ဗြဝတဳ၊ အံက်တဝ်ပါ ၃၁
တွဵုရးကရေၚ် ပ္ဍဲကဵုကွာန်ဖလူ နွံမံၚ်သၠုၚ်ကျာဍုၚ်ဗြဝတဳဂှ် နူကဵုဒပ်ကဝ်မယှေန်ပၞာန်ဗမာ ဟိုတ်နူပန်လဝ်ကဵုလွဟ်ဇၞော်ကီု သီုကဵုၜၚ်ကျာ ပ္ဍဲတ္ၚဲအကြာတံဏံကီုတုဲ ညးဒေသဗွဲမဂၠိုၚ် ဒးဂြိပ်ပါဲဒဴအာရဂှ် တမ်ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဍုၚ်တၟိလေဝ်ကေကဝ် နွံမံၚ်သၠုၚ်ကျာ ဍုၚ်ဗြဝတဳ ပ္ဍဲအံက်တဝ်ပါ ၁၇ ဂှ် ဒပ်ကဝ်မယှေန်ပၞာန် ကလေၚ်ထိၚ်ချုက်ဂွံဏာလဝ်တုဲ လပါ်သ္ကုတ်ဂၠံၚ် ဗြဝတဳ-ဝဝ်လေဝ် ဆက်ဝေၚ်ကၠုၚ်ပၞာန်ဂှ်ရ ဒှ်မံၚ်ပေါဲဗတိုက်ကဵု ဒပ်ပၠန်ဂတးပံၚ်တောဲ KNLA သ္ကိုပ်သ္ကလဝ်တံ အရိုဟ်တ္ၚဲရ။
နူကဵုသ္ကုတ်ဂၠံၚ် ဗြဝတဳ-ဝဝ်လေဝ် ကွာန်အေန်ဂျေၚ်မျာၚ်ဂှ် ကရောၚ်ပၞာန်ဆက်ထပက်အာ လပါ်ကွာန်မေန်လက်ပါန်ကီု နူလေဝ်ကေကဝ် မေဝ်ခဳဝါ မွဲအဆံၚ် ပတဝ်ဏာကဵုလပါ်ကွာန်ဖလူ ကရောၚ်ပၞာန်ထပက်ကၠုၚ်မံၚ်ရောၚ်ဂှ် တမ်ရိုဟ်ကၞက်ပရိုၚ်ဒေသမွဲတၠ သ္ဂးရ။
တ္ၚဲအံက်တဝ်ပါ ၃၀ အခိၚ်ဒေါဝ်တ္ၚဲဂှ် အပ္ဍဲကဵုကွာန်ဖလူ နူကဵုဒပ်ကဝ်မယှေန်ပၞာန် ပန်ပလံၚ်ကဵုလွဟ်ဇၞော်ကီု သီုကဵုၜၚ်ကျာထောံကြဳဗုမ်ဗတိုက်မံၚ်ဂှ်ရ ညးဒေသကောန်ကွာန်တံသီုဖအိုတ် ဒၞာဲဗၠးဘဲမာန်တံဂှ် ဒးဂြိပ်ပါဲအာလဝ် ဂွံတီရ။
ကၠာဟွံစိုပ်ပေါဲရုဲမာဲ ဂိတုဒဳဇြမ်ပါတေံ နူကဵုဒပ်ကဝ်မယှေန် သွက်ဂွံကလေၚ်ထိၚ်ချုက်ကေတ် မွဲဒမြိပ်ဂၠံၚ် ဗြဝတဳ-ဝဝ်လေဝ်မာန် ဂစာန်မံၚ်အိုတ်စောန်ကီု ဂကောံဇြဟတ်ပၠန်ဂတးတံပၠန်လေဝ် ဒုၚ်ဒဝ်တဝ်စၞေဟ်မံၚ် ဇၞော်ကဵုဇြဟတ်တုဲ လပါ်ကဝ်မယှေန်ပၞာန်တံ ပရေၚ်ဒးဝပ်ချိုတ်နွံဂၠိုၚ်မံၚ်ရောၚ် တမ်ရိုဟ်ကၞက်ပရိုၚ်ပၠန်ဂတးတံ လလောၚ်တြးလဝ်ရ။
ဟိုတ်နူပေါဲဗတိုက်လေဝ်ကေကဝ်ကေုာံ ပေါဲဗတိုက်သ္ကုတ်ဂၠံၚ် ဗြဝတဳ-ဝဝ်လေဝ် ဒှ်တုဲ ညးဒေသ လေကေကဝ်၊ ထဳမေဝ်ဝါခဳ၊ မေန်လက်ပါန်၊ ဖလူ ကောန်ကွာန်လၟိဟ်ကဵုလ္ၚီတံ ဒၞာဲဗၠးဘဲလမျီုမာန် ဒးဂြိပ်ပါဲအောပ်မံၚ်ရဂှ် ဂွံတီနူ ညးကဵုမံၚ်အရီုဗၚ် ပရေၚ်ဟံၚ်ပြာ်ဘဲပၞာန်တံရ။
ပရိုၚ်သြၚ်လောန်တိုၚ်မ်
Photo – Social Media