မတ်မလီု၊ နိုဝမ်ပါ ၂
ကဝ်မယှေန်ပၞာန်ကၠောန်အာပေါဲရုဲမာဲဏံ ပ္ဍဲကဵုတွဵုရးမန် နူကဵုဗော်လုပ်ပြိုၚ်တံ အလံၚ်အမာတ်ဂမၠိုၚ် တံၚ်ဂြဲမာဲကဵုမံၚ်ဂတိပါၚ်တံဂှ် ညးဍုၚ်ကွာန်ဒေသမန် ဂလာန်ပတေဟ်ဟၟဲရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နူကဵုကဝ်မယှေန်ပေါဲရုဲမာဲကၟိန်ဍုၚ် ကဝ်မယှေန်ပၞာန် ကဵုလဝ်အခေါၚ် စှ်ေစန်ဒက်မာဲ စနူကဵု အံက်တဝ်ပါ ၂၈ ဒဵုကဵု ဒဳဇြမ်ပါ ၂၆ တေံ ပွိုၚ် ၆၀ တ္ၚဲ မဒှ်ရ။
ဟိုတ်နူကဵုလဝ်အခေါၚ် စန်ဒက်မာဲဂှ် အလံၚ်အမာတ် နူကဵုဒၞာဲ တိဍာ် ဒေသ ကဝ်မယှေန်ပၞာန် ထိၚ်ချုက်မာန်လဝ်ပေၚ်ၚ်တံ ဗွဲမဂၠိုၚ်တံဝွံ စှ်ေဗလးတိ အကြာအရာပ်ဍုၚ်ကွာန်တုဲ ကဵုမံၚ်ကတိပါၚ်နာနာသာ်တုဲ ဗက်စန်ဒက်မံၚ် ညးဍုၚ်ကွာန်တံရ။
အလံၚ်အမာတ်တံ ကဵုမံၚ်ကတိပါၚ်နာနာသာ်တုဲ ဗက်စန်ဒက်မံၚ်ကီုလေဝ် ဟိုတ်နူဝင် ဂၠာဲစပရေၚ်ဂုဏ်ဖဵု ပူဂဵုညးတံနွံတုဲ အလံၚ်အမာတ်လဵုဂှ်မှ ညးဍုၚ်ကွာန်တံ ဂလာန်ပတေဟ်ဟၟဲပုဟ် ညးဒေသတွဵုရးမန်မွဲတၠ ဟီုရ။
“ဗီုလဵုကဵုမံၚ်ကတိပါၚ်ရောဟီုတှ်ေ ရဲဗော်ပျဳခိုၚ်ဖျိုဝ်ဟီု ယဝ်လုပ်ဗော်ညးတံ ဂွံလဝ်ကာတ်ကောန်ဗော်ညးတံတှ်ေ ဟွံဒးအာပၞာန်ပုဟ် ဟွံဒးဒုၚ်တံၚ်ပဝ်တာပုဟ် ဗၠးနူယိုက်ဝန်ပၞာန်ဏောၚ် အခေါၚ်အရာနွံတၟာဟလိုၚ် ဟီုဂးမံၚ်နွံ။ ဗော်ဥူကိုကိုကျဳတံဂှ် သွက်သ္ဂောံဂွံဒဝ်မဝ်ကရေသဳဍာံဍာံ၊ မၞိဟ်တံ မံၚ်အဆံၚ်လှုၚ်တိုန်ဏောၚ် ဟီုမံၚ်။ ဟီုမံၚ်ကဵုပါၚ် ဗီုဏံနွံ။ ပ္ဍဲအလံၚ်အမာတ်ညးစၞးတံဂှ် ဝင်လုပ်ကေတ်လဝ်ဒၞာဲမၞိဟ်ဇၞော်တုဲ ဂၠာဲစလဝ်ပရေၚ်ဂုဏ်ဖဵုပူဂဵုညးတံလေဝ်နွံမံၚ်။ အလံၚ်အမာတ်လဵုဂှ်မှ ဂလာန်ပတေဟ်ပိုဲဟၟဲပုဟ်” သာ်ဝွံ သ္ဂးရ။
တုဲပၠန် အလံၚ်အမာတ်ညးလုပ်ပြိုၚ် ပေါဲရုဲမာဲကဝ်မယှေန်ပၞာန်တံဝွံ နူကၠာကၠာတေံဂှ်ရ မၞိဟ်ရံၚ်ဂုဏ်ဖဵု သွက်ညးတံမွဲဓဝ်ရဒှ်မံၚ်တုဲ စိုပ်အခိၚ်တံၚ်ဂြဲမာဲဏံမှ ကၠောန်သွက်ညးဍုၚ်ကွာန်တံ ခိုဟ်စဟီုဂှ် ဒှ်မံၚ်အရေဝ်ဟရိုၚ်မွဲရောၚ် ညးပါ်ပါဲရ။
အလံၚ်အမာတ်တံ ၜိုန်ရ ကဵုမံၚ်ကတိပါၚ်နာနာသာ်ကီုလေဝ် ညးတံထပေၚ်ကဵုဟွံသေၚ်ကီု ၜက်အခိၚ်ရုဲမာဲတုဲမ္ဂး ကတိပါၚ်တံဏံ အလဵုလဵုဝိုတ်အာရဒှ်တုဲ လ္တူညးတံ ဂလာန်ပတေဟ်လေဝ်ဟၟဲပုဟ် ညးဒေသတွဵုရးမန်မွဲတၠပၠန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကတိဝတ်ညးတံကဵုဂှ် ညးတံဗက်ကၠောန်ကဵု အဲဟွံခယျလဝ်ပုဟ်။ မုဟိုတ်ရောဟီုတှ်ေ နူဝါဒိတေံရ မိက်ဂွံဂွံအဝဵုတုဲ သီလဝ်အဝဵုဟွံသေၚ်ဟာ။ တုဲပၠန် ဆောပြိုၚ်ညးတံ ဗော်လဵုနွံကီုရော။ မုဗော်လေဝ်ဟၟဲပုဟ်။ ဗော်ဇၞော်အိုတ်ဂှ်ပျဳခိုၚ်ဖျိုဝ်မွဲရနွံမံၚ် ဗော်တၞဟ်ဟ်မှဟၟဲတှ်ေ အခိၚ်စန်ဒက်မာဲဂှ်မှ ကဵုတိုန်ကတိပါၚ်ရ။ ကဵုမာဲတုဲ ပေါဲရုဲမာဲတုဲအာတှ်ေ ကတိတံဏံ အလဵုလဵုကၠေံအိုတ်ရ။ ညိလေဝ်ဂလာန်ပတေဟ်အဲဟၟဲပုဟ်” သာ်ဝွံ သ္ဂးရ။
ပ္ဍဲဒေသကဝ်မယှေန်ပၞာန် ထိၚ်ချုက်ဂွံလဝ်ပေၚ်ၚ်ဂှ်တှ်ေ အလံၚ်အမာတ်ဗွဲမဂၠိုၚ် စှ်ေကၠောန်မံၚ် ပရေၚ်စန်ဒက်မာဲကီုလေဝ် ဒၞာဲတိဍာ် ဂကောံပၠန်ဂတးတံဇြဟတ်တဴဂှ် ဟွံဂွံဆဵုပရေၚ်စန်ဒက်မာဲပုဟ် ညးဒေသတံ ဟီုရ။
မွဲလပါ်ဂှ် သွက်အလံၚ်အမာတ်တံ ညံၚ်ဂွံစှ်ပရေၚ်စက်ဒက် တံၚ်ဂြဲမာဲမာန်ဂှ် ကဝ်မယှေန်ပၞာန်သီအဝဵုတံ သၠုၚ်လဝ်ပရေၚ်ဂီုကၠီုတုဲ ဇၟာပ်ပ်တ္ၚဲ ကၠောန်သ္ပမာတ်ဆိုအ် စၟဳစၟတ်မံၚ် အဆက်က်ကီုရ။
ပ္ဍဲပေါဲရုဲမာဲကဝ်မယှေန်ပၞာန်ကၠောန်အာဏံ ပ္ဍဲတွဵုရးမန်မ္ဂး အလံၚ်အမာတ်ပူဂဵု ပုဂ္ဂလမွဲတၠကီု နူကဵုဗော် ၉ ဗော် အလံၚ်အမာတ် ၂၅၀ ပြၚ် သွက်ဂွံလုပ်ပြိုၚ်အာ ပတိုန်လဝ်စရၚ်မဒှ်ရ။
ပ္ဍဲတွဵုရးမန်မ္ဂး ဒဳဇြမ်ပါ ၂၈ ဏံ နူကဵုကဝ်မယှေန်ပၞာန် ကၠောန်အာပေါဲရုဲမာဲ သ္ကုတ် ၁ ဂှ် ပ္ဍဲကဵုပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ် ကဵု ကျာ်မြဟ်တံမဒှ်တုဲ သှ်ေမံၚ် ၅ ပွိုၚ်ဍုၚ်ဂှ်တှ်ေ ပ္ဍဲဂျာန်နဝါရႋ ၁၁ ပ္ဍဲကဵုပေါဲရုဲမာဲ သ္ကုတ် ၂ ဂှ် ဆက်ကၠောန်အာရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – MOI