မတ်မလီု ၊ အံက်တဝ်ပါ ၃၀
ပ္ဍဲတွဵုရးမန် သွက်ပေါဲရုဲမာဲကဝ်မယှေန်ပၞာန် ကၠောန်အာဏံ အလံၚ်အမာတ်တံ စှ်ေမံၚ်ပရေၚ်စန်ကီုလေဝ် ညးဍုၚ်ကွာန်တံ စိုတ်ဟွံလုပ်စ ဟၟဲပုဟ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
သွက်အလံၚ်ညးစၞးအမာတ် လုပ်ပြိုၚ်မာဲတံဂှ် စနူအံက်တဝ်ပါ ၂၈ ဒဵုကဵုဒီဇြေန်ဗာ ၂၆ တေံ ပွိုၚ် ၆၀ တ္ၚဲ နူကဵုကဝ်မယှေန်ပေါဲရုဲမာဲကၟိန်ဍုၚ် ကဝ်မယှေန်ပၞာန်သီအဝဵုကဵုလဝ်အခေါၚ် စှ်ေပရေၚ်စန်ဒက်မာဲ မဒှ်ရ။
ပ္ဍဲကဵုဒၞာဲဒေသ စှ်ေပရေၚ်စန်ဒက်မာဲ ဂွံလဝ်အခေါၚ်တံဂှ် အလံၚ်ညးစၞး အမာတ် နူကဵုဗော်လ္ၚဵုလ္ၚဵုတံ စှ်ေဗလးတိ ကဵုဂတိပါၚ်နာနာသာ် စကၠောန်မံၚ်ပရေၚ်စန်ဒက်ကဵု ညးဍုၚ်ကွာန်တံရ။
အလံၚ်ညးစၞးအမာတ်တံ စှ်ေကၠောန်မံၚ်ပရေၚ်စန်ဒက်ကီုလေဝ် ညးဍုၚ်ကွာန်တံ ပရေၚ်စိုတ်လုပ်စ အောန်ကွေံကွေံရောၚ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဗော်ပျဳခိုၚ်ဖျိုဝ် စှ်ေစန်ဒက်မံၚ်။ စှ်ေစန်ဒက်မာဲ ဗော်ပျဳခိုၚ်ဖျိုဝ်တံ။ တုဲတှ်ေ ဗော်ညးဍုၚ်ကွာန် ဥူကိုကိုဂျဳတံ။ တ္ၚဲကၠာကၠာတေံ ဆဵုညာတ်မံၚ် ဗော် PPP ကီု။ ဗော်မန်ဂှ် ပြဟ်ဟ်ဏံ မုဟွံဆဵုဏီပုဟ်။ တၟော်ဆအာ စိတ်ညးဍုၚ်ကွာန်တံဍာံဍာံမ္ဂး ပရေၚ်ညးတေံ စိုတ်လုပ်စအောန်ကွေံကွေံဏောၚ်” သာ်ဝွံ သ္ဂးရ။
ပြဟ်ဟ်ဏံ သွက်ပေါဲဟီုတွံ ပရေၚ်တံၚ်ဂြဲမာန် ဗော်ပရေၚ်ဍုၚ်ကွာန်တံဂှ်တှ်ေ ၜိုန်ရ ဘိက်ပၟိၚ်လဝ် ညးဍုၚ်ကွာန်တံကီုလေဝ် ဗွဲမဂၠိုၚ်တံဂှ် ဟွံအာကီု ကောန်ဗော်ညးတံ၊ ညးကြပ်ကဵုဗော်ညးတံဟွံက ရဲမိက်ဂွံ ပရၚ်တဲတံရ အာကလၚ်လဝ်နွံမံၚ် ညးဆက်ဟီုရ။
အလံၚ်ညးစၞးအမာတ်တံ အာတံၚ်ဂြဲမာဲ စှ်ေမံၚ်ပရေၚ်စန်ဒက်ကီုလေဝ် ညးဍုၚ်ကွာန်တံဟွံဒုၚ်တဲ၊ ဗီုလဵုစန်ဒက်စန်ဒက်မံၚ် ဂလာန်ပတေဟ်ညးတံဟၟဲပုဟ် ညးဒေသမွဲတၠပၠန်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပ္ဍဲကဵုအရာပ်ပိုဲ ဍေံတံ ကၠုၚ်စှ်ေစန်ဒက်မာဲလေဝ် ညးဍုၚ်ကွာန်တံမှ ဟွံဒုၚ်တဲ။ ရဲထၜကဵု ရဲထၜတံရ ဒုၚ်တဲဍေံတေံဏောၚ်။ စပ်ကဵုပေါဲရုဲမာဲဏံတုဲ ဗီုလဵုဍေံတံစန်ဒက်ဟဍေံ ပိုဲတံဂလာန်ပတေဟ်ဟၟဲပုဟ်” သာ်ဝွံ သ္ဂးရ။
မွဲလပါ်ပၠန် ပ္ဍဲကဵုပေါဲရုဲမာဲကဝ်မယှေန်ပၞာန်ဏံ သွက်အလံၚ်ညးစၞး အမာတ်ဗော်တံ ဂွံစှ်ေအာတံၚ်ဂြဲမာဲမာန်ဂးတုဲ ပ္ဍဲကဵုဒေသ သၠုၚ်ပတိုန်လဝ်ပရေၚ်ဂီုကၠီုကီု ဗက်မာတ်ဆိုအ်စၟဳစၟတ်မံၚ် အရိုဟ်ဟ်တ္ၚဲနွံရ။
တုဲပၠန် သွက်အလံၚ်ညးစၞးအမာတ်ဗော်တံ ပကောံမၞိဟ် ဟလောဲမၞိဟ်ဂၠိုၚ်ၚ် ဇက်ဂၠောဲအာစှ်ေတံၚ်ဂြဲမာဲတံဂှ် မာတ်လဝ်ကီုလေဝ် မၞိဟ်အောန်န်ဂှ်ရ ကဵုလဝ်အခေါၚ် ဗက်အာကၠုၚ်စန်ဒက်မံၚ် မဒှ်ရ။
စိုပ်ဒဳဇြမ်ပါ ၂၈ ဏံ ကၠောန်အာပေါဲရုဲမာဲသ္ကုတ် ၁ မ္ဂး ပ္ဍဲတွဵုရးမန် ပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံ ကၠောန်အာ ပေါဲရုဲမာဲရောၚ် ကဝ်မယှေန်ပေါဲရုဲမာဲကၟိန်ဍုၚ် လလောၚ်တြးလဝ်ရ။
ပ္ဍဲတွဵုရးမန် နူကဵုကဝ်မယှေန်ပၞာန်သီအဝဵု ကၠောန်အာပေါဲရုဲမာဲဏံ အလံၚ်အမာတ် နူကဵုဗော် ၉ ဗော် ၂၅၀ တၠဂှ် သီုကဵုပူဂဵုပုဂ္ဂလမွဲတၠ ပါလုပ်ပြိုၚ်အာကီုရောၚ် ပတိုန်လဝ်စရၚ်ယၟုနွံရ။
ပရိုၚ်-သြၚ်လောန်တိုၚ်မ်
Photo – USDP