ရေဝ်၊ နိုဝမ်ပါ ၂
တွဵုရးမန် ပ္ဍဲပွိုၚ်ဍုၚ်ရေဝ် ကြပ်ကၠုၚ်မံၚ်ကဵု အခိၚ်ပေါဲရုဲမာဲဏံ ဒပ်ပၞာန်ဗမာ ထပ်ဗပေၚ်လဝ်ဇြဟတ်ပၞာန် ၅၀၀ ပြၚ်ရောၚ် ညးဒေသကဵု ဒပ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ် ပ္ဍဲဂိတုအံက်တဝ်ပါဂှ် ၜၚ်ပၞာန် လုပ်ဖျေံလဝ်ကောန်ပၞာန် ပ္ဍဲသၞေဟ်ပါန်ဒါ ကွာန်ပါၚ်ၜဳ ထပေၚ်လဝ်ဇြဟတ် နူကဵု ဍာန်ဍာ်မဒှ်ရ။
ဒပ်ကဝ်မယှေန်ပၞာန်တံဝွံ ပ္ဍဲအံက်တဝ်ပါ ၁၅ ဂှ် မွဲဝါ၊ ပ္ဍဲအံက်တဝ်ပါ ၃၁ ဂှ် မွဲဝါ အပံၚ်ဖအိုတ်ၜါဝါ ထပ်ဗပေၚ်ကၠုၚ်လဝ်ဇြဟတ်ရဂှ် ညးဒေသတံဟီုတုဲ ဂွံတီရ။
ဇြဟတ်ပၞာန် ထပ်ဗပေၚ်လဝ်တံဏံ နူကဵုဌာန်ဂအုပ် စကခ ၁၉ ဍုၚ်ရေဝ်မွဲအဆံၚ် ထပ်ပါ်တြးကဵုလဝ် ဇၟာပ်တမ်ဒပ် နွံမံၚ်ပွိုၚ်ဍုၚ်ရေဝ်တံ မဒှ်ရ။
နူကဵုကဝ်မယှေန်ပၞာန် ဟိုတ်နူထပဵုတိုန်လဝ်ဇြဟတ်ဂှ် ဒးဖန်ဇန်အာ ပရေၚ်ပလေဝ်ပလေတ်စ နာနာသာ်ရောၚ် ညးတာလျိုၚ် ဒပ်စဵုဒၞာ ညးဍုၚ်ကွာန်-ရေဝ် YPDF ဗိုလ်ယာန်နိုင် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တုဲပၠန် ပွိုၚ်ဍုၚ်ရေဝ်ဂှ် ပ္ဍဲကဵုကဝ်မယှေန်ပၞာန် ကၠောန်ပေါဲရုဲမာဲ သ္ကုတ် ၂ ဂှ် ပါလုပ်မံၚ်ဂှ်ရ ဒၞာဲဒေသဂကောံဇြဟတ်ပၠန်ဂတးတံချဳဓရိုၚ် ဇြဟတ်တဴမံၚ်ဂှ် ကရောၚ်ပၞာန်ထပက်ကၠုၚ်မာန်တုဲ ပေါဲဗတိုက် သ္ကာတ်မြဟ်ဒှ်ကၠုၚ်မာန်ရောၚ် သ္ဂးရ။
လောန်ကၠုၚ်အံက်တဝ်ပါ ၁၀ တေံဂှ်လေဝ် အကြာပွဳပွူကွာန် “အောင်သပြေ၊ ကၠအ်လဳမဴ၊ အံၚ်သာယာ၊ ၝောံလၟိုၚ်၊ ကၞေၚ်တၟံတံ ကရောၚ်ပၞာန် ထပက်ကၠုၚ်လဝ်တုဲ ပေါဲဗတိုက်အကြာၜါ်လပါ် ကလေၚ်ဒှ်ကၠုၚ်လဝ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media