ပ္ဍဲကွာန်ကညုၚ်ကျောန် (ကညုံကျွန်း) ဂှ် ဒပ်ပၞာန် လုပ်ဂၠိုက်ဂၠါဲလဝ် သ္ၚိ ၁၀၀ မပြၚ်

လံၚ်လုၚ်၊ ဂျောန် ၂၇

ဒပ်ကံၚ်ဇြဳပၞာန် လုပ်စိုပ်ဖျေံလဝ်ဒပ် ပ္ဍဲကွာန်ကညုၚ်ကျောန် ပွိုၚ်ဍုၚ်လံၚ်လုၚ် ရးတၞၚ်သဳဂှ် လုပ်စိုပ်ဂၠိုက်ဂၠါဲလဝ် သ္ၚိအပ္ဍဲကွာန် ၜိုတ် ၁၀၀ မပြၚ်ဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကဵုကွာန်ဂှ် ကြဴနူဆုတ်ကလေၚ်အာ နူကဵုကွာန်ဂှ်တုဲ ပ္ဍဲဂိတုဂျောန် ၂၅  လုပ်စိုပ်ဂၠိုက်ဂၠါဲ ဗတးဗတန်ဏာလဝ်ဂှ် အခိၚ်ကောန်ကွာန်ဂမၠိုၚ် စဴသ္ၚိဂှ် ဂွံဆဵုကေတ်ရ။

အတိုၚ်ဂလာန်ညးဒေသတံဂှ်မ္ဂး သ္ၚိဗ္ဒါဲကြပ်ဖအိုတ် အပ္ဍဲကွာန်ကညုၚ်ကျောန်ဂှ် ဒးဒုၚ်ဂၠိုက်ဂၠါဲလဝ်တုဲ ကပေါတ်မၞုံကဵုၚုဟ်မး ဗွဲမဂၠိုၚ် ကၠေံအာလဝ်ရ။

ကောန်ဒပ်ကံၚ်ဇြဳပၞာန်ဂမၠိုၚ် တိတ်အာနူကဵုကွာန်ကညုၚ်ကျောန်တုဲဂှ် ကွဳလိုန်ဓာတ်၊ ဗၞိက်စၞစသုၚ်၊ ဂၠိက်ယာတ်တန်ၚုဟ်မးဂမၠိုၚ်၊ ကပေါတ်ကိရိယာသ္ၚိဂမၠိုၚ် ကၠေံခၞၚ်ဒၟံၚ်နွံဂှ် ဂွံတီကေတ်ရ။

သ္အာၚ်နူဂှ်ပၠန် သ္ၚိပ္ဍဲကွာန် ၂ မလေဝ် ပၟတ်တူလီုအာလဝ်နွံဂှ် ဂွံတီကေတ်တုဲ ကောန်ကွာန်ပါဲမံၚ်ဘဲပၞာန် ၜိုတ်ညိညရ ဂွံကလေၚ်စဴမံၚ်လဝ်ပ္ဍဲကွာန်ဂှ် ဂွံတီကေတ်ရ။

တုဲကၠုၚ်ဂိတုဂျောန် ၁၃ တေံ ဒပ်ကံၚ်ဇြဳပၞာန် ဇြဟတ်မၞုံ ဗ္ဒါဲ ၂၀၀ ဝွံ ပန်ကၠုၚ်ကဵုလွဟ်ဇၞော်၊ လွဟ်ဍောတ် ပ္ဍဲကွာန်ကညုၚ်ကျောန်ဂှ်တုဲ ညးဒေသ ကြပ်အလုံကွာန်မွဲ ထောံလသာဌာန်ဒၟံၚ် ဒးဂြိပ်ဒဴလဝ်ရ။

ပရိုၚ်−သြၚ်လောန်တိုၚ်(မ်)

ဗီုရုပ်−CJ