မတ်မလီု၊ မေ ၂၇
ပ္ဍဲတွဵုရးဍုၚ်မန် ဍုၚ်မတ်မလီု ပ္ဍဲအရာပအပ်ဘာဂှ် ကံၚ်ဇြဳပၞာန် ဟီုဒၟံၚ် သၞောတ်ပရေၚ်ပညာဟွံဒးၚုဟ်ကီုလေဝ် နတဲဏံဂှ် ဒးကဵုဒၟံၚ်သြန်လှုဲရောၚ် မိမကွးဘာဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ၚာ်အဝဲစိုပ်တုဲသီုဖအိုတ် ဂွံဆက်ကတ်ဗ္တောန်ပညာမာန်ဂးတုဲ ကံၚ်ဇြဳပၞာန် ထ္ၜုတ်လဝ် သတ္တာဟပအပ်ဘာ ဗၞတ်အလုံဍုၚ်မွဲ နူဂိတုမေ ၂၂ စဵုကဵုဂိတုဂျောန် ၁ ရ။
ပ္ဍဲအရာပအပ်ဘာဂှ် ၚုဟ်ဘာ၊ ၚုဟ်ဂကောံမိမအ္စာ၊ ၚုဟ်ဝေၚ်ဇြဟတ်၊ ၚုဟ်ကပေါတ်ကိရိယာချူလိက် ကေုာံ ၚုဟ်တိုက်ရံက်လိက် တအ်ဒှ်တမ် ၚုဟ်ဂကူလဵုမွဲမှ ဟွံကံက်ပုဟ်ဂှ် လလောၚ်ပ္တိတ်လဝ် ဗွဲမလုပ်သၞောဝ်ရ။
မိမကွးဘာမွဲတၠဂှ်တှ်ေ ၜိုန်ရဟီုဒၟံၚ် သၞောတ်ပရေၚ်ပညာဟွံဒးကဵုၚုဟ်ကီုလေဝ် နတဲဏံ ဍာံဍာံဂှ် စနူကဵုပြံၚ်ဘာ ကေတ်စၟတ်တဲဂှ် ထ္ၜးဟိုတ်နာနာသာ်တုဲ အာတ်မိက်ဒၟံၚ်သြန်တုဲ ဗွဲတွဵုမအောန် နူၜါကိုဋ် စဵုကဵုၜါကိုဋ်ဘာ်ဂှ် ဒးကဵုဒၟံၚ်ရောၚ် ဟီုရ။
“ ပရေၚ်ပအပ်ဘာဂှ် ပ္ဍဲပါၚ်သၟးရ ဟီုဟွံဒးၚုဟ်။ ပြံၚ်ဘာကေတ်စၟတ်တဲမ္ဂးလေဝ် မးမးဟွံသေၚ်ပုဟ်။ အံၚ်မသုန်တန်မ္ဂး ဍေံတံ ဒးပ္တိတ်ကဵုဏောၚ်လေဝ်။ ဆ္ဂး ညအ်ဂှ်လေဝ် ၚုဟ်တေံၚုဟ်ဏံ ၚုဟ်သဒ္ဓါဂးတုဲ မိက်ဒၟံၚ်ရ။ အာဆဵုကဵုဂအုပ်ဘာမ္ဂး ၜိုတ်ၜါကိုဋ် ၜါကိုဋ်ဘာ်ဂှ် ဒးစုတ်ဏာပ္ဍဲထိုၚ်လိက်။ အလဵုပိုယ်တအ်ရ ဒးကဵုလဝ်” သာ်ဝွံ သ္ဂးရ။
ပ္ဍဲအရာအာတ်မိက်သြန်ဂှ် တန်တဴကဵုတန်မကၠုၚ်ပအပ်ကဵု ပရေၚ်ပြံၚ်ဘာတံဂှ်တုဲ မိက်ဒၟံၚ်တုဲ ယဝ်ဟွံကဵုမ္ဂး ထ္ၜးဟိုတ်နာနာသာ်တုဲ တံၚ်မံၚ်အခိၚ်တအ် ကၠောန်လေပ်ဂှ် ညးဆက်ဟီုရ။
အ္စာဘာဇြဳဒဳအာမ်မွဲတၠဂှ်တှ်ေ ကံၚ်ဇြဳပၞာန် ၜိုန်ဟီုဒၟံၚ်သၞောတ်ပရေၚ်ပညာ ဟွံဒးၚုဟ်ကီုလေဝ် နတဲဏံဂှ် ဟိုတ်နူသြန်ဂိတု ဟွံရုမ်ဂပ်တုဲ ထ္ၜးဟိုတ်ကဵုပရေၚ်ပအပ်ဘာဂှ်တုဲ အ္စာ၊ အ္စာၝောံဂမၠိုၚ် ဂၠါဲဒၟံၚ်သြန်နွံဒၟံၚ်ရောၚ် ဟီုရ။
“ ကံၚ်ဇြဳပၞာန်ဂှ်တှ်ေ ၜိုန်ဟီုဒၟံၚ်ပရေၚ်ပညာဟွံဒးၚုဟ်ကီုလေဝ် အ္စာ၊ အ္စာၝောံဗ္တောန်ဒၟံၚ် ပ္ဍဲဘာတအ်ဂှ်တှ်ေ နကဵုသြန်ဂိတုညးတအ်ဂှ် ဟွံရုမ်ဂပ်ပုဟ်။ ဟွံရုပ်တှ်ေ အ္စာ၊အ္စာၝောံလ္ၚဵုတအ် ဂၠါဲတိုန်လှုဲအိုတ်ရ၊ လ္ၚဵုတံဂှ်ပၠန် မိက်ဂွံကဵုကောန်ဇကုလေပ်လိက်တုဲရ ဒးကၠုၚ်ဗ္တောန်ဒၟံၚ် ၚုဟ်ဘာဂှ်လေဝ် က္ဍၚ်။ တုဲတှ်ေ ပရေၚ်ပိုန်ဒြပ်ကြေပ်ဂြတ် အခေါၚ်အရာကမၠောန်ကၟိတ် ဟွံမွဲတုဲ မနွံဂှ်သွံတြး ကောန်ဇာတ်ဇကုလေပ်အာပညာမ္ဂးလေဝ် မုဂွံကၠောန်ဂှ်ဟွံတီ၊ မိမတအ်ဂှ်လေဝ် အကြာဟွံမွဲဂှ် ဒးကဵုဒၟံၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် စပ်ကဵုသ္ဇိုၚ်ဝန်ပရေၚ်ပညာ သၟဝ်တဲကံၚ်ဇြဳပၞာန်တအ် အာတ်မိက်ကၠုၚ်သြန် သာ်ဏံဂှ်တုဲ ယဝ်ဟွံကေတ်အရေဝ်မ္ဂး နကဵုညးသြန်ဟွံမာန်ဂမၠိုၚ် သ္ၚောဲခြာအာကဵုပရေၚ်ပညာမာန်တုဲ အသိၚ်စွံဘာတအ်လေဝ် စှ်ေကၠုၚ်မာန်ရောၚ် ညးဆက်ဟီုရ။
ကံၚ်ဇြဳပၞာန်ဂှ် ၜိုန်ဟီုဒၟံၚ်သၞောတ်ပရေၚ်ပညာ ဟွံဒးကဵုၚုဟ်ကီုလေဝ် အာတ်မိက်ကၠုၚ်ဒၟံၚ်သြန်တအ် နွံဂှ်ရ နကဵုဂြောဝ်ဂတာ မကၠုၚ်နူကဆံၚ်မၞိဟ်သ္ဇိုၚ်ဂမၠိုၚ် ဂွံစွံဘာဂှ် ဒှ်ကၠုၚ်အခက်အခုဲတုဲ ယဝ်အာတေၚ်မ္ဂးလေဝ် အာဇီုကပိုက်ကဵု ပရေၚ်ပညာကောန်ၚာ်ဇကုမာန်ဂှ်ရ ဒးသ္ၚိတ်ဒၟံၚ်ရောၚ် မိမကွးဘာဂမၠိုၚ် ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဂှ်တှ်ေ ကောန်ၚာ်အဝဲမံၚ်ဘာဂမၠိုၚ် ပအပ်ဘာမ္ဂး မ္ၚးနူသၞောတ်ပရေၚ်ပညာ ဟွံဒးကဵုၚုဟ်ဂှ် စနူကဵုလိက်ဗွဟ်၊ လိက်ချူ၊ တဝ်ဖကောဝ်၊ တဝ်မှၚ်တံဒှ်တမ် ထံက်ပၚ်ကဵုအာ မသက္ကုၚုဟ်ရောၚ် သ္ဂးလဝ်ရ။
လ္တူဍုၚ်မတ်မလီုဂှ် ဘာသ္ဇိုၚ်ပရေၚ်ပညာ၊ ဘာတန်သၠုၚ်ပူဂဵု ကေုာံ ဘာပရေၚ်ပညာသၚ်ဗ္တောန် မပါလုပ်ဂှ် ဘာ နွံဒၟံၚ် ၂၀၀ ပြၚ်ရောၚ် ဂွံတီကေတ် အတိုၚ်တၚ်နၚ် နူကဵုရုၚ်သ္ကိုပ်အုပ်ဓုပ်ကာနာနာ ပွိုၚ်ဍုၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI