လံၚ်လုၚ်၊ နိုဝမ်ပါ ၁
ဒၞာဲဒပ်ပၠန်ဂတးတံ ချဳဒရာၚ်ဇြဟတ်ခိုဟ် ပ္ဍဲရးတနၚ်သဳ ပွိုၚ်လံၚ်လုၚ်၊ ဍာ်ဗုကဵု တယိတ်ချံၚ်တံဂှ် ဒပ်ကဝ်မယှေန်ပၞာန် ထပက်ကရောၚ်ပၞာန်တုဲ သွက်ဂွံကဵုမာဲကဵုမံၚ်ဇြဟတ်ဟရိုဟ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူကဵုအံက်တဝ်ပါ သတ္တဟလက်ကရဴအိုတ်ဂှ်တုဲ ဒပ်ကဝ်မယှေန်ပၞာန် လုပ်စိုပ်ပရးလဝ်ဒပ် အပ္ဍဲကဵုကွာန် ပိ ပွိုၚ်ဍုၚ်ဏံ ထပက်မံၚ်ကရောၚ်ပၞာန် မဒှ်ရ။
ကရောၚ်ပၞာန် ဒပ်ကဝ်မယှေန်ပၞာန် ဗက်ကံက်မံၚ်စရၚ်မၞိဟ် ပ္ဍဲသ္ၚိဂမၠိုၚ်တုဲ မၞိဟ်နွံမံၚ်ပ္ဍဲသ္ၚိသီုဖအိုတ် ဟွံအာညံၚ်ဟွံဂွံဒှ် ဒးအာကဵုမာဲဍာံဍာံရောၚ် ကဵုလဝ်ဇြဟတ်ဟရိုဟ် သ္ဂးရ။
မွဲကရောၚ်ပၞာန်မ္ဂး ဇြဟတ်အကြာ ၅၀ ကဵု ၈၀ နွံမံၚ် ကရောၚ်ပၞာန် ၜိုတ် ၅ ကရောၚ်တံ လုပ်စိုပ်ကၠုၚ်ကွာန် မံၚ်မကာန်၊ ကွာန်တၞံဇြဲ၊ မေန်သံက်၊ ပါန်ဒလဲ၊ ပါၚ်ကွာန်တြေံ၊ ကွာန်အရာပ်သၟိၚ်တံတုဲ ကံက်လဝ်စရၚ်မၞိဟ်ရ။
တုဲပၠန် ပ္ဍဲပွိုၚ်ဍုၚ်ဍာ်ဗုဂှ် ကွာန် ပဂဝ်သောန် တေတ်တဝ်တံက် ပ္ဍဲပွိုၚ်ဍုၚ်တယိတ်ချံၚ်ဂှ် ပ္ဍဲဂကောံကွာန်ဝင်ဝတံ ဗက်ကံက်လဝ်စရၚ် သ္ဂးရ။
ပ္ဍဲဍုၚ်လံၚ်လုၚ်ကဵု တယိတ်ချံၚ်တံဝွံ ပေါဲရုဲမာဲကဝ်မယှေန်ပၞာန် ကၠောန်အာဏံ ပါလုပ်မံၚ်ပ္ဍဲ သ္ကုတ် ၁ ဒဳဇြမ်ပါ ၂၈ ဒးကဵုမာဲတုဲ ပွိုၚ်ဍုၚ်ဍာ်ဗုဂှ် ပါလုပ်မံၚ် သ္ကုတ် ၂ ဒးကဵုမာဲ ပ္ဍဲဂျာန်နဝါရဳ ၁၁ တေံရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media