ကျာ်မြဟ်၊ နိုဝမ်ပါ ၅
တွဵုရးမန် ပွိုၚ်ဍုၚ်ကျာ်မြဟ် ပ္ဍဲကဵုရုၚ်စက်တိဗဳလာတ် MCL နွံကရပ်ကွာန် ခဒုၚ်စေပ်ဂှ် ဒပ်ကဝ်မယှေန်ပၞာန် ဖျေံဒပ်ဂဇအ်လဝ်တုဲ ဗက်ဂၠာဲဂၟာဲမံၚ်ပ္ဍဲကွာန်ဂမၠိုၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဒဵုကဵုနဝ်ဝမ်ပါ ၃ ဇြဟတ်ကရောၚ်ပၞာန် ဒပ်ကဝ်မယှေန်ပၞာန်ဗမာ ၜိုတ် ၂၀၀ တံ ဖျေံလဝ်ဒပ် ပ္ဍဲဗွိုၚ်ရုၚ်စက်တိဗဳလာတ် MCL တုဲ ပ္ဍဲကဵုကွာန် ခဒုၚ်စေပ်၊ ယှိုဲဝါချံၚ်၊ ပံက်တဝ်တံ လုပ်ဗက်ဂၠိုက်ဂၠာဲကီု လ္တူဂၠံၚ်ကွဳစက် ခဒုၚ်စေပ်-ကအ်ဒုန်၊ ဂၠံၚ် ခဒုၚ်စေပ်- ကုန်ဇြဲတံကီု ဂၠိုက်ဂၠာဲစၟဳစၟတ်မံၚ် သ္ဂးရ။
အခိၚ်ကရောၚ်ပၞာန် လုပ်ကၠုၚ်ကွာန်တှ်ေ သ္ၚိဟွံသၚ်ကာတံဂှ် လုပ်စၟဳစၟတ်လဝ်ကီု အာတ်ဗဵုစရၚ်သ္ၚိသၟးဟွံက ကွဳစက် တတ်ကၠောန်အာကၠုၚ်မံၚ် လ္တူဂၠံၚ်ဍာန်တံဂှ်ပၠန်လေဝ် ဟွံသေၚ်ကာမ္ဂး ပံက်ဗဵုအာလဝ်နွံရဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဏံ ဗက်ဂၠိုက်ဂၠာဲစၟဳစၟတ်ကြာန်မံၚ်ကီုလေဝ် ရပ်ဏာညးဒေသတံဂှ် ဟွံဂွံမိၚ်ပရိုၚ်ဏီ သ္ဂးရ။
ဟိုတ်နူကရောၚ်ပၞာန် ဗက်လုပ်စၟဳစၟတ်မံၚ် အပ္ဍဲသ္ၚိဗီုဏံဂှ်တှ်ေ ဂွိၚ်ဖေက်ဒးတံၚ်ပဝ်တာတုဲ သၟတ်ညးတြုံလ္ၚဵုတံ ပါဲဓလေတ်အာလဝ် ဒၞာဲတၞဟ်ဟ်နွံရ။
နူကဵုဒပ်ပၞာန်ဗမာ ထပက်မံၚ်ကရောၚ်ပၞာန် အာကၠုၚ်မံၚ်ဗီုဏံဂှ် ရဲဒပ်ဂကောံဇြဟတ်ပၠန်ဂတးတံ မၚ်ရံၚ်မံၚ်တုဲ စဳဇန်မံၚ် သွက်ဂွံကလေၚ်ပလန်ဗတိုက်အာဂှ် ဂွံတီရ။
ကရောၚ်ပၞာန်ဏံ စနူကဵုအံက်တဝ်ပါ ၂၆ ဂှ် တတ်ကၠောံကၠုၚ် ပ္ဍဲကဵုဂအုံကွာန် ကြေင်ဏာကဵု ခဒုၚ်စေပ်တံတုဲ ကၠုၚ်ဖျေံလဝ်ဒပ် ပ္ဍဲကဵုပွဳပွူ ရုၚ်စက်တိဗဳလာတ် MCL မဒှ်ရ။
ပ္ဍဲကဵုဒၞာဲကရောၚ်ပၞာန် ကဝ်မယှေန်ပၞာန်အာကၠုၚ်ချဳဒရာၚ်မံၚ် လၟုဟ်ဏံဝွံ ပ္ဍဲကဵုသၞာံ ၂၀၂၄ တေံ ဒပ်ပံၚ်တောဲ KNLA တံ ကေၚ်ထိၚ်ချုက်လဝ်မဒှ်တုဲ အခိၚ်ဒပ်ကဝ်မယှေန်ပၞာန်ဗမာတံ ထပက်ကၠုၚ်ကရောၚ်ပၞာန်ဂှ် ပ္ဍဲပွဳပွူ ရုၚ်စက်တိဗဳလာတ် MCL ဂှ်တှ်ေ ပေါဲဗတိုက်ဒှ်လဝ်ဟၟဲ ဂွံတီရ။
ပရိုၚ်-သြၚ်လောန်တိုၚ်မ်
Photo – CJ

