ဖဏံပေန်၊ ဂျူလာၚ် ၃၀
ပရေၚ်ဗ္တိုက်ဒှ်မံၚ်ပ္ဍဲပယျဵုတအ် ဂွံဒေါအ်ဒေၚ်အာဂှ် ကေတ်လဝ်တၚ်တုပ်စိုတ်ကီုလေဝ် ပေါဲဗ္တိုက်ဂမၠိုၚ် ဆက်ဒှ်ဒၟံၚ်ရောၚ် ဒပ်ပၞာန်သေံ ဟီုလဝ်တုဲ တၚ်တုပ်စိုတ်ဒေါအ်ပန်ပှော် ဂွံလဝ်ၜိုတ်ပွိုၚ်မွဲနာဍဳဂှ် လ္ပာ်ကာမ္ဗောဒဳယျာ ဖံက်ပ္ကဝ်လဝ်ရောၚ် ပ္ဍဲဂိတုဂျူလာၚ် ၂၉ တေံ စောဲစပ်လဝ်ရ။
ဆ္ဂး ညးမၞုံအခေါၚ်ဟီုဂး ဒပ်ပၞာန်ကာမ္ဗောဒဳယျာ မာလဳ သဵုချေဝ်ဂှ်တှ်ေ ပ္ဍဲဒေသလဵုမွဲမှ ပရေၚ်ဗ္တိုက်ပန်ပှော်ညးသ္ကအ် ဟွံမွဲဂှ် ဟီုလဝ်ရ။
ပ္ဍဲဂိတုဂျူလာၚ် ၂၈ တေံ ကၠောန်လဝ်ပေါဲသဳကၠဳပရေၚ်ၜိုဟ်လလမ် ပ္ဍဲမလေဝ်ယှာတုဲ ပေါဲဗ္တိုက်ပယျဵုဂွံဒေါအ်ဒေၚ်ဂှ် ပပ္တံနူအခိၚ်သ္ဂာဗ္တံတုဲ သီုၜါဍုၚ် တုပ်လဝ်စိုတ် ဂွံဒေါအ်ပန်ပှော်ရ။
တၚ်တုပ်စိုတ်ဏံ လမျီုစလုပ်တုဲဂှ် ကာမ္ဗောဒဳယျာ ဗ္တိုက်ပန်ပှော်လဝ် အပ္ဍဲပယျဵုသေံရောၚ် ညးမၞုံအခေါၚ်ဟီုဂးဒပ်ပၞာန်သေံ ဝေန်ထာဲ သူဝါရဳ ဟီုရ။
ဣဏံဝွံ ဒှ်ပွဖံက်ပ္ကဝ်တၚ်တုပ်စိုတ်ဂှ်တုဲ ကၠောန်သ္ပလဝ် ညံၚ်ပတှ်ေညးသ္ကအ်ဟွံဂွံရောၚ် ညးမၞုံအခေါၚ်ဟီုဂးဂှ် ဟီုဗပေၚ်လဝ်ရ။
ကြဴနူဂှ်တုဲ ခြာဟွံလအ် သ္ကိုပ်ဝန်ဇၞော်ယာယဳ ဍုၚ်သေံ ပန်တာမ် ဝဳချာယာချာဲ ဟီုကၠုၚ် ကြဴနူပရေၚ်ဗ္တိုက်ဍောတ်တ်ဒှ်အာတုဲဂှ် ပယျဵုၜါဍုၚ်ဏံ ညိၚ်ဝတ်အာယျ မဒှ်ရ။
ပ္ဍဲဂိတုဂျူလာၚ် ၂၈ အခိၚ်ဗ္တံ ၁၂ နာဍဳဂှ် တၚ်တုပ်စိုတ်ဒေါအ်ပန်ပှော် လမျီုလုပ်တုဲ ဒေသပေါဲဗ္တိုက်ဒှ်လဝ်ဂမၠိုၚ် ညိၚ်ဝတ်အာယျဂှ် သ္ကိုပ်ဝန်ဇၞော်ကာမ္ဗောဒဳယျာ ဟောန်မာနက် ချူပ္တိုန်လဝ် ပ္ဍဲမဳဒဳယျာပရေၚ်မၞိဟ် ပ္ဍဲဂိတုဂျူလာၚ် ၂၉ တေံရ။
ညးစၞးဆေၚ်စပ်ကဵုသွာၚ်ပၞာန် သီုၜါဍုၚ်ဏံ ဒဒှ်ရစဳဇန်လဝ် သွက်ဂွံထပ်ပညဳပညပ် ပ္ဍဲဂိတုဂျူလာၚ် ၂၉ တေံဂှ် ဂွံတီကေတ်ရ။
စပ်ကဵုပရေၚ်ကယျာန်ဓဝါန်အကြာၜါဍုၚ်ဏံဂှ်တုဲ ဗ္တိုက်ပန်ကၠုၚ်လဝ် နကဵုက္ၜၚ်ကျာဗ္တိုက်၊ ကမ်လှောဝ်၊ လွဟ်ဇၞော်တံဂှ်တုဲ မၞိဟ်ဟွံအောန်နူ ၃၈ တၠ ချိုတ်အာလဝ်တုဲ လၟိဟ်မၞိဟ် ပိကိုဋ်ပြၚ် ဒးဂြိပ်ဒဴပါဲဒလေတ်လဝ်ရ။
သမ္မတအမေရိကာန် ဒဝ်နေဝ်ထြာမ် လုပ်အကြာပရေၚ်ဏံတုဲ ယဝ်ပရေၚ်ဗ္တိုက် ဟွံဒေါအ်ပုဟ်ဟီုမ္ဂး ပရေၚ်သ္ဂောံဖအောန်ဖျေံ အခေါန်ဖလှာ လ္တူၜါဍုၚ်ဏံဂှ် သဳကၠဳအာဟွံသေၚ်ရောၚ် ကဵုလဝ်သတိရ။
ဍုၚ်ပြၚ်သေတ် မအုပ်ဓုပ်သ္ပလဝ်ကဝ်လဝ်နဳ ဍုၚ်ကာမ္ဗောဒဳယျာဂှ် ဟိုတ်နူသက်လဝ်ပယျဵု ပ္ဍဲသၞာံ ၁၉၀၇ တေံ ဟွံချိုတ်ပၠိုတ်ဂှ်တုဲ ဒှ်ကယျာန်ဓဝါန်ဒၟံၚ်တိဍာ် ကုဍုၚ်ဇိုၚ်ဝုတ်ဒိုဟ် ဍုၚ်သေံတုဲ နူသၞာံ ၂၀၀၈ စဵုကဵုသၞာံ ၂၀၁၁ ဂှ် ပရေၚ်ဗ္တိုက်ဂမၠိုၚ် ဒှ်ကၠုၚ်လဝ် မွဲဏှမွဲဏှရ။
Ref: Agencies