မတ်မလီု ၊ နိုဝမ်ပါ ၅
ကဝ်မယှေန်ပၞာန် သွက်ဂွံကၠောန်အာပေါဲရုဲမာဲအလီ ကာလဒစးဒုၚ် ကာလကၠောန်ဗ္ဒျ် ကာလလောန် သီုပိကာလဏံဂှ် ကံၚ်သဳဖိတ်ဒရေဝ် ဍုၚ်မန် ဒစဵုဒစးအာရောၚ် ပ္ဍဲနဝ်ဝမ်ပါ ၃ ကဵုလဝ်သမ္တီရ။
စပ်ကဵုပရေၚ်ကၠောန်အာ ပေါဲရုဲမာဲအလီဗော်ဇဳ ပ္ဍဲကဵုကၞောတ်သၞာံဏံ ဟွံလုပ်ဗဗွဲသၞောဝ်ဂှ် ကံၚ်သဳဖိတ်ဒရေဝ်ဍုၚ်မန် MSFC ပတိတ်လဝ် လိက်ကၞပ် တၚ်ဒတူလိုင် မူဝါဒမွဲရ။
ဟိုတ်နူ ဒစဵုဒစးလဝ် ဆန္ဒညးဍုၚ်ကွာန် သွဟ်ပေါဲရုဲမာဲ ၂၀၂၀ တုဲ ဂကောံပၞာန်ဗမာကဝ်မယှေန်ပၞာန် ဟိုတ်နူသီလဝ်အဝဵုဂှ် ဒှ်ဂကောံ ဟွံလုပ်ဗဗွဲသၞောဝ်တုဲ အခေါၚ်ကၠောန်ဗ္ဒျ် ပေါဲရုဲမာဲဟွံဂွံရောၚ် သ္ဂးရ။
ၜိုန်ရဍေံတံကၠောန်ပေါဲရုဲမာဲလေဝ် နကဵုပရေၚ်ဍုၚ်ကွာန် ဟွံလုပ်ဗဗွဲသၞောဝ်တုဲ ဒှ်မံၚ်ပေါဲရုဲမာဲအလီရဂှ် ကံၚ်သဳဖိတ်ဒရေဝ်ဍုၚ်မန် MSFC ခုတ်စၟတ်လဝ် မဒှ်ရ။
ပြဿနာပရေၚ်ဍုၚ်ကွာန်တံဂှ် ဟွံသောၚ်ကလးမွဲသာ် ကၠောန်အာပေါဲရုဲမာဲအတေၚ်မ္ဂး ပတဝ်ဏာလဝ်ကဵု ပဋိပက္ခဂမၠိုၚ်ရမဒှ်တုဲ ဖဵုသွက်ညးဍုၚ်ကွာန်တံဂှ်ဟွံဒှ်လးလး ဒစဵုဒစးမံၚ်ကဵု ဆန္ဒညးဍုၚ်ကွာန်ဂမၠိုၚ်တံရောၚ် ပ္ဍဲကဵုလိက်ကၞပ် ချူထမံက်လဝ်ရ။
ဟိုတ်ဂှ်ရ ပ္ဍဲကဵုဒစဵုဒစးအာ ပေါဲရုဲမာဲအလီဏံ ပတဝ်ဏာက္ဍိုပ်ကဵု ဂုဏ်ဖဵုပရေၚ်ပိုန်ဒြပ် ညးဍုၚ်ကွာန်ကေုာံ ပၠန်ဂတးတုဲ ကံၚ်သဳဖိတ်ဒရေဝ်ဍုၚ်မန် MSFC ဖျေံအာမဟာဗျူဟာကဵု လၟေၚ်ကမၠောန်တံရောၚ် သ္ဂးရ။
ဒုၚ်သ္ဇိုၚ်ကု လိက်ကၞပ်တင်ဒတူလိုၚ် မူဝါဒဏံတုဲ လ္တူပေါဲရုဲမာဲအလီဏံ သွက်ဂွံကလေၚ်ပလန်အာမာန် နကဵု လၟေၚ်ကမၠောန် ပရေၚ်ဍုၚ်ကွာန်ကေုာံ နဲကဲဆက်ဆောံ အမာတ်ကလုတ်တံဂှ် ကံၚ်သဳဖိတ်ဒရေဝ်ဍုၚ်မန် MSFC သွက်ဂွံဖန်ဇန်ရေၚ်တၠုၚ်အာရောၚ် ကဵုလဝ်သမ္တီရ။
အစဳဇန်ကဝ်မယှေန်ပၞာန် လလောၚ်တြးလဝ် ပေါဲရုဲမာဲဂှ် ဗွဲမကၠးမးဂွံဆဵုမံၚ် လကျှ်န်တက်ပေါဲအလီတုဲ စပ်ကဵု လၟေၚ်ကမၠောန် ဒဳမဝ်ကရေသဳမ္ဂး သီုညးဖအိုတ်ညံၚ်ဂွံပါလုပ် မနွံကဵုပရေၚ်သၠးပွး ဓရ်ယာတံ လီုလာ်မံၚ်ရောၚ်။
ဗော်ဒစဵုဒစးတံ ဗော်ဆေင်စပ်ကဵုကောန်ဍုၚ်အရၚ်တံကဵု ညးဆေၚ်စပ်အဓိကတံ ညံၚ်ဟွံဂွံပါလုပ်ဂှ် နဲကဲသၞောတ်စှ်ေစှ်ေ ပါဲပတိတ်လဝ်ဂှ်ကီု၊ ဍဵုဍိုက်လဝ်သ္ဇိုၚ်သၠးပွးတံကီု၊ လုပ်ဖန်ဗဂေတ်မံၚ် အပ္ဍဲဂကောံနာနာ၊ လၟေၚ်ကမၠောန်ဗီုပြၚ် လီဠာန်နာနာသာ်တံဝွံ ဒပ်ပၞာန်သွက်ဂွံဖန်ဗ္ဒျ် ဟၟဲကဵုဗဗွဲဓရ် တက်ပေါဲအလီတုဲ ဂစာန်မံၚ်ရောၚ် သ္ဂးရ။
လၟေၚ်ပရေၚ်ကမၠောန် ဟွံလုပ်သၞောဝ်မာန်ဏံ သွက်ဂွံတးပါဲအာမာန်ဂှ် ညးဍုၚ်ကွာန်ဍုၚ်ဗမာတံကီု ညးဆေင်စပ်ကဵုပရေၚ်ဍုၚ်ကွာန်တံကဵု အကြာမိတ်သဟာဲဂၠးကဝ်တံမ္ဂး ပရေၚ်ညဳသၟဟ်ဟၟဲဟွံဂွံ ပၟိက်ဇၞော်မံၚ် ကွေံကွေံရောၚ် ထံက်ထ္ၜးလဝ်ရ။
လၟေၚ်ကမၠောန် ပရေၚ်ဒစဵုဒစး ပေါဲရုဲမာဲအလီဂှ် နကဵုညးဍုၚ်ကွာန်တံ ဗီုပြၚ်နဲၜိုဟ်သြိုဟ် ညံၚ်ဂွံတဝ်စၞေဟ် ဆက်ကၠောန်အာကီု ပ္ဍဲကဵု ပရေၚ်ချဳဒရာၚ် ဒစဵုဒစးတၠအဝဵုပၞာန်ကဵု ပရေၚ်ကဵုလညာတ်ပညာတံ သွက်ဂွံပါလုပ်အာကီု MSFC ဗတိုက်ဖအောဝ်လဝ်ရ။
နကဵုအလဵုအသဳ ဍုၚ်ဂၠးကဝ်ဂမၠိုၚ်တံပၠန် သွက်ဂွံဒစဵုဒစးပေါဲရုဲမာဲအလီ ကီု ညံၚ်ဟွံဂွံကဵုဇြဟတ်ထံက်ဂလာန် ကေုာံ ရမျှာၚ်ညးဍုၚ်ကွာန်တံ သွက်ဂွံခိုၚ်ကၠိုက် ညံၚ်ဂွံကၠောန်ပရေၚ်အပြံၚ်သၠာဲ ဖိတ်ဒရေဝ်ဒဳမဝ်ကရေသဳဂှ် အာတ်မိက် ကဵုဇြဟတ်ထေက်ရောၚ် သ္ဂးရ။
တုဲပၠန် နကဵုပွဳဗွိုၚ်ဍုၚ်ဂၠးကဝ်တံဂှ် သွက်ကောန်ဍုၚ်ဗမာ နွံမံၚ်အပ္ဍဲဍုၚ်မပ္တံကဵု ဂကောံမှာဇန်တံကဵု သွက်ညးဍုၚ်ကွာန်သ္ဇိုၚ်တံ ပရေၚ်ပၠတရဴချဳဒရာၚ် NUG ၊ NUCC ၊ EROs ကေုာံ MECs ဂှ်ကီု ဗွဲမက္တိုၚ်ကၟိုဟ် ကဵုဇြဟတ်ထံက်ပၚ်ထေက်ရောၚ် ပ္ဍဲလိက်ကၞပ်ဂှ် ချူလဝ်ရ။
ကဝ်မယှေန်ပၞာန် ကၠောန်အာပေါဲရုဲမာဲဂှ် ဒဒှ်ရ လုပ်ဗဗွဲဓရ်ဟွံသေၚ် ညံၚ်ဂွံထမံက်ပတိတ်ကဵုကီု၊ ပရေၚ်ဒဳမဝ်ကရေသဳ ဗီုပြၚ်ဗဗွဲသၞောဝ် ညံၚ်ဂွံပြံၚ်သၠာဲအာမာန် ညံၚ်ဂွံကဵုအာဇြဟတ်ဟရိုဟ်ကီု ပရေၚ်တဝ်စၞေဟ် နဲကဲၜိုဟ်သြိုဟ်၊ ပွမဗကပ်ဗဗေၚ်ပရေၚ်ဍုၚ်ကွာန်၊ ချဳဒရာၚ်ပရေၚ်ကဵုပညာ လညာတ်သမ္တီတံကဵု ပရေၚ်ဗ္ၚုဟ်ပချဳ ပညဳပညပ် ဍုၚ်ဂၠးကဝ်တံဂှ် နူကဵု MSFC ဝွံ သီုကဵုမွဲကရောံ NUG ၊ NUCC ၊ EROs ကေုာံ MECs တံ အာတ်မိက်လဝ်ရ။
ပရိုၚ်-သြၚ်လောန်တိုၚ်မ်
Photo – Social Media