တနၚ်သဳ၊ အံက်တဝ်ပါ ၃၁
ရးတနၚ်သဳ ပွိုၚ်ဍုၚ်တနၚ်သဳ ပ္ဍဲကဵုပေါဲဗတိုက် ကရပ်ကွာန်ပန်တိုၚ်ဂှ် ဟိုတ်နူဒပ်ကဝ်မယှေန်ပၞာန် ပန်လဝ်ကဵုလွဟ်ဇၞော်ကီု သီုကဵုၜၚ်ကျာတံတုဲ ကောန်ကွာန်ချိုတ်အာလဝ်မွဲတၠ ဂွံတီနူ တမ်ဒပ်ခရိုၚ်ဗိက်လၟိဟ် ၂ ရ။
တုဲကၠုၚ်အံက်တဝ်ပါ ၂၈ ဒပ်ကဝ်မယှေန်ပၞာန် ဇြဟတ်ၜိုတ် ၇၀ ဖျေံလဝ်ဒပ် ပ္ဍဲကဵုကရပ်ကွာန်ပန်တိုၚ်ဂှ် ဒပ်ပၠန်ဂတးတံ အာဗတိုက်လဝ်ရ။
ပေါဲဗတိုက်ကြပ်ပွိုၚ်မွဲနာဍဳ ဒှ်လဝ်တုဲ ပ္ဍဲကဵုပေါဲဗတိုက်ဏံဂှ် သီုၜါလပါ် ပရေၚ်ချိုတ်ဒးဝပ်နွံမံၚ်ရောၚ် ညးတာလျိုၚ်မွဲတၠ တမ်ဒပ်ခရိုၚ်ဗိက်လၟိဟ် ၂ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲကဵုပေါဲဗတိုက်ဏံ နူကဵုလပါ်ကဝ်မယှေန်ပၞာန် ညးတာလျိုၚ်မွဲတၠချိုတ်တုဲ ကောန်သ္ဂံၚ်ဗွဲမဂၠိုၚ် ဒးလဝ်ဘဲဝပ်နွံကီု လပါ်ဒပ်ပၠန်ဂတးတံလေဝ် ကောန်သ္ဂံၚ်မွဲတၠပြဟ်လလုဲအာတုဲ ဒးဝပ်မွဲတၠနွံကီု သ္ဂးရ။
အခိၚ်ပေါဲဗတိုက်ဒှ်မံၚ်ဏံ နူဒပ်ကဝ်မယှေန်ပၞာန် ဟိုတ်နူပန်လဝ်ကဵု လွဟ်ဇၞော်ကီု သီုကဵုၜၚ်ကျာကီုတုဲ ရဲကွာန် ဒူကျဝ်လေဝ်မာၚ် ညးတြုံမွဲတၠ ဒးအာလဝ်ကဝေက်ဗုမ် ချိုတ်အာလဝ် မဒှ်ရ။
ပေါဲဗတိုက်ဏံ ဒပ်ပံၚ်တောဲပၠန်ဂတး မပ္တံကဵု တမ်ဒပ်ခရိုၚ်ဗိက်လၟိဟ် ၂ ဒပ်ပါ် (၁)၊ တမ်ဒပ်လၟိဟ် ၃ ဒပ်ပါ် (၂)၊ KNDO တမ်ဒပ် ၇ ဒပ်ပါ်(၃)၊ ပကဖ ပွိုၚ်ဍုၚ်တနၚ်သဳကဵု ပကဖ ဗိက်တံ ပံၚ်တောဲဗတိုက်လဝ်ရ။
တုဲကၠုၚ်အံက်တဝ်ပါ ၁၆ တေံကီုလေဝ် ပ္ဍဲကဵုပွိုၚ်ဍုၚ်တနၚ်သဳ ကရပ်ကွာန်တမုက်ချုၚ် ဒပ်ကဝ်မယှေန်ပၞာန် ဖျေံလဝ်ဒပ်တုဲ ဟိုတ်နူဒးဒုၚ်ဗတိုက်ဏာဂှ် ကောန်ပၞာန်ဟွံအောန်နူကဵု ပန်တၠချိုတ်အာလဝ်နွံ ဂွံတီရ။
ပရိုၚ်သြၚ်လောန်တိုၚ်မ်
Photo – မြိတ်ခရိုင်အမှတ်၂ တပ်ရင်း