တယိတ်ချံၚ်၊ နိုဝမ်ပါ ၅
ရးတနၚ်သဳ ပ္ဍဲကဵုပေါဲဗတိုက် ပွိုၚ်ဍုၚ်တယိတ်ချံၚ်ဂှ် ကောန်သ္ဂံၚ် ဒပ်ပၞာန်စဵုဒၞာ ညးဍုၚ်ကွာန် PDF ၂ တၠပြဟ်လလုဲတုဲ ၈ တၠ ဒးလဝ်ဝပ်ရောၚ် နူကဵုဒပ်ပံၚ်ကောံခရိုၚ်ထဝါဲ လလောၚ်တြး ပ္ဍဲနဝ်ဝမ်ပါ ၄ ရ။
တုဲကၠုၚ် ဂိတုသိပ်တမ်ပါ သတ္တဟလက်ကရဴအိုတ်ကဵု ပ္ဍဲနဝ်ဝမ်ပါ ပထမသတ္တဟဂှ် ဟိုတ်နူဒပ်ကဝ်မယှေန်ပၞာန် ထပက်ကၠုၚ်ကရောၚ်ပၞာန်ဂှ်ရ ပ္ဍဲကဵုကွာန်ကၞိန်တၟံ (ကျောက်လှေခါး) ကဵု ကြုၚ်ပဒက်ဇၞော် ပွိုၚ်ဍုၚ်တယိတ်ချံၚ်ဂှ် ဒှ်လဝ်ပေါဲဗတိုက် သ္ကတ်မြဟ်ရ။
အပ္ဍဲပေါဲဗတိုက်ဏံ ရဲလပါ် ဂကောံမဟာမိတ် ဒပ်ပံၚ်တောဲဇြဟတ်ပၠန်ဂတးတံ ကောန်သ္ဂံၚ်၂ တၠပြဟ်လလုဲတုဲ ၈ တၠဒးဘဲဝပ် လွဟ် မွဲဇကိုအ် ဆောံလေၚ်အာလဝ် သ္ဂးရ။
ပ္ဍဲပေါဲဗတိုက်ဏံ လပါ်ဒပ်ကဝ်မယှေန်ပၞာန်တံ ကောန်ပၞာန် ၁၃ တၠ ချိုတ်အာတုဲ ဟွံအောန်နူကဵု ၁၀ တၠ ဒးအာလဝ်ဘဲဝပ်ကီု သီုကဵုရဲပၠန်ဂတးတံ သီဂွံဏာ လွဟ်မကမ်တံရဂှ် ဂွံတီနူ တင်လလောၚ်တြးဏံရ။
အကာဲအရာပရေၚ်ပၞာန် ၜါလပါ်ဂှ် အခိၚ်လၟုဟ်မှ လလောၚ်ပတိတ်ပရိုၚ် ပေါဲဗတိုက်ဏံမာန်ရဂှ်လေဝ် ညးတာလျိုၚ်လလောၚ်ပရိုၚ် ဒပ်ပံၚ်ကောံခရိုၚ်ထဝါဲ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုပရေၚ်ပေါဲဗတိုက်ဏံ ဒပ်ပံၚ်ကောံခရိုၚ်ထဝါဲ၊ ဗော်သွးကောန်ဂကူကရေၚ် KNU မဟာဒပ် ၄ တမ်ဒပ် ၁၂ ကဵု ဒပ်ပံၚ်တောဲမဟာမိတ်တံ ဗတိုက်လဝ် မဒှ်ရ။
အခိၚ်ပေါဲဗတိုက်ဒှ်မံၚ်ဏံ သ္ၚိနူကဵု ကွာန်ကျံက်လှေကာ သဝ်ဖျာ ကဵု မိုဝ်ယှိုဲကုၚ် ၅၀ မပြၚ်ဂှ် နူကဵုကရောၚ်ပၞာန် ဒပ်ကဝ်မယှေန်ပၞာန်တံ စံၚ်ပလီုထောံလဝ် ဂွံတီရ။
ပရိုၚ်-သြၚ်လောန်တိုၚ်မ်
Photo – PDF