာန်၊ ပရေၚ်ပၞာန်ဂှ်ရဏောၚ်။ သၟဝ်ပၠတရဴ ပရေၚ်ဍုၚ်ကွာန်ပရေၚ်ပၞာန် ဗော်ဍုၚ်မန်တၟိ AD မွဲဓဝ်ဂှ် ယဝ်ဒှ်ဒၟံၚ်သာ်ဏံမ္ဂး အပြံၚ်အလှာဲပရေၚ်ပၞာန်ပရေၚ်ဍုၚ်ကွာန် ဒှ်ကၠုၚ်မွဲမွဲသာ်တုဲ ယဝ်တၚ်သ္ဂုတ်သွာတ်ပရေၚ်ဍုၚ်ကွာန် ဗော်ဍုၚ်မန်တၟိ AD မှာရာအာမွဲမွဲသာ်မ္ဂး ဂွံကလေၚ်အာ သၟဝ်ပရေၚ်ထိၚ်ဒဝ်ပရေၚ်ဍုၚ်ကွာန် Check and Balance ဂှ် သာ်လဵုမှကၠောန်မာန်ဟွံသေၚ်ပုဟ်။ ညအ်ဂှ်လေဝ် ဟိုတ်နူတၚ်ဆဵုဂဗ ပၠန်ဂတးမန်ပိုယ်တံရဏောၚ်” သာ်ဝွံ သ္ဂးရ။
သွက်ဂွံက္ဍိုက်ပ် ပရေၚ်ဍုၚ်ကွာန်ပရေၚ်ပၞာန် ဒပ်မန်ရာမညဂှ် က္ဍိုပ်သ္ကိုပ်ၜါလ္ပာ်တအ် ပါလုပ်တုဲ ဒက်ပ္တန်လဝ် နကဵုကောန်ဂကောံ ၂၆ တၠတုဲ ပ္ဍဲကဵုဏံဂှ် ရုဲစှ်လဝ် ၉ တၠတုဲ ဒက်ပ္တန်လဝ် ကမ္မတဳပရေၚ်ဍုၚ်ကွာန် ပရေၚ်ပၞာန် ဗော်ဍုၚ်မန်တၟိ AD ရ။
ပ္ဍဲကဵုကမ္မတဳဂှ် လ္ပာ်ဗော်ဍုၚ်မန်တၟိ AD ဂှ် ဥက္ကဌ နာဲဇဲယ၊ ဒုဥက္ကဌ နာဲလျးဂကူ ကေုာံ ညးအုပ်ကာ နာဲဗညာလဴတံ ကေတ်အာတာလျိုၚ် နဒဒှ်က္ဍိုပ်သ္ကိုပ်ရောၚ်။ လအာတုပ်သာ်ဂှ်ကီု သွက်ဂွံထ္မံက်ရုပ်ရဴ ကမၠောန်စပ်ကဵုပရေၚ်ပၞာန်တအ်ဂှ် ဒက်ပ္တန်လဝ် သီုကမ္မတဳပၞာန်ရ။
ကံၚ်ဇြဳဖေဝ်ဒရာဍုၚ်မန်ဂှ်တှ်ေ လ္ဂောံကဵုအကာဲအရာပရေၚ်ဍုၚ်ကွာန်ပရေၚ်ပၞာန်တ္ၚဲဏံမ္ဂး စၞးဂကောံမွဲဂကောံဟေၚ် စဳရေၚ်က္ဍိုက်ပ် ပရေၚ်ဍုၚ်ကွာန်ပရေၚ်ပၞာန်ဂှ် ဂကောံဂလိုၚ် ပါလုပ်ပံၚ်ဗစပ်က္ဍိုက်ပ် (All Inclusive) ဗီုပြၚ်ဂကောံပံၚ်ကောံ/ဒပ်ပၠတရဴ ညံၚ်ရဴ ဖဆပလ African National Congress (ANC) ဂှ် သာတုဲထေက်ကြိုက်ရောၚ် ပတှ်ေကေတ်လဝ်ရ။
ဆ္ဂး တၚ်ရန်တၟံ ပရေၚ်ဍုၚ်ကွာန် MSFC ဗတိုက်သရိုဟ်တၠအဝဵုပၞာန် ကေုာံ တၠအဝဵုအိုဿီု သီုကဵုဒက်ပ္တန်ဍုၚ်မန် အပ္ဍဲကၟိန်ဍုၚ်ဖေဝ်ဒရေဝ်ဂှ် တုပ်မံၚ်ကဵု တၚ်ရန်တၟံ ပရေၚ်ဍုၚ်ကွာန် NMSP-AD တုဲ ဆက်ဂၠါဲအာ နဲကဲသ္ဂောံပံၚ်ဗစပ် အရာပရေၚ်ဍုၚ်ကွာန်ရောၚ် သ္ဂးရ။
ဒပ်မၞုံသၟဝ် MSFC ကေုာံ ဒပ်မဟာမိတ်ညးတံဂှ်လေဝ် ပ္ဍဲအရာဗ္တိုက်တၠအဝဵုပၞာန်ဏံဂှ် ပံၚ်ဗစပ်အာ မွဲကရောံကုဒပ်မန်ရာညရောၚ် ကဵုလဝ်သမ္တီရ။
ဒံက်တာသဳရိမန်ဆာန်ဂှ်တှ်ေ “ပ္ဍဲကရောၚ်ပၞာန်ရာမညဂှ် MSDF, MSRF တအ် ဆက်တုဲပါလုပ်ဒၟံၚ်ဏောၚ်။ ဆ္ဂး စၞးကရောၚ်ပၞာန်ပံၚ်တောဲရာမည မဒက်ပ္တန်လဝ် နကဵုပန်ဒပ်ဂှ် ဒှ်အာဗီုပြၚ် ဒပ်မန်ရာမည RMA မဒှ်ဒပ်ရပ်လွဟ်မန်ပိဒပ်၊ MSDF ကေုာံ MSRF ဏောၚ်” သာ်ဝွံ ဟီုရ။
ကရောၚ်ပၞာန်ပံၚ်တောဲရာမညဂှ် အပ္ဍဲသၞာံဏံမံက်တေံ ဒက်ပ္တန်လဝ် နကဵုဒပ်မန်ပန်ဒပ်တုဲ ပ္ဍဲကဵုဏံ ဒပ်ပၞာန်ဗၠးၜးကောန်ဂကူမန် MNLA AD ကဵု ဒပ်ပၞာန်ဗၠးၜးဍုၚ်မန် MLA တအ်လေဝ် ပါလုပ်ဒၟံၚ်ရ။
ဒဵုကဵုအခိၚ်လၟုဟ် ပ္ဍဲကဵုဒပ်ပၠန်ဂတးရပ်လွဟ်မန်ဂမၠိုၚ်ဂှ် ဒပ်မန်ရာမည ကေုာံ ကရောၚ်ပၞာန်ပံၚ်တောဲရာမညတအ် နွံတုဲ ပေါဲဗ္တိုက်သီဗ္ဒိုပ်သီဍုၚ် ပရေၚ်ပြုပြေၚ်ပၞာန် မစှ်ေကဵုဗျူဟာတအ်ဂှ် ဟွံဂွံဝေၚ်ကၠုၚ်ဏီရ။
နာဲဂံၚ်သကာ ညးမၞုံအခေါၚ်ဟီုဂး ဗော်ဍုၚ်မန်တၟိ AD ဂှ် နကဵုဒပ်မန်ရာမည ဆက်အာနဒဒှ်ဒပ်မွဲဏောၚ်တုဲ ပ္ဍဲကရောၚ်ပၞာန်ရာမညဂှ်လေဝ် ချဳဒရာၚ်ဒၟံၚ်ပရေၚ်ပၞာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကရောၚ်ပၞာန်ဏံဂှ်လေဝ် နတဲဏံ ချဳဒရာၚ်ဒၟံၚ် စပ်ကဵုပရေၚ်ပၞာန်ဂှ်နွံ၊ ပေါဲဗ္တိုက်တံဂှ်လေဝ် ထ္မံက်ဒၟံၚ်နွံ။ ဒပ်မန်ရာမညပိုယ်တံဂှ်တှ်ေ ဒပ်ၜါဏံ ဂွံဒှ်မွဲဂှ် ရုဲစှ်လဝ်ယၟုဏံ။ ညအ်ဂှ် အာနဒဒှ်ဒပ်မွဲဏောၚ်။ ၝနူကၠၚ်ဂှ်တှ်ေ အာနကဵုကရောၚ်ပၞာန်။ ကရောၚ်ပၞာန်ဂှ်တှ်ေ နကဵုဒပ်မဆေၚ်စပ်ဂမၠိုၚ် ကေုာံ ကရောၚ်ပၞာန်ပံၚ်တောဲလၟုဟ်ဏံရ။ ပိုယ်တံဂှ်တှ်ေ ကုကရောၚ်ပၞာန်ရာမညသၟးဟွံသေၚ်၊ ကုဂကောံဇြဟတ်ပၠန်ဂတးတၞဟ်ဟ်တံလေဝ် ပံၚ်တောဲတုဲ ချဳဒရာၚ်ဒၟံၚ်ဂှ်နွံ။ ဆ္ဂးလေဝ် ကရောၚ်ပၞာန်ရာမည ဒပ်မန်ပန်ဒပ်သီုဖအိုတ်ပါဂှ်လေဝ် နွံဒၟံၚ်ဖိုဟ်ရ” သာ်ဝွံ သ္ဂးရ။
နကဵုဗော်ဍုၚ်မန်တၟိ AD ၊ ဒပ်မန်ရာမည NMSP AD/RMA ပံၚ်တောဲလုပ်အာပေါဲဗ္တိုက် ကုမဟာမိတ်ပၠန်ဂတးကောန်ဍုၚ်အရၚ်ဘဝတုပ်၊ ဒပ်စဵုဒၞါညးဍုၚ်ကွာန်တံဏောၚ်ဂှ် ကဵုလဝ်သမ္တီရ။
ဒပ်တအာၚ် TNLA ဗ္တောန်ကဵုလဝ်ကွတ်ပၞာန် ကုဒပ်ပၞာန်ဗၠးၜးဍုၚ်မန် MLA ဂှ်တှ်ေ ကုဒပ်မန်ရာမည မပံၚ်ဗစပ်လဝ်ဂှ် ဒုၚ်ဂိုၚ်ကေတ် နဒဒှ်မဟာမိတ်ပၠန်ဂတးဘဝတုပ်တုဲ ညံၚ်တၚ်ရန်တၟံဂွံအံၚ်ဇၞးဗွဲမပြဟ်ဂှ် ပံၚ်တောဲအာဏောၚ် လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media