မတ်မလီု၊ နိုဝမ်ပါ ၆
ပ္ဍဲတွဵုရးမန် အခိၚ်လၟုဟ်သြောံကသီုမံက်ဏံ အနှေန်ၚုဟ်သြောံ စှ်ေအာဂၠိုၚ်ကဵုဆဒှ်မံၚ်ဂှ်ကီု ဗီုကၠာတေံ ပရေၚ်ရာန်သြောံလေဝ် ဟၟဲကီုတုဲ ကျဗြောံဟောံအိုတ်အစောန်ရဂှ် သၟာဗ္ၚတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အနှေန်သြောံ သၞာံအာတေံမ္ဂး အောန်အိုတ် သြောံ ၁၀၀ န နွံမံၚ် ပွဳပွူ ၂၀ ကိုတ်ဒကေဝ်ကီုလေဝ် အခိၚ်လၟုဟ် သြောံကသီုမံက် တိတ်မံၚ်ဏံ သြောံ ၁၀၀ နဂှ် နွံမံၚ်ပွဳပွူ ၁၁ ကိုတ်ဒကေဝ်ဓဝ်ရတုဲ ယဝ်တၟော်အာကဵု သၞာံအာတေံမ္ဂး ဂွံဆၜိုတ်ကဝက်ရ ဒှ်မံၚ်ရောၚ်။
ဟိုတ်နူ အနှေန်သြောံစှ်ေတုဲ အခိၚ်တဵုသွံဏံ ၚုဟ်လိၚ်ဇိက်ဗ္ၚ၊ စရိတ်ရာန် သြောံမ၊ စရိတ်ဝါဲဓါတ်၊ စရိတ် လိၚ်ရတ် သြောံဟွံက စရိတ်အိုတ်နာနာသာ် ၚုဟ်တိုန်မံၚ်တုဲ သွက်သၞာံဏံ မ္ဒးကျဗြောံအာ ယာဍိုဟ်ဟွံမာန်ရဂှ် သၟာဗ္ၚတံ သ္ဂးရ။
ပ္ဍဲသၞာံဏံ ကျဂၠိုၚ်အိုတ်ဒှ်မံၚ်တုဲ ပြဟ်ဟ်ဏံ ညးရာန်သြောံလေဝ် ဟၟဲတုဲ ဒးဖအုံစွံလဝ်အတိုၚ်ဏံရဂှ် သၟာဗ္ၚမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“သၞာံဏံ ပရေအ်အိုတ်ရ ဒးဟီု။ ပ္ဍဲပိုဲ မၞိဟ်ရာန်လေဝ်ဟၟဲပုဟ်။ ရတ်လဝ်တုဲ သွက်ဂွံသွံ ပေါဲစာတံ ကၠေံမံၚ်ဖိုအ်။ ညးကၠုၚ်ရာန်ဟၟဲတုဲ ဒးဖအုံစွံလဝ် သြောံအတိုၚ်ဏံ။ ပ္ဍဲသၞာံဏံ ဘဝသၟာဗ္ၚပိုဲ ဒှ်ကၠဵုဏောၚ်” သ္ဂးရ။
အခိၚ်အနှေန်ၚုဟ်သြောံစှ်ေမံၚ်ဏံ ညးရာန်လေဝ်ဟၟဲတုဲ သၟာဗ္ၚလ္ၚဵု သွက်ဂွံရတ်သြောံဂှ် ကဵုၚုဟ်ဟရိတ်စက်လေဝ်ဟွံမာန်တုဲ ဒးဂၠေံသြန်အိက် နူညးတၞဟ်နွံမံၚ်ဏံဂှ် သီုကဵု ကျကမၠောန်ဝါဗ္ၚသၟးဟွံက ထပ်ဒှ်ခတှ်မွဲဝါပၠန်ရဂှ် ညးဆက်ဟီုရ။
မွဲလပါ်ပၠန် လၟိဟ်သြောံတိတ်ပ္ဍဲကဵုသၞာံဏံလေဝ် ယအ်မံၚ်ကီုတုဲ ဒဒှ်ရ တၟော်တော်ဆအာကဵု အနှေန်ၚုဟ်သြောံလၟုဟ်ဏံမ္ဂး ပရဲပရၚ်ဟၟဲလးလး ဒးကျဗြောံဆောံလေၚ်အာ ဇၞော်ကဵုဇြဟတ်ဒှ်မံၚ် သၟာဗ္ၚမွဲတၠပၠန် ဟီုရ။
“ပရဲပရၚ်ညိလေဝ်ဟၟဲပုဟ်။ ကျသၟးရ။ မုဒှ်ရောတှ်ေ စရိတ်သွက်မွဲဧက သြောံကသီုသၞာံဏံ ဒးဂြာတ်မ ၜါပိဝါ။ လၟိဟ်သြောံတိတ်အောန်တှ်ေ ကျရဏောၚ်။ သၞာံဏံ မွဲဧက သြောံတိတ်ၜိုတ် ၄၀ နရနွံမာန်။ ၄၀ နတှ်ေ ကျရနွံ” သာ်ဝွံ သ္ဂးရ။
ပ္ဍဲအခိၚ်ပၞာန်သီလဝ်အဝဵုဏံ အနှေန်ၚုဟ်သြောံစှ်ေအာဂှ် ဒှ်အကာဲအရာပရေအ်အိုတ်မွဲ မဒှ်တုဲ သွက်ညးမတဵုသြောံ ဘဝသၟာဗ္ၚတံ စှ်ေအာကိုန်သံသာခတှ် ဍာ်စိုပ်ကအ် မဒှ်ကီုရ။
စရိတ်နာနာ သွက်ဂွံပတိတ်သြောံသၟာဗ္ၚတံ ၚုဟ်တိုန်မံၚ် ဟွံဆဟွံတန်ဂၠိုၚ်လောန်တုဲ လ္တူအနှေန်ၚုဟ်သြောံ စှ်ေအာစိုပ်တိကီုလေဝ် နူကဵုကဝ်မယှေန်ပၞာန်တံ ကလေၚ်ခုတ်စၟတ်ပလေဝ်ကဵု အနှေန်ၚုဟ်သြောံ ဟၟဲရ။
ပ္ဍဲကဵုတွဵုရးမန် ဧကတဵုသြောံကသီု နွံမံၚ်ကရပ် ၇ ကိုတ်၊ လၟိဟ်သြောံ ကိုတ် ၄၃၀ နပြၚ် ဇၟာပ်ပ်သၞာံတိတ်မံၚ်နွံတုဲ သ္ၚုဗုတ်ပတိတ်တံဂှ် သွံတြးပလံၚ်ဗစိုပ်မံၚ်ကဵု အပ္ဍဲဒေသကီု ဒေသတွဵုရးကဵု ရးတၞဟ်ဟ်တံကီုရ။
ပရိုၚ်-သြၚ်လောန်တိုၚ်မ်
Photo – Social Media