နေဗျဳဒဝ်၊ ဂျောန် ၂၇
ပ္ဍဲကဵုဝှဝ်ရာမ်ပရေၚ်ၜိုဟ်လလမ် မကၠောန်ဗဒှ်ဒၟံၚ် ပ္ဍဲနေဗျဳဒဝ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဥက္ကဌကံၚ်ဇြဳပၞာန်ဂှ် ကော်ဘိက်ကၠုၚ် ဂကောံဇြဟတ်ပၠန်ဂတးရပ်လွဟ်ဂမၠိုၚ် သွက်ဂွံဆေၚ်မုက် ဆဵုဂဗသဳကၠဳပရေၚ်ၜိုဟ်လလမ်ရ။
ကမ္မတဳပညဳပညပ်ထ္မံက်ရုပ်ရဴ ပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ NSPNC အာက္ဍိုပ်တုဲ ကၠောန်ဗဒှ်လဝ် ဝှဝ်ရာမ်ပရေၚ်ၜိုဟ်လလမ် သၞာံ ၂၀၂၅ မပံၚ်ပကောံ ပရေၚ်ၜိုဟ်လလမ်၊ ပေါဲရုဲမာဲ ကေုာံ သၞောတ်ဖေဝ်ဒရာတုဲ ပတဝ်အာစဵုစိုပ်ကၟိန်ဍုၚ်တၟိ မၞုံကဵုပရေၚ်ၜိုဟ်လလမ်တုဲ ညးဟီုဏာလဝ် ပ္ဍဲကဵုဂလာန်ပံက်အသေအဟာန် ပေါဲသ္ၚဳဂၠိပ်သဳကၠဳဏံ ပ္ဍဲဂိတုဂျောန် ၂၅ ဂှ်ရ။
က္ဍိုပ်သ္ကိုပ်ပၞာန်ဂှ်တှ်ေ သွက်ဂွံဓမံက်ရုပ်ရဴဒဳမဝ်ကရေဇြဳဂှ် ဓဝ်ၜိုဟ်သြိုဟ်ညိၚ်ဝတ်ဂှ်ဝွံ ဒှ်တၚ်နွံပၟိက် ဇၞော်ကဵုဇြဟတ်မွဲတုဲ ဆဵုဂဗညးသ္ကအ်အလဵုပူဂဵုတုဲ သွက်ဂွံလှာဲဂတးသဳကၠဳအာ ဗွဲမတပ်တးဂှ် နွံပၟိက်ရောၚ် ဟီုရ။
နကဵုကံၚ်ဇြဳပၞာန် ပ္ဍဲအရာဓမံက်ရုပ်ရဴပရေၚ်ၜိုဟ်လလမ်ဂှ် ဒ္ဂေတ်ဗက်အာ သၞောဝ်သ္ဇိုၚ်ကၟိန်ဍုၚ် ၂၀၀၈ ကဵု လိက်ကသုက်ဒေါအ်ပန်ပှော်အလုံဍုၚ်မွဲ NCA ဂှ်အဓိကတုဲ ဂါံကွာ်ဒၟံၚ်ရောၚ် သ္ဂးရ။
ဟိုတ်ဂှ်ရ အိုဿီုကဵုဂကောံရပ်လွဟ်ဂမၠိုၚ် သွက်ဂွံပညဳပညပ်ဂၠါဲအာသွဟ် အကြာတၚ်နွံပၟိက်ညးတအ်ကဵု အရာမဒှ်ထေက်တအ် နကဵုနဲကဲပရေၚ်ဍုၚ်ကွာန်ဂှ် က္ဍိုပ်သ္ကိုပ်ပၞာန် ဖတိုက်ဖ္အောဝ်လဝ်ရ။
ကြဴနူပၞာန်သီအဝဵုတုဲ ဒဵုကဵုတ္ၚဲဏံ ပ္ဍဲအရာကံၚ်ဇြဳပၞာန် ကော်ဘိက်ကၠုၚ်ဂကောံရပ်လွဟ်ဂမၠိုၚ် သ္ဂောံသဳကၠဳပရေၚ်ၜိုဟ်လလမ် တၞဟ်နသ္ဂောံရုန်တိတ် နူကဵုအကြေပ်အဂြတ် ညးတအ်မဒးဆေၚ်ဒၟံၚ်မုက်တံဂှ် ဖျဝ်ဖျေံလဝ်သၞောဝ်အစာံဂမၠိုၚ် ဟွံမွဲဂှ် ဂွံဆဵုကေတ်ရ။
ရံၚ်အာကဵု အရာမဒးဆောံလေၚ် မဒးက္တဵုဒှ်ဒၟံၚ်ပ္ဍဲကၟိန်ဍုၚ်ဏံ သ္ပဟိုတ်နူဂၠံၚ်တရဴရပ်လွဟ် ကေုာံ ပြဝပကီုပရာပ်တံဂှ်တုဲ ပံၚ်တောဲကဵုညးဍုၚ်ကွာန်တအ်တုဲ သွက်ဂွံထ္မံက်အာရုပ်ရဴ ပရေၚ်ၜိုဟ်လလမ်ထာဝရ ကေုာံ ပရေၚ်ဇၞော်မောဝ်ဂှ် နွံပၟိက်ရောၚ် က္ဍိုပ်သ္ကိုပ်ပၞာန် ဟီုရ။
ဟိုတ်ဂှ်ရ နကဵုဂကောံရပ်လွဟ်ကောန်ဍုၚ်အရၚ် ကေုာံ ဂကောံ PDF ဂမၠိုၚ် ထောံလသာကၠေံ ဂၠံၚ်တရဴရပ်လွဟ်တံဂှ်တုဲ နူကဵုဂၠံၚ်တရဴဗော်ပရေၚ်ဍုၚ်ကွာန် ကေုာံ ပေါဲသဳကၠဳဂှ်မွဲကဆံၚ် သွက်ဂွံသောၚ်ကလးအာ ပြဒ္ဒညာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ဂှ် ကော်ဘိက်ကၠုၚ်လဝ် ဂၠိုၚ်ၚ်ကဵုဝါရောၚ် သ္ဂးရ။
ပ္ဍဲအရာကော်ဘိက်ကၠုၚ်ဏံဂှ် လ္တူဂကောံရပ်လွဟ် မပၠန်ဂတးဒၟံၚ် ကုသၞောတ်တၠအဝဵုပၞာန်တအ်ဂှ် စကာဏာလဝ်ဝေါဟာ ဂကောံရပ်လွဟ်ကောန်ဍုၚ်အရၚ် မဒစဵုဒစးဗ္တိုက်ဒၟံၚ်ကၟိန်ဍုၚ်၊ ဂကောံပကီုပရာပ်ကတဵုသပုန်၊ ဂကောံ PDF ပကီုပရာပ်တံရ။
အခါဂါံကွာ်အာ သၞောတ်ဒဳမဝ်ကရေဇြဳဗော်ဇဳဂှ် မွဲကုမွဲ လစွံစိုတ်ထ္ကးပြး နွံမာန်ကီုလေဝ် အာတ်မိက်ဒၟံၚ် အရာဇကုမၞုံပၟိက်ဂမၠိုၚ် နကဵုဂၠံၚ်တရဴရပ်လွဟ်ဂှ်ဝွံ ဒှ်ဂၠံၚ်တရဴဗၠေတ်မှာဒၟံၚ်ရောၚ် က္ဍိုပ်သ္ကိုပ်ပၞာန် သ္ဂးရ။
ဣဏံဝွံ ဒှ်ဒၟံၚ်ညံၚ်ရဴသ္ပထောံမၛ္ဇဟ် လ္တူပရေၚ်က္ဍိုပ်သ္ကိုပ်ပၞာန် ပပဓာန်ကဵုလွဟ်တုဲ သီကေတ်လဝ်အဝဵုကၟိန်ဍုၚ်၊ ထ္ၜးဟိုတ်ကဵုမမာဲဟွံဓဝ်ယာတုဲ ဂွံဒက်ပ္တန်ကံၚ်ဇြဳပၞာန်မာန် ဗီုပြၚ်မသောၚ်ကလးကၠုၚ်လဝ် ပြဒ္ဒညာပရေၚ်ဍုၚ်ကွာန် နကဵုဂၠံၚ်တရဴရပ်လွဟ်တအ်ဂှ်ရ။
ဆ္ဂး က္ဍိုပ်သ္ကိုပ်ပၞာန်ဂှ်တှ်ေ ပြဒ္ဒညာပရေၚ်ဍုၚ်ကွာန်ဂှ် ဂၠါဲအာသွဟ် နကဵုပေါဲဆဵုဂဗသဳကၠဳ လ္တူဝိုၚ်တက်ကျာရဟေၚ် ဂွံဏောၚ်တုဲ ပံက်လဝ်ဂၠံၚ် သွက်ပေါဲသဳကၠဳပရေၚ်ၜိုဟ်လလမ် လၟိုန်ရောၚ် ကဵုလဝ်သမ္တီ နူကဵုဝှဝ်ရာမ်ပရေၚ်ၜိုဟ်လလမ်ဂှ်ရ။
ပ္ဍဲအရာထ္မံက်ကၠုၚ်ပရေၚ်ၜိုဟ်လလမ်ဂှ်လေဝ် ဒးကၠောန်ညံၚ်ဍုၚ်သ္အာၚ် ဟွံဂွံလုပ်ပလာပ်ပထုဲဂှ်ဏောၚ်တုဲ ပရေၚ်ပလီုပလာ်အပ္ဍဲဍုၚ် ညံၚ်ဂွံသောၚ်အးဒၟံၚ်ဂှ်လေတ် ပၟိက်ဇၞော်ရောၚ် ဟီုဏာလဝ်ရ။
စပ်ကဵုပရေၚ်ဆက်ဆောံဍုၚ်သ္အာၚ်တုဲလေဝ် ဂွံဒှ်သဟဇာတ ကုဍုၚ်နာနာတံဂှ် နွံပၟိက်ကီုလေဝ် ညံၚ်ဟွံဂွံစိုပ်အာကဆံၚ်မဒုၚ်သြဇာညးဂှ် ဒးစွံသတိဗွဲတၟေၚ်ရောၚ် သ္ဂးရ။
ဂလာန်ဟီုကၠုၚ်သာ်ဏံဂှ်ဝွံ ဗၠေၚ်ဒၟံၚ်ကဵု အရာကံၚ်ဇြဳပၞာန် မပ္တိတ်ဒၟံၚ်ဇြဟတ် သွက်ဂွံကလေၚ်ကေတ်ဍုၚ်ဇၞော်ဂမၠိုၚ် နူကဵုဒပ်တအာၚ် TNLA မသီဂွံလဝ်ဂှ်ကဵု ဒဒှ်မကံၚ်ဇြဳပၞာန် မကလေၚ်ဂွံလဝ်ဍုၚ်လာယှိုဝ် ဟိုတ်နူအလဵုအသဳကြုက် လုပ်ပလာပ်ပထုဲအကြာ ပ္ဍဲပရေၚ်ဍုၚ်ဗၟာဂှ်ရ။
ပ္ဍဲပေါဲသဳကၠဳ ဝှဝ်ရာမ်ပရေၚ်ၜိုဟ်လလမ်ဂှ်တှ်ေ ပ္ဍဲကဵုဍုၚ်ကံၚ်ဇြဳပၞာန် မဒက်လဝ်မိတ်ဂမၠိုၚ် ဍုၚ်ကြုက်၊ ဍုၚ်အိန္ဒိယ၊ ဍုၚ်ရုယှာ ကေုာံ ဍုၚ်သေံ တံမပါလုပ် ဂကောံရပ်လွဟ်ကောန်ဍုၚ်အရၚ် ဟွံဒှ်ပေါဲဗ္တိုက်ကုဒပ်ပၞာန်ကီု၊ ဗော်ပရေၚ်ဍုၚ်ကွာန်ဂမၠိုၚ် ကေုာံ ဂကောံဗော်သွးတၞဟ်ဟ်တံလေဝ် တိုန်စိုပ်လဝ်ရ။
နူကဵုပေါဲသဳကၠဳဏံဂှ် ပညဳပညပ်ဂၠါဲသွဟ်သဳကၠဳ သ္ၚဳဂၠိပ်ကဵုကသပ်ဂၞန် စပ်ကဵုပရေၚ်ၜိုဟ်လလမ် မဒှ်အဓိကဂှ်တုဲ ဂွံဂွံပရေၚ်ၜိုဟ်လလမ်မတန်အာအဓာန်မဂၠိၚ်သ္ၚောဲ သွက်ဍုၚ်ဗၟာဂှ် နူဝှဝ်ရာမ်ဏံ ဒှ်တဴအထံက်အရီုဏောၚ် က္ဍိုပ်သ္ကိုပ်ပၞာန် စှ်ေစိုတ်ရ။
ဂကောံရပ်လွဟ်ကောန်ဍုၚ်အရၚ် ဒပ်ပၞာန်စဵုဒၞါညးဍုၚ်ကွာန် PDF တအ်၊ ဂကောံရပ်လွဟ်တၞဟ်သ္အာၚ် မဒှ်ဒၟံၚ်ပေါဲဗ္တိုက် ကုဒပ်ပၞာန်ကံၚ်ဇြဳပၞာန်ဂှ်တှ်ေ ဆက်တုဲဒစဵုဒစးလုပ်ဒၟံၚ်ပေါဲဗ္တိုက် ကုသၞောတ်တၠအဝဵုပၞာန်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI