မတ်မလီု၊ ဂျောန် ၂၇
ပ္ဍဲဍုၚ်ဗၟာ တိချဳအာလဝ် ပ္ဍဲဂိတုမာတ် ၂၈ တေံတုဲ အပ္ဍဲပွိုၚ်ပိဂိတုဂှ် ဟိုတ်နူကံၚ်ဇြဳပၞာန် ထောံကၠုၚ်မခတိုဟ် ဗ္တိုက်ကၠုၚ်ကဵုပၞာန်ကျာတုဲ ညးဍုၚ်ကွာန်ကောန်အရာပ် ၅၀၀ ပြၚ် ချိုတ်အာလဝ်ရောၚ် ဌာနဝန်ဇၞော်အခေါၚ်အရာမၞိဟ် NUG လလောၚ်ပ္တိတ်လဝ်ရ။
နူဂိတုမာတ် ၂၈ စဵုကဵုဂိတုဂျောန် ၂၀ ဂှ် နဗ္ၜတ်အလုံဍုၚ်မွဲ ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ ၆၂၂ ဝါပြၚ် နွံတုဲ ရးသက်ကိုၚ်ဝွံ ဒးဒုၚ်ဗတိုက်လဝ် ကဵုပၞာန်ကျာဂၠိုၚ်အိုတ် ၁၄၁ ဝါရ။
အပ္ဍဲပရေၚ်ဗ္တိုက်ကဵုပၞာန်ကျာဂှ် ညးဍုၚ်ကွာန်ကောန်အရာပ် ၅၀၁ တၠ ချိုတ်အာလဝ်တုဲ ၁၀၅၇ တၠ ဇီုကပိုက်ကလိဂွံလဝ်ဝပ်တုဲ ပ္ဍဲကဵုဏံ ကောန်ၚာ်သၟတ် ၇၆ တၠ ပါလုပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ဂကူ NUG ရ။
ပရေၚ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာဂှ်ဝွံ ပါဲနူနေဗျဳဒဝ်တုဲ ဗတိုက်ကၠုၚ်လဝ် ရးဒေသ ကေုာံ တွဵုရးသီုဖအိုတ်တအ်ဂှ်တုဲ ဗွဲမဂၠိုၚ်ဝွံ စွံပွန်လ္ပာ်ကောန်အရာပ်တံဂှ်တုဲ ဗ္တိုက်လဝ်ရောၚ် သ္ဂးရ။
အတိုၚ်စၟတ်သမ္တီ BNI- Myanmar Peace Monitor ဂှ်မ္ဂး စနူသၞာံ ၂၀၂၁ ဂိတုမာတ်တုဲ ဒပ်ကံၚ်ဇြဳပၞာန် စစကာကၠုၚ်လဝ် ပၞာန်ကျာတံဂှ်တုဲ နူဏံ အခိၚ်ဒးဆောံလေၚ်ကၠုၚ် ဗ္ဒိုပ်ဒပ်၊ ကောန်ဒပ် ဗွဲမဂၠိုၚ်ဂၠေၚ်တုဲဂှ် စကာကၠုၚ်ပၞာန်ကျာ ဗ္တိုက်ကၠုၚ်ဂှ် ဂၠိုၚ်ကၠုၚ်ရ။
မွဲဒမြိပ်ကာလသီအဝဵု စဵုကဵုသၞာံဏံ ဂိတုဨပရဴ စၟတ်တ္ၚဲ ၂၂ ဂှ် လၟေၚ်ဒဒှ်ကံၚ်ဇြဳပၞာန် ဗတိုက်ကၠုၚ်လဝ်ကဵုပၞာန်ကျာ ဂှ် ၂၀၉၀ ဝါပြၚ် နွံလဝ်တုဲ ညးဍုၚ်ကွာန်ကောန်အရာပ် ဗ္ဒါဲ ၂၁၅၀ တၠ ဒးချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ