ကျာ်မြဟ်၊ နိုဝမ်ပါ ၁
ပ္ဍဲကဵုတွဵုရးမန် ဒေသဒဵုသာဲ နွံမံၚ်ပွိုၚ်ဍုၚ်ကျာ်မြဟ်ဂှ် ဒပ်ပၞာန်ဗမာသွက်ဂွံထိၚ်ချုက်မာန် ဍိုက်ထပက်ကၠုၚ် ကရောၚ်ပၞာန် နကဵုဇြဟတ်ဗွဲမဂၠိုၚ်ရောၚ် ညးဒေသတံကီု ရဲဒပ်ပၠန်ဂတးတံကီု ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူဂိတုအံက်တဝ် ၂၆ ဂှ် ဒပ်ကဝ်မယှေန်ပၞာန် ဇြဟတ်ၜိုတ် ၂၀၀ တံ ပ္ဍဲကဵုဒေသဒဵုသာဲ ကွာန်ကအ်ဒုန်၊ ကအ်ပၞဟ်၊ ကအ်ဝါန်၊ ကွာန်ၚာန်၊ မေဝ်ခရို ကဵု ဂဒုၚ်သှ်ေတံ ကရောၚ်ပၞာန်ထပက်လုပ်ကၠုၚ်ရ။
ဟိုတ်နူကရောၚ်ပၞာန် ဒပ်ကဝ်မယှေန်ပၞာန် ထပက်ကၠုၚ်ဂှ်ရ ဖေက်ဒးဒုၚ်ရပ်တုဲ သၟတ်ဒေသတံကီု ညးဍုၚ်ကွာန်လ္ၚဵုတံ ဂြိပ်ပါဲတိတ်အာ ဒၞာဲတၞဟ်ဟ်တေံနွံရ။
အဃောကရောၚ်ပၞာန် ထပက်လုပ်ကၠုၚ်မံၚ်မွဲဒမြိပ်ဂၠံၚ်ဆဵုအာ ကွဳစက်ကီု ပ္ဍဲကၠအ်ကီု သ္ၚိလ္ၚဵုဟွံသင်ကာတုဲ ဂၠိုက်ဂၠာဲစၟဳစၟတ်အာလဝ်နွံရဂှ် ညးဒေသတံဟီုရ။
ပြဟ်ဟ်ဏံ ကရောၚ်ပၞာန်ဏံလုပ်ဖျေံလဝ်ဒပ် ပ္ဍဲကဵု ရုၚ်စက် တိဗဳလာတ် MCL တုဲ ဇရေၚ်ကွာန်ဗ္ဒာဲဗ္ဒာဲကရပ်တံဂှ် ပန်မံၚ်ကဵု လွဟ်ဇၞော်ဒရုၚ်တံ မဒှ်ရ။
ပရေၚ်ဒပ်ကဝ်မယှေန်ပၞာန် ထပက်ကၠုၚ်ကရောၚ်ပၞာန်ဗီုဏံဂှ်တှ်ေ ကၠာဟွံစိုပ်ပေါဲရုဲမာဲ သွက်ဂွံကလေၚ်ထိၚ်ချုက် ကေတ် ဒေသဒဵုသာဲမာန် ဒပ်ပၞာန်ဗမာဂစာန်မံၚ်ရောၚ် ဂကောံပၠန်ဂတးတံ သ္ဂးရ။
ဟိုတ်နူ ဒပ်ကဝ်မယှေန်ပၞာန် ထပက်ကၠုၚ်ကရောၚ်ပၞာန် သာ်ဏံဂှ်တှ်ေ အကြာၜါလပါ် ပေါဲဗတိုက်ဇၞော်ကဵုဇြဟတ် ဖေက်ဒှ်ကၠုၚ်ဂှ်ရ ညးဒေသဒဵုသာဲတံဂွိင်ဂွါဲဒှ်မံၚ်ဒွိၚ် မဒှ်ရ။
ပ္ဍဲကဵုဒေသဒဵုသာဲ ပွိုၚ်ဍုၚ်ကျာ်မြဟ်ဂှ်တှ်ေ ဒှ်မံၚ်ဒေသ ဂကောံပၠန်ဂတးကောန်ဍုၚ်အရၚ်ရပ်လွဟ် မန်ကဵုကရေၚ်တံကီု ဒပ်ပၞာန်စဵုဒၞာညးဍုၚ်ကွာန် PDF တံလေဝ် ချဳဒရာၚ်မံၚ်တုဲ ဒေသဗွဲမဂၠိုၚ်တံဂှ် ဒပ်ဂကောံပၠန်ဂတးတံ ထိၚ်ချုက်ဂွံလဝ်ရ။
ပရိုၚ်-သြၚ်လောန်တိုၚ်မ်
Photo – NMSP AD