မိုဝ်ဂုက်၊ နိုဝမ်ပါ ၄
အလဵုအသဳကြုက် ပ္ညဳပ္ညပ်ကဵုလဝ် အကြာၜါလွးဂှ်ရ ဒပ်ပၞာန်တအာၚ် ကေတ်ထောံဒေါအ်ပန်ပှော်ကဵု ဒပ်ပၞာန်ဗမာဂှ် သွက်ဂွံ ကလေၚ် ပကောံဇြဟတ်ရောၚ် က္ဍိုပ်သ္ကိုပ် TNLA သ္ကိုပ်ပၞာန် တာဖုၚ်ကျဝ် ဟီုပတိတ်လဝ်လစွံစိုတ် ညးရ။
လ္တူဖျေံဏာတင်သ္ဂုတ်သွာတ် ပရေၚ်ဒေါအ်ပန်ပှော်ဝွံ မ္ဒးဒှ်အာပရေၚ်ဒုၚ်စသိုၚ် ဟတိုဟ်တိတ်ကၠုၚ် ဗွဲမပြဟ်ပြေဟ်ရောၚ် ကၠိုဟ်ခၠၚ်ကေတ်ဂှ်တုဲ ဒးဒုၚ်မံၚ်ဘဲဒဏ် ဗုမ်ဗြဲၜၚ်ကျာပၞာန် မွဲစွံတုပ်ပ် ကာလဗၠိုက်တၞီမံၚ် အကြာပရေၚ်ပိုန်ဒြပ်ဟွံသေၚ်ရောၚ် သ္ဂးရ။
တုဲပၠန် ဒေါအ်ပန်ပှော်ထေက်ရောၚ် အခိၚ်ဇြဟတ်ဟရိုဟ် ဂၠိုၚ်တိုန် မံၚ်ဏံ သွက်ကလေၚ်ပကောံဇြဟတ်ဂှ် မ္ဒးဒေါအ်လဝ်မဒှ်တုဲ ပ္ဍဲအရာပရေၚ်ပၠန်ဂတးမ္ဂး သွက်ဂွံပဝ်တိုန်သၠုၚ်ၚ်မာန် ကေုာံ ညံၚ်ဂွံၜှ်ပလှ်ကေတ် အတိုၚ်ပၟိက်နွံတံ သ္ဂးတုဲ ပ္ဍဲနဝ်ဝမ်ပါ ၂ အခိၚ်သဝ်တ္ၚဲဂှ် ချူပတိုန်လဝ် ပဍဲအကံက် Facebook ညး Mai Tea Land မဒှ်ရ။
ဆဂး လိက်လလောၚ်တြးဏံဂှ် နူကဵုဒပ်တအာၚ် TNLA ဌာနလလောၚ်ပရိုၚ် တြးပတိတ်လဝ် ဗဗွဲဓရ်ဟွံသေၚ်တုဲ စိုပ်ဂိတုနဝ်ဝမ်ပါ ၃ အခိၚ်နူဂယးဂှ် ပရေၚ်ချူတြး သ္ကိုပ်ပၞာန် တာဖုၚ်ကျဝ် ချူလဝ်ဏံ ကလေၚ်ပလှ်ဖျေံဏာပၠန်ရ။
ပ္ဍဲအကာဲအရာပရေၚ်ပၞာန်လၟုဟ်ဏံ နကဵုဂကောံဇြဟတ်ညးကဵုညး ကောံကလောအ်ဗိုန်ဗတ် ဒးဒှ်မံၚ်တုဲ ကွပ်ဒၞာဲဍေံကဵုဍေံ အကာဲအရာစိုပ်မံၚ် ဒးဖျေံကဵုတာလျိုၚ် ခုတ်စၟတ်ကၠောန်အာရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်ရ။
“အကာဲအရာလၟုဟ် ဂိတုဒဳဇြမ်ပါ ၂၀၂၅ တှ်ေ တၠုၚ်လအာ သၟဝ်ကျာဒေသသေံ မိုဂုက် ဗီုလဵုဒှ်အာရော ပိုဲဒးမံၚ်ရံၚ်အာ။ ဇကုကၠောန်မှ ဇကုဂွံဏောၚ်၊ နကဵုဇြဟတ်ဇကုကဵုဇကု ဗီုပြၚ်ဇကု ကၟောန်ကၟောန်ဇိပ်ပ်ဂၠိပ်ပ် မဒှ်ပကောံအာဇြဟတ်ဏောၚ်။ လၟုဟ် ဟွံဒုၚ်ဝန်ဟွံဂွံရ။ ညးဂှ်မုကၠောန်န် အဲကၠောန်လဝ်ဖအိုတ်ဏောၚ် ဟီုဟွံဂွံပုဟ်။ ကွပ်ညးကဵုညး ဒၞာဲဍေံကဵုဍေံ ခုတ်စၟတ်ပိုၚ်ခြာ တာလျိုၚ်တုဲ နကဵုတာလျိုၚ်ဇၟာပ်ညးအဲ မ္ဒးကၠောန်အာ စိုပ်မံၚ်အကာဲအရာဏံယျ” သာ်ဝွံ သ္ဂးရ။
အခိၚ်ဒပ်တအာၚ် TNLA လဝေၚ်ပၞာန် ၁၀၂၇ တေံ ပံၚ်တောဲကဵု ဒပ်မဟာမိတ်တံတုဲ သီဂွံလဝ် ဍုၚ်မိုဝ်ဂုက် ရးမာန္တလေဝ်ကီု သီုကဵု သၟဝ်ကျာသေံ အပံၚ်ဖအိုတ် ၁၂ ဍုၚ်ကီုလေဝ် ဟိုတ်နူဒပ်ပၞာန်ဗမာ ကလေၚ်ပလန်ထပက်ပၞာန်ဂှ်ရ ဒးကလေၚ်ဗလးဏာတဲ ဍုၚ်နံၚ်ချိုဝ်၊ ကျံက်မေဝ်၊ တဳပဝ်တံ မဒှ်ရ။
တုဲပၠန် နကဵုဇြဟတ်ဟရိုဟ်ကြုက်ကီု ဒပ်ပၞာန်ကျာဗမာတံ ထပ်ဗတိုက်ပၠန်ဂှ် ဒပ်တအာၚ် ဒးထပ်ဗလးလဝ်တဲ ဍုၚ်မိုဝ်ဂုက်ကဵု မိုဝ်မုက်ပၠန်မဒှ်တုဲ သွက်ဂွံထိၚ်ချုက်အာ ဒေသသၟဝ်ကျာသေံ သှ်ေမံၚ် ၇ ဍုၚ်ဏီရ။
ပ္ဍဲကဵုအံက်တဝ်ပါ ၂၇-၂၈ တေံ နူကဵုဂကောံအလဵုအသဳကြုက် ညးစၞးတၟေၚ် တိက်ယှဳကျွေၚ် သ္ကိုပ်သ္က ကၠောန်အာလဝ် ပရေၚ်သဳကၠဳ အကြာညးစၞး ဒပ်တအာၚ် ကဵု ညးစၞးဒပ်ပၞာန်ဗမာတံ ဆဵုဂဗလဝ် ပ္ဍဲဍုၚ်ကူမေန်ရ။
အပ္ဍဲကဵုပေါဲဆဵုဂဗဏံ ထပက်လဝ်လိက်ကသုက် ပရေၚ်ဒေါအ်ပန်ပှော် အကြာၜါလပါ်ဂှ်မ္ဂး စနူအံက်တဝ်ပါ ၂၉ ပ္ဍဲကဵုဒၞာဲဒပ်ညးတံ စိုပ်အာလဝ်ဂှ် ဒးဒေါအ်ပန်ပှော်ရောၚ် သ္ဂးလဝ်ရ။
တုဲပၠန် ဒၞာဲ TNLA ထိၚ်ချုက်ဂွံလဝ် နူကဵုဍုၚ်မိုဝ်ဂုက်ကဵု မိုဝ်မုက်တံဂှ် မ္ဒးကလေၚ်ဆုတ်တိတ်အာကဵုရောၚ် မဒှ်တုဲ နူကဵုဒပ်ပၞာန် ပန်ဖျေံမံၚ် ဗုမ် နကဵုၜၚ်ကျာ ပ္ဍဲဒေသတအာၚ်ဂှ်ကီု ပရေၚ်လဝေၚ်ပၞာန်ကီု ဒးဒေါအ်ရောၚ် တုပ်လဝ်စိုတ် ညးသ္ကံရ။
ဆဂး ဒပ်နွံမံၚ်သၟဝ်တဲပရေၚ်ကောပ်ကာဲ သၟဝ်တဲဌာနပရေၚ်စဵုဒၞာ အလဵုအသဳညဳသၟဟ်ဂကူ NUG ဗျူဟာမိုဝ်ဂုက်ကဵု PDF မာန္တလေဝ် တံဂှ် ပ္ဍဲကဵုဒၞာဲဒေသတိဍာ်ထိၚ်ချုက်လဝ်ဏံ ဒဵုကဵုအစောန်အိုတ် စဵုဒၞာအာရောၚ် ကဵုလဝ်သမ္တီ မဒှ်ရ။
ရးမာန္တလေဝ် ဍုၚ်မိုဝ်ဂုက် ကဵု ဒေသသေံသၟဝ်ကျာ ဍုၚ်မိုဝ်မုက်တံဝွံ ပ္ဍဲကဵုပရေၚ်လဝေၚ်ပၞာန် သ္ကုတ်ဒုတိယ ၁၀၂၇ ဂှ် ဒပ်တအာၚ် TNLA ကဵု ဒပ်ပၞာန်စဵုဒၞာညးဍုၚ်ကွာန် ဌာနဝန်ဇၞော်ပရေၚ်စဵုဒၞာ NUG တံ ပံၚ်တောဲဗတိုက်ဂွံလဝ်ရ။
ပြဟ်ဟ်ဏံ အပ္ဍဲကဵုၜါဍုၚ်ဏံမ္ဂး ဒပ်တအာၚ် ကလေၚ်ဆုတ်အာကီုလေဝ် ဒပ်မဟာမိတ်သှ်ေမံၚ်တံ ဆက်စဵုဒၞာဲအာမဒှ်တုဲ နူကဵုဒပ်ပၞာန်ဗမာလေဝ် ဆက်လလောၚ်တြးလဝ် အကာဲအရာကာမံက်တိုန် အမိၚ်ပရေၚ်အုပ်ဓုပ်ပၞာန်ပၠန် ဒဵုကဵုပွိုၚ် ၉၀ တ္ၚဲ ထပဵုလဝ်အယုက်ကီုရ။
ဒပ်ပၞာန်ဗမာလ္ၚဵု နွံမံၚ်ဒေသသၟဝ်ကျာတံဂှ် ကဵုလဝ်ဇၟောဝ်ဇၞူ မွဲအခိၚ်ဍောတ် မဒှ်တုဲ ပြဟ်ဟ်ဏံ သွက်ဂွံကလေၚ်ပလန် ထပက်ဝေၚ်အာပၞာန် ဍုၚ်မိုဝ်ဂုက်ဂှ် ဒှ်ဟွံမာန်ဏီပုဟ် ဗိုလ်ဇၞော် CDM ဇြေန်ယဝ် သ္ၚဳဂၠိပ်လဝ်ရ။
“အဲညာတ်ဂှ် ပေါဲရုဲမာဲတုဲမှ ဗီုပြၚ်ကလေၚ်ဗတိုက် လပါ်ဍုၚ်မိုဝ်ဂုက် ဒှ်မာန်။ ပြဟ်ဟ် အတိုၚ်အကာဲအရာဏံ ပ္ဍဲကဵုဒပ်ပၞာန်ဗမာ ဇြဟတ်ပၞာန် သွက်ဂွံဗတိုက် ပ္ဍဲကဵုဍေံတံဟၟဲဏီ။ ဒးပလံၚ်လဝ် ဒၞာဲတၞဟ်ဟ်လေဝ် နွံမံၚ်ကီုတုဲ စကခ ၁၂ ဂှ် ပ္ဍဲတွဵုရးကရေၚ်၊ ၝောံဒပ် ၁၁ ဂှ် ပ္ဍဲလ္ဂုၚ်။ ကဵုလဝ်ဟမောဝ်ဇူ မွဲအံၚ်တုဲတှ်ေ ကဵုဆက်အာ ဒၞာဲမုက်ပၞာန် တၞဟ်ဟ်ဏောၚ် ခယျ၊ မိုဝ်ဂုက်ဂှ် ကၠောန်ပေါဲရုဲမာဲဟွံမာန် ဒုၚ်လဝ်ဝန်နွံမံၚ်။ ဟိုတ်ဂှ်တုဲ ပြဟ်ဟ်ဏံ ဍေံတံ ဒးကလေၚ်ထပ်ပကောံ မၞိဟ်ကဵုလွဟ်တံ နွံမံၚ်ဏီ အဲထေၚ်ဟဂှ်” သာ်ဝွံ သ္ဂးရ။
ပ္ဍဲကၞောတ်ဒဳဇြမ်ပါကဵု သၞာံမံက်တေံ ကဝ်မယှေန်ပၞာန် သွက်ဂွံကၠောန်အာ ပေါဲရုဲမာဲ ပ္ဍဲကဵုသ္ကုတ် ၁ ကဵု ၂ မ္ဂး ပွိုၚ်ဍုၚ်မိုဝ်ဂုက် ကဵု မိုဝ်မုက်တံဂှ် စုတ်လဝ်စရၚ် ဒၞာဲကၠောန်ပေါဲရုဲမာဲ ဟွံမာန် ၅၆ ပွိုၚ်ဍုၚ်ရ။
ပ္ဍဲကာလသီအဝဵုဏံ ပရေၚ်လဝေၚ်ပၞာန် ၁၀၂၇ ဝွံ ဂကောံကောဒေံပိဂကောံတံ သီုကဵုအသိၚ်အလိုန် ပၠန်ဂတးတမ်ကညၚ် ဂွံကၠုၚ်ပေါဲအံၚ်ဇၞး အလန်ဂၠိုၚ်ကဵုဝါ ဒဵုကဵုသီဂွံဏာ ရးဌာန်ဂအုပ်ပၞာန်ဗမာ ဒှ်ကၠုၚ်အပြံၚ်လှာဲ ဝင် ဒပ်ပၞာန်ဗမာ မဒှ်ရ။
ဆဂး ဒၟာနူကဵု အလဵုအသဳကြုက် လုပ်ပ္ညဳအကြာဂှ်ရ ဂကောံကောဒေံပိ ဒပ်ကဝ်က MNDAA ကဵု ဒပ်တအာၚ် TNLA တံ ပြဟ်ဟ်ဏံ ဒှ်ဒၟံၚ် ဂကောံကောန်ဍုၚ်အရၚ်ရပ်လွဟ် ဒေါအ်ပန်ပှော်လဝ်ကဵု ဒပ်ပၞာန်ဗမာရ။
ဒပ်ပၞာန်စဵုဒၞာညးဍုၚ်ကွာန် မံက်တိတ်ကၠုၚ်လဝ် နူကဵုပရေၚ်သီအဝဵုဏံဝွံ သွက်ဂွံဒက်ပတိုန်အာ ကၟိန်ဍုၚ်ဖိတ်ဒရေဝ် ဒဳမဝ်ကရေသဳမာန် ပေါဲဗတိုက် ဗတိုက်သရိုဟ်သၞောတ်တၠအဝဵုပၞာန်ဂှ် ဆက်ကၠောန်အာ မံၚ်ဖိုအ်ရ။
ပရိုၚ်-သြၚ်လောန်တိုၚ်မ်
Photo – TNLA