ဗြဝတဳ၊ နိုဝမ်ပါ ၄
တွဵုရးကရေၚ် ပ္ဍဲကဵုပွိုၚ်ဍုၚ်ဗြဝတဳ ကရောၚ်ပၞာန် ဒပ်ကဝ်မယှေန်ပၞာန် ထပက်ကၠုၚ်ဂှ် ဒှ်လဝ်ပေါဲဗတိုက်ကု ဒပ် KUN/KNLA သ္ကိုပ်သ္က ဂကောံဇြဟတ်ပၠန်ဂတးတံဂှ် နူကဵုဒပ်ကဝ်မယှေန်ပၞာန် ချိုတ်ဂၠိုၚ်တုဲ သီဂွံလဝ် လွဟ်၊ မကမ် ဗွဲမဂၠိုၚ်နွံရဂှ် ကရောၚ်ပၞာန်ကၠသာန် ဗတိတ်လဝ်ပရိုၚ်ရ။
ဒၞာဲဒေသသၠုၚ်ကျာဗြဝတဳ ဇရေၚ်ကွာန်ထီုဣသိ၊ မေန်လက်ပါန်၊ ဖလူတံဂှ် ကရောၚ်ပၞာန် ကဝ်မယှေန်ပၞာန် နကဵုဇြဟတ်ပေၚ်ၚ် ထပက်မံၚ်မဒှ်တုဲ နကဵုဇြဟတ်မၞိဟ်ဗွဲမဂၠိုၚ်၊ စကာဒရုၚ် နဲကဲ ကဆံၚ်လှုၚ်၊ ပန်ရီုကဵုမံၚ်လွဟ်ဇၞော်ဂမၠိုၚ်၊ ကမ်သၠောဝ် ပန်တာသ္ၚောဲ၊ သီုကဵုပၞာန်ကျာတံဂှ် ဒပ်ကဝ်မယှေန်ပၞာန် ကေတ်လဝ်စေဝ်လ္တူ ဍိုက်ဗတိုက်မံၚ်ရ။
ဒပ်ကဝ်မယှေန်ပၞာန် သၟဝ်တဲ ၝောံဒပ် ၂၂ ကရောၚ်ပၞာန် ထပက်ကၠုၚ်တံကဵု ဒပ် KNU/KNLA သ္ကိုပ်သ္က သ္ပလဝ်က္ဍိုပ် ပ္ဍဲဂကောံဇြဟတ်ပၠန်ဂတးတံမ္ဂး ကရောၚ်ပၞာန်ကၠသာန် ဗျူဟာ (၃၂)၊ ကရောၚ်ပၞာန် ကဝ်ဗရာ၊ ကရောၚ်ပၞာန် ဗဳနန်၊ ဂကောံပၠန်ဂတး Justice Soldier တံ ဒှ်ပေါဲဗတိုက် အလန်ကဵုအလန်နွံရဂှ် ပ္ဍဲလိက်လလောၚ်တြး ချူထမံက်လဝ်ရ။
ပ္ဍဲကဵုပေါဲဗတိုက် ဂိတုအံက်တဝ်ပါ ၃၁ တေံဂှ် ကောန်ဒပ် ကဝ်မယှေန်ပၞာန် ဗွဲမဂၠိုၚ် ချိုတ်အာလေဝ်နွံ၊ ညးဂြိပ်ကၠုၚ် ဖျေံလွဟ်တံကီု၊ ဂၠုဲပၞာန်ဂမၠိုၚ် ရဲဒးလဝ်ဘဲဝပ်နွံမံၚ်ရောၚ် ပ္ဍဲလိက်လလောၚ်တြး ချူထမံက်လဝ်ရ။
တုဲပၠန် ပရေၚ်ယုတ်မာ လ္တူညးဍုၚ်ကွာန်၊ ပၞော်တိတ်ဂၠံၚ်ဍာံဟွံသေၚ် နကဵုပွမ ယုတ်မာပပ်ပဳနာနာ ကၠောန်အာပေါဲရုဲမာဲဏံဂှ် ညးဍုၚ်ကွာန်တံ လ္ပပါလုပ်ညိဂှ် ဂကောံဒပ်ပၠန်ဂတးဂမၠိုၚ် ဗတိုက်ဖအောဝ် လလောၚ်တြးလဝ်ရ။
ဍုၚ်လေကေကဝ် နွံမံၚ်သၠုၚ်ကျာဗြဝတဳဂှ် ပ္ဍဲလဒေါဝ် ဂိတု အံက်တဝ်ပါဂှ် ဒပ်ကဝ်မယှေန်ပၞာန် သီဂွံလဝ်တုဲ ကွာန်ကရပ်ဗ္ဒာဲဂှ်ကီု ပ္ဍဲကဵုကွာန်သ္ကုတ်ဂၠံၚ် ဗြဝတဳ-ဝဝ်လေတံဂှ်လေဝ် ထပက် ကရောၚ်ပၞာန် ပေါဲဗတိုက်ဆက်ဒှ်မံၚ်ကု ဂကောံဇြဟတ်ပၠန်ဂတးတံဇၞော်ကဵုဇြဟတ် မဒှ်ရ။
ပ္ဍဲကဵုပေါဲဗတိုက်တံဏံ ကွးဘာစှ်ေနူဘာပၞာန် ဒပ်ကဝ်မယှေန်ပၞာန် တၟိတၟိတံဂှ် ဟိုတ်နူ ကဵုအာဂတ ဒုၚ်ဂစိုတ်ဗတိုက်မံၚ်ဂှ်တုဲ ကောန်ဒပ် ယိုက်ဝန်ပၞာန်တၟိတၟိဗွဲမဂၠိုၚ် ချိုတ်အာနွံ၊ ဂြိပ်တိတ်အာ လပါ်ဒပ်ပၠန်ဂတးတံကီု ဖျေံထောံလွဟ်တံ နွံရ။
ပရိုၚ်-သြၚ်လောန်တိုၚ်မ်
Photo – CJ