နေပျဳတဝ် ၊ နိုဝမ်ပါ ၂
ပၞာန်အပ္ဍဲဍုၚ်က္တဵုဒှ်မံၚ် ပ္ဍဲကဵုဍုၚ်ဗမာကၞောတ်သၞာံဏံ စပ်ကဵုပေါဲရုဲမာဲ ကၠောန်အာ သ္ကုတ်ကဵုသ္ကုတ်တံဂှ် ပရေၚ်ဂီုကၠီုကီု လၟေၚ်ကမၠောန်သီုဖအိုတ် လီုလာ်အာဂှ် ကဝ်မယှေန်ပၞာန်ညိလေဝ်ဒုၚ်ဒှ်ဟွံမာန် ဂွံဆဵုမံၚ်ရ။
ရဲတြးမံၚ်ဝါဒ ပရေၚ်ဂီုကၠီုပေါဲရုဲမာဲ ညံၚ်ဂွံယုတ်ဒေက်အာတံဂှ် ဗက်ဂၠိုက်ဂၠာဲစၟဳစၟတ်တုဲ ညံၚ်ဂွံကေတ်အရေဝ်ပိုတ်တ်ရောၚ် ဝန်ဇၞော်ကေၚ်ကာအပ္ဍဲဍုၚ်-ကဝ်မယှေန်ပၞာန် ဒုသ္ကိုပ်ပၞာန်ဇၞော် ထောန်န်နံၚ် ဟီုနၚ်လဝ်ရ။
တ္ၚဲအံက်တဝ်ပါ ၃၁ တေံ ပ္ဍဲကဵုနေပျဳတဝ် ကၠောန်လဝ်ကောံဓရီု ကမ္မတဳဗဟဵု ပွမကောပ်ကာဲပရေၚ်ဂီုကၠီု ကာလပေါဲရုဲမာဲဗော်ဇဳဂှ် ညးမဒှ် ဥက္ကဌဝန်ဇၞော်ကေၚ်ကာအပ္ဍဲဍုၚ် ဟီုလဝ်ရ။
နကဵုကမ္မတဳဗဟဵု ပွမကောပ်ကာဲပရေၚ်ဂီုကၠီု ကာလပေါဲရုဲမာဲဗော်ဇဳဝွံ လၟေၚ်ပရေၚ်ကမၠောန် ဆေၚ်စပ်ကဵုပေါဲရုဲမာဲ ညံၚ်ဂွံလီုလာ်နဲကဲစုၚ်ၚ် ညးမဖံက်ပကဝ်တံဂှ် ဂၠိုက်ဂၠာဲစၟဳစၟတ်တံ ကၠောန်အာရောၚ် သ္ဂးရ။
ဟိုတ်ဂှ်တုဲ နကဵုဥပဒေစဵုဒၞာပေါဲရုဲမာဲခၞံလဝ်ဂှ် ဒဵုကဵုအံက်တဝ်ပါ ၂၉ တေံ ပ္ဍဲအလုံမွဲဍုၚ် ပရေၚ်ကေတ်ကၠုၚ်အရေဝ် ၄၀ ဝါဂှ် မၞိဟ်ကြပ် ၉၀ တၠ ဒးဒုၚ်ရပ်လဝ်တုဲ အပ္ဍဲဏံညးတြုံ ၈၃ ကဵု ညးဗြဴ ၅ တၠတံ ပါလုပ်ရ။
ပ္ဍဲသတ္တဟတုဲကၠုၚ်ဏံ ကဝ်မယှေန်ပၞာန် ကဵုတြးလဝ်ဝါဒ စပ်ကဵုပရေၚ်ဇာတ် “ညးသၠောဝ်ထပက်အာဝင်ခေတ်တံ” ဂှ်တုဲ လ္တူဇာဖိုၚ်ပရေၚ်မၞိဟ် ညးချူဟီုဂးပါ်ပါဲကီု ညးထံက်ဂလာန်ကီု ရပ်စပ်ကေတ်လဝ်အရေဝ် ဒါရိုက်တာ၊ ညးချဳဒရာၚ် ပရေၚ်ပညာအနုသုခုမ ၅ တၠနွံရ။
ပရေၚ်ဇာတ်ဝွံ ပရေၚ်ကဵုပညာပေါဲရုဲမာဲရောၚ် ကဝ်မယှေန်ပၞာန် စၟတ်သမ္တီကီုလေဝ် လ္တူ Facebook ဂှ် ပရေၚ်တြးဝါဒ ဒပ်ပၞာန်ရောၚ် ချူပါ်ပါဲလဝ်နွံတုဲ လ္တူဏံ ဒါရိုက်တာကဵုဒးလဝ် Love React ၂ တၠ ဂှ်ကီု ကဝ်မယှေန်ပၞာန် ရပ်ထိၚ်ကေတ်လဝ်အရေဝ် မဒှ်ရ။
တင်ထ္ၜးဟိုတ်မ္ဂး ခြာဟွံလံကၠောန်အာပေါဲရုဲမာဲဏံ ညံၚ်ဂွံအံၚ်ဇၞး နကဵုကဏ္ဍအနုပညာ ညးတံစီုသကီု ဟွံပါလုပ်ကၠောန်သၟးဟွံက လ္တူညးပါလုပ်ပံၚ်တောဲ ကၠောန်လဝ်က္တိုၚ်ၚ်ကၟိုဟ်ဟ် ပတိုန်ပါ်ပါဲလဝ်တံဂှ် ဒၟာနူကဵု ဇြဟတ်ထံက်လဝ်ဂလာန်ရောၚ် သ္ဂးရ။
နူကဵုဇာဖိုၚ်ပရေၚ်မၞိဟ်မွဲအဆံၚ် ဟွံဍာံပြချူဆန်တုဲ လ္တူပေါဲရုဲမာဲ ညးဍုၚ်ကွာန်ဂမၠိုၚ် ညံၚ်ဂွံအထေၚ်ဗၠေတ် ညးဗတိုက်ဖအောဝ်ချူဆန် ကေုာံ ညးထံက်လဝ်ဂလာန်တံဂှ် နကဵုဥပဒေစဵုဒၞာပေါဲရုဲမာဲကီု သီုကဵုဒုဟ်ဒဏ် ဥပဒေဆေၚ်စပ်နာနာတံကီု ကေတ်အရေဝ်ပိုတ်တ်ရောၚ် ကဵုလဝ်သမ္တီရ။
ညးဒးဒုၚ်ကေတ်အရေဝ် နကဵုဥပဒေစဵုဒၞာပေါဲရုဲမာဲ ၝောံပိုဒ် ၂၃(က) တှ်ေ ယြဴပူဂဵုလဵုဟွံဟီု ဖံက်ပကဝ်လဝ်ပရေၚ်တာဒၞာတံမ္ဂး ဒဏ်ထံၚ်အောန်အိုတ် နူကဵု ၃ သၞာံ ဂၠိုၚ်အိုတ် ၇ သၞာံ ဒးဒုၚ်ဖျေံသၟးဟွံက ဒဏ်သြန်လေဝ် ဖျေံမာန်ကီုရောၚ် ခၞံလဝ်သၞောဝ်ရ။
ပ္ဍဲဥပဒေဏံ ၝောံပိုဒ် ၁၆ ဂှ် ယြဴပူဂဵုလဵုဟွံဟီု လၟေၚ်ကမၠောန် စပ်ကဵုပေါဲရုဲမာဲကီုဒှ် (ဟွံသေၚ်မ္ဂး) မွဲသ္ကုတ်မွဲသ္ကူလၟေၚ်ကမၠောန်ကီုဒှ် ညံၚ်သ္ဂောံလီု ဟီုတွံ၊ ဟီုဂး၊ စန်ဒက်၊ ပချဳဂတဵု၊ ထ္ၜးဆန္ဒ (ဟွံသေၚ်မ္ဂး) ချူဆန် တြးပတိတ်အာတံဂှ် နဲလဵုမှကၠောန်သ္ပဟွံဂွံ တာဒၞာလဝ် မဒှ်ရ။
ပေါဲရုဲမာဲကဝ်မယှေန်ပၞာန် ကၠောန်အာဏံ လ္တူညးဒစဵုဒစး၊ ကၠောန်သ္ပ ညံၚ်ဂွံလီု၊ ပလီုပထုဲတံဂှ် နကဵုသၞောဝ်ဥပဒေ သွက်ဂွံကေတ်အရေဝ် မာန် ဒစးဒုၚ်စဳရေၚ်ဖန်ဖက်လဝ်ရောၚ် ညးလ္ၚတ်တံထံက်ထ္ၜးရ။
ပ္ဍဲကဵုပေါဲရုဲမာဲ ညံၚ်ဂွံမၞိဟ်ချိုတ် ယဝ်ရဖံက်ပကဝ်လဝ်ဒုဟ်မ္ဂး ကဵုဒဏ်အမိၚ်ဂစိုတ် ဥပဒေပွမစဵုဒၞာ နူကဵုပရေၚ်ပလာတ်ပထုဲ ပေါဲရုဲမာဲဗော်ဇဳဏံ ပ္ဍဲကဵုဂိတုဂျူလိုင် ၂၉ တေံဂှ် ခၞံလဝ်သၞောဝ်ရ။
ပရေၚ်ကဵုဝင်ပေါဲရုဲမာဲ ဍုၚ်ဗမာမ္ဂး ဗီုကဵုဥပဒေလၟုဟ်ဏံ မွဲအလန်မှ ဟွံကေၚ်နွံကၠုၚ်မွဲလှ်ေတုဲ ပေါဲရုဲမာဲဏံ ဟွံခိုဟ်ပုဟ်ဆၜိုတ်ဟီုဂးဒးဂှ် ဖျေံဏာဒဏ်ထံၚ်မာန် ခၞံစုတ်လဝ်ၝောံပိုဒ်နာနာသာ် မဒှ်ရ။
ပ္ဍဲကဵုကာလပေါဲရုဲမာဲဏံ အရာနွံပၟိက်ကၠုၚ်ကဵု ကိစ္စပရၚ်ဂီုကၠီုမ္ဂး ရုၚ်မာဲ၊ စက်ကဵုမာဲ၊ အလံၚ်အမာတ်တံကဵု ညးကၠုၚ်ကဵုမာဲတံ သွက်ရေၚ်တၠုၚ်ကဵုပရေၚ်ဂီုကၠီုပေၚ်ၚ်ညိဂှ် ဝန်ဇၞော်ကေၚ်ကာ အပ္ဍဲဍုၚ်ကဵုလဝ်စၞောန် ပ္ဍဲကောံဓရီုရ။
ပရိုၚ်-သြၚ်လောန်တိုၚ်မ်
Photo – MOI