မတ်မလီု၊ ဂျောန် ၂၆
ပ္ဍဲတွဵုရးဍုၚ်မန် အခိၚ်ကာလမရပ်ဒက်ဒၟံၚ်ယာန်လာၚ်ဇြေန်ဟွံမွဲဂှ် ဒပ်ပၞာန်၊ ဗၠာဲသၟိၚ်၊ ဗၠာဲသၟိၚ်ထိၚ်ယာန် ကေုာံ သ္ဇိုၚ်ဝန်ကံၚ်ဇြဳပၞာန် တံဒှ်တမ် ဍိုက်ကၠုၚ်ကွဳလာၚ်ဇြေန်ဟွံမွဲ ဂၠိုၚ်ကၠုၚ်ဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံကံၚ်ဇြဳပၞာန်ပံၚ်ကောံဂှ်ဝွံ ရပ်ကၠုၚ်ကွဳလာၚ်ဇြေန်ဟွံမွဲ ကွဳညးဍုၚ်ကွာန် အပ္ဍဲဒေသတံဂှ်တုဲ သီကေတ်လဝ်တုဲဂှ် ဟွံပအပ်ကဵုကၟိန်ဍုၚ်မွဲသာ် ရပ်စပ်ကၠုၚ်ဒၟံၚ် သွက်ဒတုဲဖဵုညးတံရ။
ပ္ဍဲဒၞါဲရပ်ဒက်ဒၟံၚ် ယာန်လာၚ်ဇြေန်ဟွံမွဲတံဂှ် အတိုၚ်စေဝ်ပၞောန်ကံၚ်ဇြဳပၞာန်မ္ဂး မွဲတ္ၚဲ ဗွဲတွဵုမအောန် ဒးပအပ်ကဵုယာန်လာၚ်ဇြေန်ဟွံမွဲတအ်ဏံ ၅ ဖ္ဍိုက်ဏောၚ် စၞောန်လဝ်ကီုလေဝ် ယဝ်ရပ်ဂွံဂၠိုၚ်မ္ဂး မၞိဟ်ကဆံၚ်သၠုၚ်ၚ်တံသၟးဟွံက စဵုကဵုကဆံၚ်ကောန်ဒပ်တအ်ဂှ် ပါ်ပရအ်တုဲဍိုက်ဒၟံၚ်အိုတ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ဗွဲကြဴဏံ သ္ဇိုၚ်ဝန်ကံၚ်ဇြဳပၞာန် ဍိုက်ကၠုၚ်ယာန်လာၚ်ဇြေန်ဟွံမွဲ ဂၠိုၚ်ကၠုၚ်တုဲ ပြဝဏံဝွံ ဝးပကဝ်ဒၟံၚ်သၞောဝ်ဏောၚ်ဂှ် ဟီုကၠုၚ်ရ။
“အလဵုဍေံတံဂှ် ဍိုက်ဒၟံၚ်ကွဳစက်လာၚ်ဇြေန်ဟွံမွဲတံဂှ်ရ။ သၞောဝ်တအ်ဂှ်လေဝ် နွံဒၟံၚ်ရ။ ဆ္ဂး လၟုဟ်ဂှ် ဍိုက်ဒၟံၚ်ညးသ္ကအ်ဖိုဟ်။ ပ္ဍဲကဵုဍုၚ်ပိုယ်ဂှ်တှ်ေ ဗၠာဲသၟိၚ်ကီု ဒပ်ပၞာန်ကီု သီုဖအိုတ်ဂှ် ဍိုက်မံၚ်လာၚ်ဇြေန်ဟွံမွဲဖအိုတ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် ဂကောံကံၚ်ဇြဳပၞာန်ပံၚ်ကောံတအ် ပ္ဍဲအရာရပ်ဒက်ယာန်လာၚ်ဇြေန်ဟွံမွဲဂှ် ကွဳလာၚ်ဇြေန်ဟွံမွဲ မဒှ်ကွဳမၞိဟ်မကြပ်ကဵုညးတအ်ဂှ်တှ်ေ သီကေတ်ကွဳဂှ်တုဲ ကေတ်သၠုဲတုဲ ကလေၚ်ဗလးကဵုဒၟံၚ်မၞိဟ်ဂှ် နွံဒၟံၚ်ရောၚ် ညးဆက်ဟီုရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ကံၚ်ဇြဳပၞာန် ၜိုန်ဟီုလဝ် ကေတ်အာအရေဝ် ကုကွဳယာန်လာၚ်ဇြေန်ဟွံမွဲတအ် ဗွဲမစိုပ်တရဴဏောၚ်ကီုလေဝ် အလဵုညးတအ် ရပ်စပ်စကာဒၟံၚ်ယာန်ကွဳစက် မရပ်ဂွံလဝ်နူညးဍုၚ်ကွာန်တံဂှ်တုဲ သၞောဝ်ကံၚ်ဇြဳပၞာန်ဝွံ ဟွံဗဗွဲဓဝ်ပုဟ်ဂှ် ပါ်ပါဲလဝ်ရ။
“ပတိတ်လဝ်အမိၚ် ဍိုက်ကွဳလာၚ်ဇြေန်ဟွံမွဲဟွံဂွံ ကေတ်အာအရေဝ်ကွဳလာၚ်ဇြေန်ဟွံမွဲတံဂှ်ဏောၚ်တုဲ အလဵုမၞိဟ်ရပ်ဒၟံၚ်ဂှ် ဍိုက်ကၠုၚ်ကွဳလာၚ်ဇြေန်ဟွံမွဲတံဂှ်တုဲ ကၠောန်စဒၟံၚ်ကဵုမတအ်ဏံရဟီုတှ်ေ သၞောဝ်ဂှ် ညးဍုၚ်ကွာန်တအ်သၟး ဒးဒ္ဂေတ်ဗက်တုဲ ဍေံတအ် ဟွံဒးဒ္ဂေတ်ဗက် ဗီုဏံဟာ။ ဒှ်ဒၟံၚ်သၞောဝ်မွဲလ္ပာ်ဓဝ်။ သၞောဝ်ဗဗွဲဓဝ် ဟွံသေၚ်ပုဟ်” သာ်ဝွံ သ္ဂးရ။
အပ္ဍဲဒေသဂှ်တှ်ေ ညးဍုၚ်ကွာန်ဂမၠိုၚ် ဍိုက်ကွဳလာၚ်ဇြေန်ဟွံမွဲတံဂှ်တုဲ ဒးဒုၚ်ရပ်မ္ဂး မ္ၚးနူရပ်ဒက်ယာန်လာၚ်ဇြေန်ဟွံမွဲဂှ် ရပ်ဒၟံၚ်သီုကဵုမၞိဟ် နကဵုသၞောဝ်ဗၞိက်ပၠောပ်ဗၞိက်ပတိတ်တုဲ ဖျေံဒၟံၚ်ဒဏ်ထံၚ် အောန်အိုတ် ပွိုၚ်မွဲဂိတုရ။
ဟိုတ်နူတၚ်စၞောန်က္ဍိုပ်သ္ကိုပ်ပၞာန် သွက်ဂွံရပ်ဒက်ယာန်လာၚ်ဇြေန်ဟွံမွဲဂှ်တုဲ သ္ဇိုၚ်ဝန်ကံၚ်ဇြဳပၞာန်ဂမၠိုၚ်ဝွံ နူပွမရပ်ဒၟံၚ်ယာန်လာၚ်ဇြေန်ဟွံမွဲဂှ် ဒှ်ကၠုၚ်ပၞော်သြန်လုပ်မွဲတုဲ ဍိုက်ကၠုၚ်ဒၟံၚ်ကွဳလာၚ်ဇြေန်ဟွံမွဲတအ်ဏံ ညံၚ်ရဴဗဗွဲဒၟံၚ်ကဵုသၞောဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ