မတ်မလီု ၊ နိုဝမ်ပါ ၄
ပ္ဍဲကဵုၝောံဍုၚ်ဇၞော် တွဵုရးဍုၚ်မန် လ္တူဍုၚ်မတ်မလီုဝွံ ပ္ဍဲကာလသဘၚ်ကထိုန်ဏံ ဆေၚ်ကၠေၚ်စက်ဗွဲမဂၠိုၚ်တံဂှ် ကၠေၚ်စက်ပိုတ်အာ နွံမံၚ်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဆေၚ်ကၠေၚ်စက်ဗွဲမဂၠိုၚ်တံ ဗီုတ္ၚဲကၠာကၠာတေံရ သွံတြးကဵုမံၚ် အတိုၚ်ဗီုတြေံတေံကီုလေဝ် စိုပ်အခိၚ်တ္ၚဲ ပေါဲသဘၚ်ကထိုန်ဏံမှ ကၠေၚ်စက်ပိုတ်အာဒှ်တုဲ အကာဲအရာ ရာန်ကၠေၚ်စက်ဝါတ်ခုဲအာ ဒှ်ကၠုၚ်လဝ်ရ။
ပြဟ်ဟ်ဏံ ပ္ဍဲကဵုဆေၚ်ကၠေၚ်ဗွဲမဂၠိုၚ်တံမ္ဂး ကၠေၚ်စက် ဂကူကၠေၚ်ဓါတ် အံက်တုၚ် 92- 95 ကီု ကၠေၚ်ဒဳဇေဝ် ပရဳမဳယာန်တံကီု ပိုတ်မံၚ်တုဲ ဗီုနွံပၟိက်ရာန်ဟွံဂွံ အကာဲအရာနွံမံၚ်ရောၚ် ဂွံတီရ။
အကြာတ္ၚဲတံဏံ ကၠေၚ်စက်ပိုတ်အာ ဇၞော်ကဵုဇြဟတ်တုဲ အရိုဟ်ဟ်တ္ၚဲ ဟိုတ်နူဒးစကာမံၚ်ကၠေၚ်ဓါတ်ဂှ်ရ ရာန်ကၠေၚ်ဓါတ် ဟွံဂွံဂှ်တှ်ေ ဒှ်အခက်အခုဲဗွဲမလောန်ရောၚ် ညးဒဳကွဳစက်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ကၠေၚ်ပိုတ်မံၚ်၊ ဆေၚ်နွံဂှ်နွံ ဆေၚ်ဟၟဲဂှ်ဟၟဲ၊ အခိၚ်ဂွံဂှ်ဂွံ အခိၚ်ဟွံဂွံဂှ် ဟွံဂွံဒှ်မံၚ်။ အကြာတ္ၚဲတံဏံတံဏံ ကၠေၚ်ပိုတ်အိုတ်စောန်။ ဂွံမိၚ်မွဲသာ်ဂှ် ဟိုတ်နူၚုဟ်ကၠေၚ်ဓါတ်စှ်ေအာတုဲ ဟွံသွံဟာ၊ ဂွံမိၚ်ဟဏံကီုရ၊ လၟုဟ် ကၠေၚ်ဓါတ် နွံမံၚ်ဒၞာဲလဵုရော ဟွံတီပုဟ်။ ဆလဆလ မိၚ်ပရိုၚ်ကၠေၚ်ဓါတ်နွံ လအာစိုပ်အတေံ ကၠေၚ်ဓါတ်ဟၟဲပၠန်၊ ကၠေၚ်ဓါတ်နွံမံၚ်ဇကုဂှ် အိုတ်ပၠန်၊ ဒးဒဳမံၚ်ကဵု ကၠေၚ်ဓါတ်အရိုဟ်ဟ်တ္ၚဲဂှ် ကၠေၚ်ဓါတ်ဟၟဲတှ်ေ ဂၠံၚ်ကၠက်အာ” သာ်ဝွံ သ္ဂးရ။
တုဲပၠန် ဆေၚ်ကၠေၚ်ပ္ဍဲဒေသတံဂှ် ကၠေၚ်နွံပၠန်တှ်ေလေဝ် ဒးအာၜေတ်မံၚ်ဗီုဗီုကၠာတေံပၠန် ဒှ်မံၚ်တုဲ ယဝ်ရကၠေၚ်စက်ပိုတ်အာ မိၚ်ပရိုၚ်မ္ဂး အခိၚ်ဗ္တံ ဒးမၚ်တိက်ရာန်မံၚ် အကာဲအရာဗီုကၠာတေံ ကလေၚ်ဒှ်ကၠုၚ်မာန်ရောၚ် ညးဆက်ဟီုရ။
ပြဟ်ဟ်ဏံ ကၠေၚ်စက်ဂွံပိုတ်အာဟီုဂှ်တှ်ေ ကၠေၚ်စက်သွက်တွဵုရးမန်ဂှ် ဗီုကၠာတေံဒးအာကေတ် ပ္ဍဲတဳလဝါတေံဟွံသေၚ် လၟုဟ်ဒးအာပတိတ်မံၚ် ပ္ဍဲသၞေဟ်ဂဒုၚ်မံက်-မုဟ်ဍုၚ်တုဲ ဖျေံလဝ်ဗီုပြၚ် သၞောတ်ဟွံစှ်ေတုဲ ဒးမၚ်မံၚ်ဂှ် အခိၚ်အိုတ် အိၚ်ဇိၚ်မံၚ်ကွေံကွေံ ရောၚ်ဂှ် ညးတၠဆေၚ်ကၠေၚ်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ကၠေၚ်စက်အရၚ်တွဵုမန် ပါ်ပရအ်ကဵုလဝ်တံဂှ် လၟုဟ်ဖျေံကဵုကၠောန် ပ္ဍဲကဵုသၞေဟ်ဂဒုၚ်မံက်၊ ကွဳစက်အာဖ္ဍိုက်ကၠေၚ် ဒးအာမၚ်ကေတ် အခိၚ်လံဒးမၚ်မံၚ်။ ကွဳစက်လ္ၚဵု ပိပန်တ္ၚဲ ဒးမၚ်ဖ္ဍိုက်ကေတ်ကၠေၚ်၊ ရာန်ကဵုသွံ ဗက်ဟွံဂတာပ်ပုဟ်။ အဓိက ညးပြုပြေၚ်ဖန်ဇန်မံၚ် သၞေဟ်ကွဳစက် သၟိၚ်ရာဇာ(ရာဇာမၚ်း)ရ။ ကၠေၚ်ဟၟဲဂှ်ဟွံသေၚ်၊ ကၠေၚ်နွံမံၚ်ရ။ ပရေၚ်ပြုပြေၚ်စဳရေၚ် ဇြဟတ်ဍိုန်လျကွေံကွေံ။ ဒးမၚ်အခိၚ်လံတုဲမှ ဂွံဂွံကၠေၚ်” သာ်ဝွံ သ္ဂးရ။
လၟုဟ်ဒှ်မံၚ်ကာလ ပေါဲသဘၚ်ကထိုန်ဂှ်ရ ပရေၚ်အာတရဴဂၠိုၚ်တိုန်၊ ဒးရာန်ကၠေၚ်လေဝ်ဂၠိုၚ်တိုန်ကီု ဒၟာနူသၞေဟ် ရာဇာမၚ်း သၟိၚ်ရာဇာ ပရေၚ်ပြုပြေၚ်စဳရေၚ်ကမၠောန် ဇြဟတ်ဍိုန်လျတုဲ ကၠေၚ်စက်ပိုတ် ဒးက္တဵုဒှ်အာရဂှ် ညးဆက်ဟီုရ။
ပ္ဍဲအကြာဒေသတံမ္ဂး အခိၚ်ပၞာန်သီအဝဵုတုဲ ဗွဲကြဴဏံ ပရေၚ်ကၠေၚ်စက်ပိုတ် ကေၚ်ဒှ်ကၠုၚ်မံၚ်မွဲဏှမွဲဏှကီုတုဲ ဒးကဵုအခိၚ် ၜေတ်ရာန်ကၠေၚ်တံ၊ ဗီုပၟိက်နွံရာန်ဟွံဂွံသၟးဟွံက ပါ်ကဵုအလန်ညး ကဵုညးတုဲ ဒးရာန်ကေတ်မံၚ်နကဵုသၞောတ်ထ္ၜတ်ကီုရ။
မွဲလပါ်ပၠန် နူကဵုကဝ်မတဳကောပ်ကာဲ ကမၠောန်ကၠေၚ်စက် သၟဝ်တဲကဝ်မယှေန်ပၞာန်ဂှ်တှ်ေ သွက်ဍုၚ်မတ်မလီု ကၠေၚ်ဓါတ် ၉၂ မွဲလေတ် ပွဳပွူ ၂၉၀၀ ဒကေဝ်။ ကၠေၚ်ဓါတ် ၉၅ မွဲလေတ် ပွဳပွူ ၃၀၀၀ ဒကေဝ်၊ ကၠေၚ်ဒဳဇေဝ် ပရဳမဳယာန်မွဲလေတ် ၃၂၀၀ ဒကေဝ် ခုတ်စၟတ်လဝ်ကဵုၚုဟ်မးကီုလေဝ် ဟိုတ်နူကၠေၚ်ပိုတ်မံၚ်ဂှ်ရ သွက်ဂွံရာန် ဒှ်မံၚ်အခက်အခုဲ မဒှ်ရ။
ပ္ဍဲဍုၚ်မတ်မလီု အခိၚ်လက်ထက်အလဵုအသဳတုဲကၠုၚ်တေံမ္ဂး ကၠေၚ်ဓါတ်မွဲလေတ် ဗ္ဒာဲ ၆၀၀ ဒကေဝ် နွံကၠုၚ်မံၚ်ဂှ် အခိၚ်သီအဝဵုတုဲ သၠုၚ်တိုန်အာ ၅ ဆကီု မွဲဏှမွဲဏှ ခြာဟွံလံဟွံလံ ကၠေၚ်စက် ကေၚ်ပိုတ်အာလဝ် က္တဵုဒှ်လဝ်ရ။
ပရိုၚ်-သြၚ်လောန်တိုၚ်မ်
Photo – CJ