နေဗျဳဒဝ်၊ ဂျောန် ၂၆
ပ္ဍဲကဵုတန်ဗ္တောန်ကွတ် ဗီုသ္ဂောံရပ်စပ်ဒရုၚ် ဒပ်ကံၚ်ဇြဳပၞာန်ဂှ် ရပ်စပ်ဒရုၚ်ထံၚ်ပရိုၚ်မိုက်ခရိုဝ်သွာၚ်ပၞာန်တုဲ ပ္ကတ်ပ္ကေၚ်ဒၟံၚ်ရောၚ် ပ္ဍဲဂိတုဂျောန် ၂၄ တေံ ဂကောံလ္ၚတ်ကေၚ်ကာပၞာန်ဗၟာ ကေုာံ ပရေၚ်ဂီုကၠီု MDSI လလောၚ်ပ္တိတ်ကဵုကၠုၚ်သမ္တီ ပ္ဍဲဂိတုဂျောန် ၂၄ တေံရ။
တၞဟ်နသ္ဂောံခၠေဝ်ပလန်ကၠုၚ် ကုနဲကွတ်ပညာဒရုၚ် ဒပ်ပၠန်ဂတးတအ်ဂှ်တုဲ ပ္ဍဲကဵုဒပ်ပ္ကတ်ပ္ကေၚ်ကွတ်ပၞာန်သ္ဇိုၚ် စၟတ် (၃) ဖျေံသ္ဇိုၚ်ယျမေဝ်တေန်ဂှ် ဒပ်ကံၚ်ဇြဳပၞာန် ပံက်ကၠုၚ်တန်ဗ္တောန်ဗီုသ္ဂောံရပ်စပ်ဒရုၚ် အဆက်က်တုဲ ဗ္တောန်ကဵုဒၟံၚ် ကောန်တန်ဗ္တောန် နူကဵုဒပ်ဒရုၚ်တံကဵု ၝောံဒပ်ခလရတအ်ရ။
နိဿဲကေတ် ဂလာန်တမ်ရိုဟ်ပရိုၚ်အပ္ဍဲဒပ်တံဂှ်တုဲ ဒရုၚ်ထံၚ်ပရိုၚ်မိုက်ခရိုဝ်ရပ်ပ္ဍဲသွာၚ်ပၞာန် မကော်ဂး Military Micro Drone ဂှ် ပတိတ်နူဍုၚ်ကြုက်တုဲ ဒှ်ဒရုၚ်ထံၚ်ပရိုၚ် (Rotary UAV) ဗီုပြၚ်က္ၜၚ်ကျာသၞေၚ်ဝဲဍောတ်တ်ဏောၚ်ဂှ် MDSI သ္ၚဳဂၠိပ်လဝ်ရ။
ဗတောန်ကဵုဒၟံၚ် ကောန်တန်ဗ္တောန်ဒရုၚ်ဂမၠိုၚ် သီုကဵုလိက် သီုကဵုနတဲတုဲ ကောန်ဒပ်တိုန်လဝ်တန်ဗ္တောန်ကွတ်ပၞာန် မၞုံကဵုသ္ဇိုၚ်လ္ပာ်နဲကွတ်ပညာတံဂှ်လေဝ် ကော်ပတိတ်တုဲ ကဵုပကတ်ပကေၚ်ဒၟံၚ်ရ။
မၞိဟ်တိုန်တန်ဗ္တောန်တုဲအာတံဂှ် ပကောံကၠေံ နဒဒှ်ဂကောံဒရုၚ်တုဲ ကဵုတာလျိုၚ်တုဲ ဗလးဏာဒၟံၚ် ဇရေၚ်ဌာန်ဂအုပ်ၝောံဒပ်(တမခ) ၊ ဌာန်ဂအုပ်ကောပ်ကာဲပရေၚ်ပၞာန် ကေုာံ ဗလးဏာဒၟံၚ် ပ္ဍဲတိဍာ်ဒှ်ဒၟံၚ်ပေါဲဗ္တိုက်တံဂှ်ရောၚ် တၚ်နၚ်နူကဵု MSDI ထ္မံက်ထ္ၜးဒၟံၚ်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ ကောန်ဒပ်ကံၚ်ဇြဳပၞာန်ဂမၠိုၚ်ဝွံ အခါသ္ပအပြံၚ်အလှာဲဒပ် ပါလုပ်သီုကဵုဇွောံမတံဂှ် ဒးဒုၚ်ဗ္တိုက်ဒၟံၚ်တုဲ ထံၚ်ပရိုၚ်နကဵုဒရုၚ်ရမျာၚ်ဗြုအောန်တံဂှ်တုဲ စဳဇန်လဝ် သွက်ဂွံကၠောန်သ္ပအပြံၚ်အလှာဲပရေၚ်ပၞာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ အခိၚ်ဍေံတံပလံၚ်ဇွောံမကီု အခိၚ်ၚးတးတိဍာ်ကီု အခိၚ်ဗပေၚ်ဇြဟတ်ကီု သ္ပအပြံၚ်အလှာဲဒပ်ကီု အခိၚ်ကၠောန်သာ်ဏံဂှ် ဒးကၠုၚ်မံၚ်ဂၠိုၚ်။ ဟိုတ်ဂှ်ရ ရပ်ဒရုၚ်ထံၚ်ပရိုၚ်တံဂှ်တုဲ ကၠောန်အာအစဳဇန် ဂွံသ္ပအပြံၚ်အလှာဲပရေၚ်ပၞာန်တံဂှ်ဏောၚ်၊ အရိုဟ်တွဵုမ္ဂး စကာဒရုၚ်မ္ဂး ရမျာၚ်ဗြုဒၟံၚ်။ တုဲမ္ဂး တီကေတ်မာန်မံၚ်။ ဒရုၚ်တံဏံဂှ်တှ်ေ ဍောတ်ညိတုဲ ရမျာၚ်ဗြုအောန်ညိဏောၚ်။ ပဝ်သၠုၚ်ၚ်တှ်ေ ဂကောံသၟဝ်တံဏံ ဟွံတီပုဟ်။ ပ္ဍဲကဵုဍေံဂှ် စုတ်လဝ်ဂကူကေမ္မရာခိုဟ်ဟ် 4K ဂှ် ပိုယ်တံ ဂွံတီကေတ်လဝ်ညိညရ” သာ်ဝွံ သ္ဂးရ။
ကြဴနူပရေၚ်ပၞာန် ၁၀၂၇ တုဲဂှ် ကံၚ်ဇြဳပၞာန် သ္ပလဝ်အပြံၚ်အလှာဲ နဲဗျူဟာပၞာန်တံဂှ်တုဲ စနူသၞာံ ၂၀၂၄ မံက်တေံတုဲ ရပ်စပ်ကၠုၚ်ဒၟံၚ် နဲကွတ်ပညာကဆံၚ်သၠုၚ်တံကဵု ပရေၚ်ပၞာန်လ္တူကျာတအ်ရ။
ကံၚ်ဇြဳပၞာန် သုၚ်စောဲကၠုၚ်ဒရုၚ်ထံၚ်ပရိုၚ် ပ္ဍဲကဵုဒၞါဲဂကောံပၠန်ဂတးတအ် ချဳဒရာၚ်တအ်ကဵု တိဍာ်မထိၚ်ဒက်ဂွံလဝ်တံဂှ်တုဲ ထောံဂြာတ်မခတိုဟ် နူကဵုပၞာန်ကျာကီု၊ ဗ္တိုက်ကဵုဒရုၚ်ဒုၚ်ချိုတ်တံကီု တုဲပၠန် ကၠောန်ကၠုၚ်ဒၟံၚ်ပရေၚ်ပၞာန်လ္တူကျာ နကဵုက္ဍိုၚ်ကျာစုတ်လဝ်စက်တံရ။
အတိုၚ်တၚ်နၚ် MDSI ဂှ်မ္ဂး ပ္ဍဲကဵုတန်ဗ္တောန်ဒရုၚ်တအ်ဂှ် ကံၚ်ဇြဳပၞာန် ရာန်ကေတ်လဝ် ဂကူဒရုၚ်ထံၚ်ပရိုၚ် DJI, Autel, VTOL Fixed wing UAV ၊ ဂကူဒရုၚ်သွက်ဂွံဗတိုက် Quadcopter ကေုာံ Hexacopter ၊ ဂကူဒရုၚ်ဒုၚ်ချိုတ် Delta Wing Suicide တအ် ဗွဲမဂၠိုၚ်ရ။
ရပ်စပ်ဒရုၚ်ဂကူစုၚ်ဇဳတုဲ လ္ပာ်ပ္ကတ်ပ္ကေၚ်ဗ္တောန်ကဵုဂှ်တှ်ေ အလဵုသၞာဲဒဴ နူကဵုဂအုပ်ရုၚ်ပၞာန်တအ် ကၠုၚ်စိုပ်ကောပ်ကာဲတုဲ ပကတ်ပ္ကေၚ်ကဵုဒၟံၚ် အ္စာထ္ၜးနဲ ကေုာံ ကောန်တန်ဗ္တောန်ဂမၠိုၚ် ၜိုတ် ၂၀၀ လၟေၚ်တ္ၚဲရောၚ် သ္ဂးရ။
ဍုၚ်ဇြဟတ်ဇၞော် ဍုၚ်ကြုက်၊ ဍုၚ်ရုယှာ၊ ဍုၚ်အိန္ဒိယ မပါလုပ် သီုကဵုဍုၚ်ဗဴလာရုသ် မဒှ်ဍုၚ်ဒက်လဝ်မိတ် ကုကံၚ်ဇြဳပၞာန်တံဂှ်တှ်ေ ပ္ဍဲအရာကဵုအရီုဗၚ် သ္ဂောံပကတ်ပကေၚ်ဗ္တောန်ကဵု နဲကွတ်ပညာဒရုၚ်တံဂှ် ပါလုပ်ကၠုၚ်မာန်ရောၚ် နူဗွိုၚ်ဒပ် CDM တအ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−TRC