မတ်မလီု၊ ဂျောန် ၂၇
ပ္ဍဲတွဵုရးဍုၚ်မန် သွက်တန်ဗ္တောန်ကွတ်ပၞာန် လၟေၚ် ၁၅ ဂှ် လ္ပာ်ကံၚ်ဇြဳပၞာန် ပကောံကၠုၚ်မၞိဟ်တၟိကီု ဒစးဒုၚ်ပလေဝ်ပလေတ်ဒၟံၚ်ကီု ကၠောန်ဒၟံၚ်ဂှ် ညးဒေသဂမၠိုၚ် ကေုာံ ညးမစုက်လုက်ကဵုကံၚ်ဇြဳပၞာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ သွက်တန်ဗ္တောန်ကွတ်ပၞာန်ကၠုၚ်စိုပ်ဏံဂှ် အပ္ဍဲဂိတုဂျောန် သတ္တာဟလက္ကရဴအိုတ်ဏံ ကော်ကေတ်ကောံဓရီု သ္ကိုပ်အုပ်ဓုပ်ကွာန်အရာပ်မဆေၚ်စပ်တံဂှ်တုဲ စၞောန်ကၠုၚ် သွက်ဂွံပကောံမၞိဟ်တၟိရ။
အပ္ဍဲကောံဓရီုဏံဂှ် နူအခိၚ်လၟုဟ် ညံၚ်လၟိဟ်ၜိုတ်မချိၚ်လဝ် ဂွံပေၚ်ဂှ် သွက်ဂွံပကောံမၞိဟ်တၟိတံဂှ်ကီု၊ သွက်တန်ဗ္တောန်ဂတဂတတေံဂှ်လေဝ် ဒစးဒုၚ်တုဲ ဂွံပကောံလဝ်မၞိဟ်ဂှ် ကဵုလဝ်စၞောန်ရောၚ် ဂွံတီကေတ် နူကဵုညးမစုက်လုက်ကဵုကံၚ်ဇြဳပၞာန်တအ်ရ။
ညးဒေသတွဵုရးဍုၚ်မန်မွဲတၠ ဟွံမိက်ထ္မံက်ယၟုဂှ်တှ်ေ ပ္ဍဲကဵုလၟေၚ်ဒဒှ် ကံၚ်ဇြဳပၞာန် ပကောံကၠုၚ်ဒၟံၚ်ကောန်ပၞာန် လ္ၚဵုတအ်ဂှ် သမ္ဘာတၠသ္ၚိၜါတၠ ဒှ်သၞစိုပ်ရုၚ်မ္ဂး ဒှ်ကၠုၚ်ဒၟံၚ်စဵုကဵုကဆံၚ် ပလံၚ်ဏာဒၟံၚ် ညးမဒှ်တၠသ္ၚိဂှ် အပ္ဍဲဒပ်ပကောံကောန်ပၞာန်ဂှ်ရောၚ် ဟီုရ။
“ပ္ဍဲအရာပ် ဗြဴတြုံဒှ်သၞတုဲ အာတေၚ်ကဵုခါံမသဳ။ ဟိုတ်နူဗ္ၜူကြာန်ဒၟံၚ်တုဲ အာတေၚ်လဝ်။ ခါမ်သဳဂှ်လေဝ် ဟွံတော်လဝ်ဂၠိုၚ် ညးမဒှ်သမ္ဘာဂှ်လေဝ် ဗ္ၜူတုဲရပ်ဏာလဝ်ဂှ်ရ ဂွံၜိုတ်မွဲသတ္တာမ္ဂး ဗလးဏောၚ် မုဏောၚ် ချပ်သာ်ဏံတုဲ အာတေၚ်လဝ်ဂှ် ရပ်ဏာမွဲတဲဓဝ်တုဲ စုတ်ထောံပ္ဍဲဒၞါဲပကောံကောန်ပၞာန်ဂှ်တိုက်ရိုက်။ လၟုဟ်ဂှ် ဒှ်သၞ ဒှ်တိုန်ပရူမွဲမွဲမ္ဂး စုတ်ဏာအဏံဂှ်ဂၠိုၚ်” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာပကောံကောန်ဒပ်တၟိတံဂှ် အခိၚ်ဗ္တံမ္ဂး ရပ်ကၠုၚ်ညးဒေသတအ်ကီု၊ ပ္ဍဲဒၞါဲကၟာတ်လဒဵုလဝ် ဍိုက်ကွဳလိုန်ဓာတ်မၞိဟ်ၜါဟွံဂွံဂှ် ယဝ်ဍိုက်ဒးမၞိဟ်ၜါမ္ဂး ရပ်ကၠုၚ်တုဲ မၞိဟ်ဍိုက်ဒးကွဳလာၚ်ဇြေန်ဟွံမွဲတအ်ဂှ်လေဝ် ရပ်တုဲပကောံဒၟံၚ် နဒဒှ်ကောန်ဒပ်တၟိတၟိဂှ် နွံဒၟံၚ်ရ။
ဒံက်တာသဳရိမန်ဆာန် ဥက္ကဌကမ္မတဳက္ဍိုက်ပ်ပရေၚ်ဍုၚ်ကွာန် ပရေၚ်ပၞာန် ဒပ်စဵုဒၞါဍုၚ်မန် MSDF ဂှ်တှ်ေ ပ္ဍဲတွဵုရးဍုၚ်မန်ဂှ် ပံက်ကၠုၚ်ဒၟံၚ်တန်ဗ္တောန်ကွတ်ပၞာန် အဆက်က်မာန်ဂှ်ဝွံ ဟိုတ်နူချဳဒရာၚ်ပရေၚ်ပၞာန် ဇြဟတ်ဍိုန်နူကဵုတွဵုရးတၞဟ်ဟ်ဏောၚ်ဂှ် ဟီုရ။
“တွဵုရးဍုၚ်မန်ဂှ်တှ်ေ တော်ကဵုတွဵုရးတၞဟ်ဟ်မ္ဂး ပြဟ်ဟ်ဏံ ချဳဒရာၚ်ပရေၚ်ပၞာန် ဂကောံဇြဟတ်ပၠန်ဂတးတအ်ဂှ် ဍိုန်လျဒၟံၚ်ဏီတုဲ ပ္ဍဲအရာပကောံကောန်ဒပ်တၟိတၟိတံဂှ်လေဝ် လောဲနူကဵုရးဒေသ ကေုာံ တွဵုရးတၞဟ်ဟ်တံဂှ်တုဲ ပကောံကၠုၚ်ကောန်ဒပ်တၟိတၟိတံတုဲ ပံက်ကၠုၚ်လဝ်တန်ဗ္တောန်ကွတ်ပၞာန် ဟွံပိုတ်သ္ကုတ်မာန်ရောၚ် မ္ဒးသ္ၚဳဂၠိပ်ဏာရ” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန် ကျဒၟံၚ်ပၞာန် ပ္ဍဲပေါဲဗတိုက် ဒှ်ဒၟံၚ်အလုံဍုၚ်မွဲဂှ်တုဲ လၟေၚ်ဂိတု ပကောံအာဒၟံၚ်ကောန်ဒပ်တၟိဏောၚ်တုဲ နကဵုညးဒေသဂမၠိုၚ် ညံၚ်ဂွိုအ်ဒးဒုၚ်ပကောံပကောန်ဒပ်ဂှ် အာကၠုၚ်စွံသတိအိုတ်ညိဂှ် ညးဖတိုက်ဖ္အောဝ်လဝ်ရ။
မွဲလ္ပာ်ဂှ်ပၠန် ကံၚ်ဇြဳပၞာန် ကျဗြံပ္ဍဲပရေၚ်ပၞာန်တုဲ အခိၚ်ကောန်ဒပ်ညးတအ် ဒးပြဟ်လလုဲဇီုကပိုက် ဂၠိုၚ်ကၠုၚ်ဂှ် သၞာံ ၂၀၂၄ ဂိတုဖေဖဝ်ဝါရဳ ၁၀ တုဲကၠုၚ်တေံဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ကလေၚ်ပၠောပ်လဝ်လမျီု သၞောဝ်ယိုက်လျိုၚ်ပၞာန်ရ။
ကြဴနူပၠောပ်ကၠုၚ်လမျီု သၞောဝ်ယိုက်လျိုၚ်ပၞာန်ဂှ်တုဲ ပ္ဍဲတွဵုရးဍုၚ်မန် ညးတံမထိၚ်ဒက်လဝ်ဂှ် ကံၚ်ဇြဳပၞာန် ပံက်ကၠုၚ်တန်ဗ္တောန်ကွတ်ပၞာန် လၟေၚ်ဂိတုဂှ် စိုပ်ကၠုၚ်စဵုကဵုလၟေၚ် ၁၄ ရ။
အတိုၚ်တၚ်နၚ် နူကဵုဌာန်ပရိုၚ်သြၚ်လောန်တိုၚ်(မ်) ပကောံပကေဝ်လဝ်ဂှ်မ္ဂး ပ္ဍဲတွဵုရးဍုၚ်မန် ပ္ဍဲတန်ဗ္တောန်ကွတ်ပၞာန် ကံၚ်ဇြဳပၞာန်သီအဝဵုတအ် မပံက်လဝ် နူလၟေၚ် ၁ စဵုကဵုလၟေၚ် ၁၄ ဂှ် အပ္ဍဲဒေသ မၞိဟ်ဒးဒုၚ်ပကောံပကောန်ပၞာန်ဂှ် နွံကၠုၚ်ပွဳပွူ စဵုကဵု ၂၃၀၀ ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI