ထဝါဲ၊ အံက်တဝ်ပါ ၃၀
ရးတနၚ်သဳ ပ္ဍဲကဵုကရပ်ဍုၚ်ထဝါဲ ဒပ်ကဝ်မယှေန်ပၞာန်ဗမာ ဒးဒုၚ်ဗတိုက်တုဲ ကောန်သ္ဂၚ်ချိုတ် ၃ တၠ၊ ၉ တၠဒးအာဘဲဝပ်ရဂှ် ကရောၚ်ပၞာန်ဒူရက လလောၚ်ပတိတ်ပရိုၚ်ရ။
လောန်ကၠုၚ်အံက်တဝ်ပါ ၂၂ ကရပ်ဍုၚ်ထဝါဲ ဒပ်ကဝ်မယှေန် ဂေတ်ကၠုၚ်ကၚ်ဂှ် ရဲဂကောံဇြဟတ်ဒပ်ပၠန်ဂတးတံ ကြတ်ဗတိုက်လဝ် မဒှ်ရ။
ပေါဲဗတိုက်အကြာၜါလပါ် ပန်မံၚ်ညးသ္ကံ လအ်အာပွိုၚ် ၜိုတ် ကဝက်နာဍဳ ဒှ်ကၠုၚ်လဝ်တုဲ ရဲလပါ်ဒပ်ကဝ်မယှေန်တံ ဒးဘဲဝပ်ချိုတ်ဂၠိုၚ်အာရ။
တုဲပၠန် ပ္ဍဲအံက်တဝ်ပါ ၂၀ ဂှ်လေဝ် ပွိုၚ်ဍုၚ်ဍာ်ဗု ပ္ဍဲကွာန်ညှေန်ထိုဲ ဒပ်ကဝ်မယှေန်ပၞာန် ကၠုၚ်ဖျေံလဝ်ဒပ်ဂှ် ရဲဂကောံဇြဟတ် ဒပ်ပၠန်ဂတးတံ နကဵုဒရုၚ် ကြဳဖျေံဏာ ၜါဝါရ။
ပ္ဍဲကဵုပေါဲဗတိုက်တံဏံဂှ် ဒပ် DNLA၊ ကရောၚ်ပၞာန်ဒူရက၊ ဒပ်ဒမၠုက် အေဒေန်မှူ တံပံၚ်တောဲ ဗတိုက်လဝ် ဂွံတီရ။
ကၠာဟွံစိုပ်ပေါဲရုဲမာဲဏံ ရဲဂကောံဇြဟတ်ဒပ်ပၠန်ဂတးတံ သၠုၚ်အသိၚ်ဗတိုက်အာ ဒပ်ကဝ်မယှေန်ပၞာန် မဒှ်တုဲ နကဵုညးဍုၚ်ကွာန် သတိပရေၚ်ပၞာန် ညံၚ်ဂွံနွံ ဗတိုက်ဖအောဝ်လဝ်ရ။
တုဲကၠုၚ်အံက်တဝ်ပါ ၂၆ ဂှ်လေဝ် ပ္ဍဲပွိုၚ်ဍုၚ်လံၚ်လုၚ် ဗဒိုပ်ဗၠာဲသၟိၚ် မံၚ်မကာန်ဂှ် ရဲဂကောံဇြဟတ်ဒပ်ပၠန်ဂတးတံ လုပ်ဗတိုက် သီဂွံအာတုဲ စံၚ်ပလီုထောံ ဗ္ဒိုပ်ဂှ်ရ။
ပရိုၚ်-သြၚ်လောန်တိုၚ်မ်
Photo – Social Media