ကအ်ကြိက်၊ နိုဝမ်ပါ ၁
တွဵုရးကရေၚ် ပ္ဍဲသၟဝ်ကျာကအ်ကြိက် အကြာကရောၚ်ပၞာန် ဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံ ပေါဲဗတိုက်ဆက်ဒှ်မံၚ်တုဲ နူလပါ်ဒပ်ကဝ်မယှေန် ဗတိုက်မံၚ်သီုကဵုၜၚ်ကျာ ကေုာံ သီုပန်မံၚ်ကဵုလွဟ်ဇၞော်ရောၚ် ညးဒေသတံဟီုတုဲ ဂွံတီရ။
နူကဵုသၟဝ်ကျာဍုၚ်ကအ်ကြိက် ပတဝ်ဏာလဝ်ကဵု ဂၠံၚ်လ္တူဒဵုဒဝ်န ဒၞာဲတာဲဗိုလ်သၟဝ် ကရောၚ်ပၞာန် ဒပ်ကဝ်မယှေန်ပၞာန်ထပက်ကၠုၚ်မံၚ်ဂှ် ဒှ်လဝ်ပေါဲဗတိုက်ကု ဂကောံဇြဟတ်ပၠန်ဂတးတံ ပ္ဍဲအကြာကွာန် မျပတိုၚ်၊ ထဳဖိုဝ်သာန်မွဲဒမြိပ် စနူကဵုအံက်တဝ်ပါ ဒုတိယသတ္တဟဂှ် ဇၟာပ်ပ်တ္ၚဲ မဒှ်ရ။
ဂၠံၚ်အဓိကမွဲ ပ္ဍဲပွိုၚ်ဍုၚ်ကအ်ကြိက် သ္ကုတ်ဂၠံၚ် ကအ်ကြိက်-နဗူဂှ် ပ္ဍဲအံက်တဝ်ပါ ၆ တေံ ဒပ်ကဝ်မယှေန်ပၞာန် ကလေၚ်ထိၚ်ချုက် ဂွံဏာလဝ်တုဲ ဗွဲကြဴဏံ ကရောၚ်ပၞာန်ဗမာလုပ်ကၠုၚ် ကွာန်ဗၟံက် သ္ကုတ်ဂၠံၚ်တံဏံ ထပက်ကရောၚ်ပၞာန် ကၠောန်မံၚ်ပရေၚ်ပသောၚ်သ္အး ဒေသတိဍာ် မဒှ်ရ။
ဗွဲတၟေၚ် နူကဵု ကရပ်ဂၠံၚ်ကအ်ကြိက်-နဗူ ဗဒါဲကွာန်မျပတိုၚ်ဂှ် ကရောၚ်ပၞာန်ဒပ်ကဝ်မယှေန်ပၞာန် ထပက်ပတဝ်လဝ်ကဵု ဇရေၚ်တာဲဗိုလ်သၟဝ် ဂၠံၚ်တြေံ လ္တူ ဒဵုဒဝ်နဂှ် ဆက်ဒှ်မံၚ်ပေါဲဗတိုက်ကဵု ဂကောံဇြဟတ်ပၠန်ဂတးတံ ဒဵုကဵုအံက်တဝ်ပါ ၃၀ မဒှ်ရ။
သၟဝ်ကျာကအ်ကြိက် မွဲဒမြိပ်ကွာန်မျပတိုၚ်၊ ထဳဖိုဝ်သာန် ပ္ဍဲအကြာ ပေါဲဗတိုက်ဒှ်မံၚ်တံဂှ် ဟိုတ်နူဒပ်ကဝ်မယှေန်ပၞာန် ပန်မံၚ်ကဵု လွဟ်ဇၞော်ကေုာံ ဗတိုက်မၚ်သီုကဵုၜၚ်ကျာတုဲ ဘာလကျာ် ကဵု သ္ၚိဌာန်လ္ၚဵုတံ ဒးဘဲလီုလာ်အာနွံကီု ညးဒေသမျပတိုၚ်၊ ထဳဖိုဝ်သာန်၊ နံၚ်မဳ၊ ကအ်ဖာန်ယာတ်၊ မိဖာလေဝ်တံ ဒၞာဲဗၠးဘဲဒဏ်မာန် ဂြိပ်ပါဲဒဴအာအိုတ်ရဂှ် ဂွံတီနူကဵု ညးဒေသတံရ။
ဂၠံၚ်ဇၞော်အာယှ ကအ်ကြိက်- တေန်ဂါန်ညဳနံၚ်-ဗြဝတဳဂှ် ဒပ်ကဝ်မယှေန်ပၞာန် ကလေၚ်ထိၚ်ချုက်ဂွံအာကီုလေဝ် ဒဵုကဵုတ္ၚဲဏံ ကလေၚ်ပံက်ဂၠံၚ်ဟွံမာန်မံၚ်ဏီကီု သွက်ကလေၚ်ဂွံထိၚ်ချုက် ဂၠံၚ်ဒဵု ဒဝ်န တြေံ ကအ်ကြိက်-ဗြဝတဳမာန်ဂှ် ပံက်လဝ်မုက်ပၞာန် ဟွံအောန်နူကဵု ၂ ဒၞာဲဂှ်တှ်ေ ထပက်ကရောၚ်ပၞာန် ဆက်ဗတိုက်အာမံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media