ဘာအၚ်၊ နိုဝမ်ပါ ၅
ဂတဵုမုက်စန်ဒက်မာဲ သ္ကိုပ်ဝန်ဇၞော်တွဵုရးကရေၚ် ဥူသဝ်မျေအ်ဥူ ကဝ်မယှေန်ပၞာန်ခါန်ကၞက်လဝ်ဂှ် သၟတ်အယုက် ၁၅ သၞာံမွဲတၠကဵု ညးတြုံတၞဟ်မွဲ အပံၚ်ၜါတၠတံ ဟိုတ်နူဂစိုက်လဝ်ဂှ်ရ နကဵုဥပဒေ ပေါဲရုဲမာဲ ပံက်အမှုကေတ်လဝ်အရေဝ်ရဂှ် နူကဵုကဝ်မယှေန်ပၞာန် လလေၚ်ပတိတ်လဝ်ပရိုၚ်ရ။
ဂတဵုမုက်ဗဳနိုၚ် ဗီုရုပ်ကဵုမလိက်ပါ အလံၚ်အမတ်စၠတ်ထဝ်တွဵုရး ပွိုၚ်ဍုၚ်ဘာအၚ် ဥူသဝ်မျေအ်ဥူ ညးစၞးဗော်ပျဳခိုၚ်ဖျိုဝ် ဗစူစွံလဝ်ဂတမုက် ရုၚ်သ္ကိုပ်အုပ်ဓုပ်အရာပ်(၂) လ္တူကဵုဍုၚ်ဘာအၚ်ဂှ် ပ္ဍဲကဵုနဝ်ဝမ်ပါ ၂ တေံ ညးမံၚ်ဒၟံၚ်အရာပ် ၂ ထောန်န်ဝေန် အယုက် ၃၁ သၞာံကဵု “ဖြိုးမင်းသန့်” အယုက် ၁၅ သၞာံတံ ဂစိုက်လဝ်ရောၚ် ပ္ဍဲကဵုတၚ်လလောၚ်တြးဂှ် ပါကၠုၚ်ရ။
ဂတဵုမုက်ဗဳနိုၚ်ပေါဲရုဲမာဲ ဥူသဝ်မျေအ်ဥူဏံ ကုညးဂစိုက်လဝ် ထောန်န်ဝေန် ကဵု “ဖြိုးမင်းသန့်” (ဌာန်ဒၟံၚ်ဍုၚ်ဘာအၚ်) တံဂှ် နူကဵုဗ္ဒိုပ်ဗၠာဲသၟိၚ် ၝောံဍုၚ်ဘာအၚ် ပံက်အမှုကေတ်အရေဝ် နကဵုဥပဒေ ပွမစဵုဒၞာပရေၚ်ပလာတ်ပထုဲ ပေါဲရုဲမာဲ ၝောံပိုဒ် ၂၄(က) တုဲ ညံၚ်ဂွံကဵုဒုဟ်ဒဏ်ပေၚ်ၚ်မာန် ဆက်ရေၚ်တၠုၚ်ဖန်ဖက်အာရောၚ် ပ္ဍဲတၚ်လလောၚ်တြးဂှ် ချူလဝ်ရ။
ပ္ဍဲဍုၚ်ဘာအၚ် နူကဵု CCTV မွဲအဆံၚ် ဒပ်ဗၠာဲသၟိၚ်တံမၚ်ရံၚ်မံၚ်ဂှ် ညးၜါတၠဂစိုက်လဝ် ဂတဵုမုက်ဗဳနိုၚ်ပေါဲရုဲမာဲဏံ ပ္ဍဲကဵုနဝ်ဝမ်ပါ ၂ အခိၚ်ဇိုၚ်သဝ်တ္ၚဲဂှ် ထမံက်ပတိတ်မာန်ကၠုၚ်လဝ်ရဂှ် ညးကြပ်ကဵုဒပ်ဗၠာဲသၟိၚ်တံ သ္ဂးရ။
အတိုၚ် ဥပဒေပွမစဵုဒၞာ ပရေၚ်ပလာတ်ပထုဲပေါဲရုဲမာဲ ၝောံပိုဒ် ၂၄(က) မ္ဂး အောန်အိုတ်ဒဏ်ထံၚ်နူကဵု ၃ သၞာံ ဒဵုကဵု ၇ သၞာံဖျေံမာန်ဟွံသၟးက ဒဏ်သြန်လေဝ်ဖျေံမာန်ကီု ကဝ်မယှေန်ပၞာန် လလောၚ်လဝ်နွံရ။
ဥူသဝ်မျေအ်ဥူ သ္ကိုပ်ဝန်ဇၞော် တွဵုရးကရေၚ် ကဝ်မယှေန်ပၞာန် ခါန်ကၞက်ဂှ် ပ္ဍဲကဵုပေါဲရုဲမာဲဏံ နကဵုသၞောတ် ညးဂွံမာဲဂၠိုၚ်ဇၞး FPTP ပ္ဍဲကဵုစၠတ်ထဝ်တွဵုရးကရေၚ် နဒဒှ် ညးစၞးဗော်ပျဳခိုၚ်ဖျိုဝ် မွဲတၠ နူကဵုပွိုၚ်ဍုၚ်ဘာအၚ် သွက်ဂွံလုပ်ပြိုၚ်အာ မဒှ်ရ။
ပေါဲရုဲမာဲဗော်ဇဳဏံဂှ် ပ္ဍဲဒဳဇြမ်ပါ ၂၈ ကဝ်မယှေန်ပၞာန် စကၠောန် အာရောၚ် သ္ဂးရ။
ပြဟ်ဟ်ဏံ ပ္ဍဲအခိၚ်ကာလတံၚ်ဂြဲမာဲ တွဵုရးကရေၚ်မ္ဂး ဗော်ပျဳခိုၚ်ဖျိုဝ်မွဲဟေၚ် စှ်ေဗက်စန်ဒက် တံၚ်ဂြဲမာဲနွံမံၚ်တုဲ စပ်ကဵုပရေၚ်တံၚ်ဂြဲစန်ဒက်မာဲတုဲ ဗော်တၞဟ်ဟ်တံဂှ် ဟွံဂွံဆဵုဏီရောၚ် ညးဒေသတံဟီုတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – USDP