မတ်မလီု ၊ နိုဝမ်ပါ ၁၂
သွက်အရာပရေၚ်ဍုၚ်ဗမာ ပ္ဍဲကဵုကၞောတ်သၞာံဏံအိုတ်ကဵု သၞာံဂတတေံမံက် ကၠောန်အာပေါဲရုဲမာဲမ္ဂး ညးနွံအခေါၚ်ကဵုမာဲနူကောန်ဍုၚ်တံ သွက်ဂွံသ္ပကဵုစၟတ်သမ္တီဂှ် ကဝ်မယှေန်ပၞာန်စၟဳမၚ်မံၚ်ရောၚ်။
ပေါဲရုဲမာဲကၠောန်အာဏံဂှ် ပါဲနူကဵုဍုၚ်မိတ်သဟာဲဍေံတံညိညတုဲ နူကဵုဟွံဂွံလဝ် ပရေၚ်ထံက်ဂလာန် ကုလသမဂ္ဂကဵု ဂကောံယူရောပ် တံဂှ် တင်ကဵုဏာသမ္တီကု ညးဍုၚ်ကွာန်တံဂးတုဲ ညးအခေါၚ်ဟီုဂးနွံ ကဝ်မယှေန်ပၞာန် သ္ကိုပ်ပၞာန်ဇြဝ်မေန်ထောန် ပ္ဍဲကဵုနဝ်ဝမ်ပါ ၁၀ ဂှ် ဟီုပတိတ်ကၠုၚ် နူကဵုဌာန်ပရိုၚ်တြးဝါဒ မဳဒဳယာရုပ်ရမျှာၚ် ကၟိန်ဍုၚ် တံရ။
ပေါဲရုဲမာဲ ညံၚ်ဂွံလီုလာ်ကီု ပြံၚ်သၠာဲကီု နကဵုသြဇာဍုၚ်မ္ၚးတံ ပြံက်လုပ်ကၠောန်ဖန်ဖက်အာ ပရေၚ်ဍုၚ်ပိုဲဟွံဂွံ၊ ပရေၚ်ဍုၚ်ပိုဲဂှ် ကောန်ဍုၚ်ပိုဲဟေၚ် သ္ပစၟတ်သမ္တီမ္ဂး ရုံဂပ်မံၚ်ရောၚ် သ္ဂးရ။
သွက်အနာဂတ်ကောန်ဍုၚ်ပိုဲမ္ဂး ကောန်ဍုၚ်ပိုဲတံဟေၚ် အခေါၚ်ဖန်ဖက်နွံတုဲ ကောန်ဍုၚ်ပိုဲညးကဵုမာဲ ပေါဲရုဲမာဲတံ ကဵုအာသ္ဂုတ်သွာတ်စၟတ်အာသမ္တီ ပရေၚ်ဍုၚ်ပိုဲကီုလေဝ် ဂလာန်ပတေဟ်ညးဍုၚ်ကွာန်တံ ဟၟဲပုဟ်ဂှ်လေဝ် ဟီုဂးမံၚ်အိုတ်ရ။
ပေါဲရုဲမာဲဏံ မၞုံကဵုပရေၚ်ဓရ်ယာသၠးပွးရောၚ် ဟွံညာတ်ဂှ်တုဲ အလံၚ်အမာတ်တံပၠန် ဂံၚ်ၚ်သ္ကာသ္ကာ မုလေဝ်ဟွံဟီုဂးပုဟ်ဂှ် ညးဒေသမန် မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပရေၚ်ထံက်ဂလာန် ဓရ်ဖေက်တံဂှ်ဟေၚ် ကောန်ဍုၚ်ပိုဲ ကလိဂွံမာန်ရောၚ်။ ပေါဲရုဲမာဲ နွံကဵုပရေၚ်ဓရ်ယာဗၠးၜးဏောၚ် မၞိဟ်ဂမၠိုၚ်ဟွံညာတ်တုဲ ပရေၚ်ထံက်ဂလာန်ဟၟဲကွေံကွေံပုဟ်။ ဗီုပြၚ်ဟွံတပ်တး ညံၚ်ကဵုဒှ်မံၚ်။ တုဲပၠန် အလံၚ်အမာတ်တံလေဝ် မုလေဝ်ဟွံဂံၚ်ဟီုပုဟ်။ ညးတံလေဝ် ဂွိၚ်ဖေက်ဒးဒုၚ်ကေတ်အရေဝ် နကဵုဥပဒေပရေၚ်စဵုဒၞာပေါဲရုဲမာဲကီုတုဲ ပရေၚ်လ္ၚဵု ဒးချိၚ်ဟီုမံၚ် အကာဲအရာဏံ ဒှ်မံၚ်မ္ဂး ညးဍုၚ်ကွာန်တံ ထံက်ဂလာန်ပေါဲရုဲမာဲကၟိုၚ်ၚ်ကၟိုဟ်ဟ်ဂှ် ဒှ်ဟွံမာန်” သာ်ဝွံ သ္ဂးရ။
ထ္ၜးဟိုတ်ပေါဲရုဲမာဲ ၂၀၂၀ ဂှ် ဒပ်ပၞာန်သီကေတ်အဝဵု လလောၚ်တြးလဝ် အကာဲအရာဍုၚ်ကာမံက်တိုန် ပွိုၚ်မွဲသၞာံတုဲ လက်ကြဴ ၆ ဂိတုမွဲဝါ ဆက်ကၠုၚ်အယုက် ၇ ဝါကီုရ။
အကာဲအရာဍုၚ်ကာမံက်တိုန် လလောၚ်တြးလဝ်ဂှ် ပ္ဍဲကဵုဂိတု ဂျူလိုၚ် ၃၁ နူကဵုကောံဓရီု ကံၚ်သဳစဵုဒၞာကောန်ဂကူ ကေုာံ ပရေၚ်ဂီုကၠီု ကလေၚ်သီရုပ်ထောံကီု သီုကဵုဂကောံ ကံၚ်သဳပၞာန်ဂှ်လေဝ် ပလီုလဝ်ကီုရ။
ဆဂး အလဵုဇကု က္ဍိုပ်သ္ကိုပ်ပၞာန် မေန်အံၚ်လှိုၚ်ဂှ် ကေတ်တာလျိုၚ်သမ္မတယာယဳတုဲ အဝဵုအိုဿီုတံဂှ် ဆက်သၠောဲပအပ်ကဵုဏာ ကံၚ်သဳစဵုဒၞာကောန်ဂကူကေုာံ ပရေၚ်ဂီုကၠီုတုဲ သွက်ဂွံကၠောန်အာပေါဲရုဲမာဲ ပြံၚ်သၠာဲဒက်ပတန်အာ နဒဒှ်ကဝ်မယှေန်ပၞာန် မဒှ်ရ။
နဒဒှ်ဗီုပြၚ် အလဵုအသဳအကြာ ကဝ်မယှေန်ပၞာန်ကေတ်လဝ်ဒၞာဲ ဒက်ပ္တန်လဝ်တုဲ အတိုၚ်သ္ဇိုၚ်သၞောဝ်ဥပဒေ ပ္ဍဲအခိၚ်လၟုဟ် ကၠောန်ကဵုပေါဲရုဲမာဲရောၚ် ကညာၚ်ကရေဲ ကြဴမံၚ် ရမျှာၚ်ခိုဟ်တံရ။
တုဲပၠန် ပေါဲရုဲမာဲဝွံ ကလၚ်အာရမျှာၚ်ညးဍုၚ်ကွာန်၊ ဒှ်မံၚ်သၞောတ်ယန္တရာ ထပေၚ်ကဵုဂုဏ်ဖဵု ဆန္ဒညးဍုၚ်ကွာန်တံမာန်တုဲ ဇၟာပ်ညးဍုၚ်ကွာန် ညးနွံအခေါၚ်ကဵုမာဲတံ ညံၚ်ဂွံစုတ်ကဵုမာဲအိုတ်ညိဂှ် ညးအခေါၚ်ဟီုဂးနွံကဝ်မယှေန်ပၞာန် ဗတိုက်ဖအောဝ်လဝ်ပၠန်ရ။
ညးဍုၚ်ကွာန် ဒေသမန်မွဲတၠဂှ်တှ်ေ ပေါဲရုဲမာဲဏံ နနဲလဵု ဗီုပြၚ်လဵု ကၠောန်လဝ် ချိုတ်ပၠိုတ်ဗီုလဵု ဟီုမံၚ်ကီုလေဝ် ဂလာန်ပတေဟ်ဟၟဲတုဲ စိုတ်လေဝ်ဟွံလုပ်စပုဟ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပေါဲရုဲမာဲဏံ ၜိုတ်လဵုဍာံပြမံၚ် ချိုတ်ပၠိုတ်မံၚ် နဲလဵုလေဝ် ဍေံတံဟီုဟီုမံၚ် သွဟ်ဍေံဂှ် ညးဍုၚ်ကွာန်တံ ဟွံပတေဟ်ပုဟ်။ တုဲပၠန် ပရေၚ်စိုတ်လုပ်စပေါဲရုဲမာဲအောန်ကွေံကွေံ။ ဍာံဍာံဂှ် အလဵုအသဳအုပ်ဓုပ်ဍုၚ်ပိုဲ ညးဍုၚ်ကွာန်ပိုဲတံ ဒးရုဲစှ်ကဵုဟီုဂှ် သဘဴဓရ်ဍာ်ဒကေဝ် သၞောတ်ဒဳမဝ်ကရေသဳရဏောၚ်။ ဆဂး အပ္ဍဲဍုၚ်ပိုဲ ဟွံဒှ်ဗီုဏံဏီ” သာ်ဝွံ သ္ဂးရ။
ပ္ဍဲကဵုဍုၚ်ဗမာ ဟိုတ်နူပရေၚ်ကလေၚ်ထပ်သီအဝဵု မွဲဝါပၠန် က္တဵုဒှ်ကၠုၚ်တုဲ သွက်ဂွံထပိုတ်ဗတိုက်သရိုဟ်ကၠေံ ရိုဟ်ကၞက်သၞောတ်တၠအဝဵုပၞာန်ဂှ် ဂကောံရပ်လွဟ်ကောန်ဍုၚ်အရၚ်တံကဵု ဂကောံဇြဟတ်ပၠန်ဂတးတံ ဒှ်မံၚ်ပေါဲဗတိုက်ကဵုဒပ်ပၞာန် ကြပ်ပေၚ် ၅ သၞာံမဒှ်ရ။
ပ္ဍဲအကာဲအရာဏံ ဒပ်ပၞာန်ဒးဗလးလဝ်တဲ တိဍာ်ဒေသဗွဲမဂၠိုၚ်နွံကီုလေဝ် နူကဵုဥပဒေယိုက်ဝန်ပၞာန် ကလေၚ်ထပၠုပ်လမျီု ဂွံတိုန်လၟိဟ်ဇြဟတ် နကဵုလက်ပြၚ်ဒှ်ကၠုၚ်တုဲ ကလေၚ်ထိၚ်ချုက်ဂွံအာ ဒၞာဲတိဍာ်ဒေသလ္ၚဵုတံ မာန်ကၠုၚ်ရ။
မွဲလပါ်ပၠန် ပ္ဍဲသ္ကုတ်ဍုၚ်ဗမာသၟဝ်ကျာမ္ဂး ဟိုတ်နူကဵု ဇြဟတ်ဟရိုဟ် အလဵုအသဳကြုက်ကဵု ပရေၚ်ဒးဘဲဒဏ် ဗတိုက်ပၞာန်ကျာတံဂှ် ဒပ်ကဝ်က MNDAA ကဵု ဒပ်တအာၚ် TNLA တံ ဒးကေတ်လဝ် တၚ်တုပ်စိုတ်ကဵု ဒပ်ပၞာန်ဗမာရ။
ဆဂး ဂကောံရပ်လွဟ်ကောန်ဍုၚ်အရၚ် သှ်ေမံၚ်တၞဟ်ဟ်ကဵု ဒပ်ပၞာန်စဵုဒၞာညးဍုၚ်ကွာန် PDF မံက်တိုန်ကၠုၚ် နူကဵုပၠန်ဂတးတမ်ကညၚ်တံဂှ် ဆက်လုပ်အာမံၚ်ပေါဲဗတိုက်ရ။
ဟိုတ်ဂှ်တုဲ ပေါဲရုဲမာဲဏံကဝ်မယှေန်ပၞာန် ပါ်လဝ်ပိသ္ကုတ်တုဲ သ္ကုတ် ၁ ဂှ် ပ္ဍဲဒဳဇြမ်ပါ ၂၈ ဏံ သွက်ဂွံကၠောန်အာ ၁၀၂ ပွိုၚ်ဍုၚ် ကေုာံ သ္ကုတ် ၂ ဂှ် ပ္ဍဲသၞာံဂတ ဂျာန်နဝါရီ ၁၁ မ္ဂး သွက်ဂွံကၠောန်အာ ၁၀၀ ပွိုၚ်ဍုၚ်ပၠန် စဳဇန်လဝ်ရောၚ်။
ပေါဲရုဲမာဲသ္ကုတ် ၃ မ္ဂး ကၠောန်ဗ္ဒျ်အာ သ္ကုတ် ၂ တုဲ လအ်ပွိုၚ် ၜါသတ္တဟဂှ်ဆက်ကၠောန်အာရောၚ် ဂွံတီကေတ် နူကဝ်မယှေန်ပၞာန်ရ။
ပ္ဍဲကဵုဍုၚ်ဗမာ ဒၟာနူကဵုပရေၚ်ကြဳဗုမ် ပရေၚ်ဖံက်ပကဝ်အခေါၚ်မၞိဟ် သၠဲသၠဲလးလး အခိၚ်က္တဵုဒှ်မံၚ်ဏံ ဗီုလဵုမှ ကၠောန်အာပေါဲရုဲမာဲမၞုံကဵု ပရေၚ်ဓရ်ယာမာန်ဟွံသေၚ်ရောၚ် သၟိၚ်ဇၞော်မဟာကုလသမဂ္ဂ ဆေၚ်စပ်ကဵု ပရေၚ်အခေါၚ်မၞိဟ် ဗဝ်လ်ကာတက်ခ် ဟီုလဝ်ရ။
လ္တူပေါဲရုဲမာဲဍုၚ်ပိုဲ အသိၚ်အလိုန်ဍုၚ်ဂၠးကဝ်တံ တက်ကၠုၚ်ဗွဲတၞဟ်ခြာ နွံမံၚ်ကီုလေဝ် ဒဒှ်ရ ဂွံလဝ်ပရေၚ်ထံက်ဂလာန် ဍုၚ်မိတ်သဟာဲတံခိုင်င်ကၠိုက်က်နွံမံၚ်ရောၚ် ညးအခေါၚ်ဟီုဂးနွံ ကဝ်မယှေန်ပၞာန် သ္ကိုပ်ဗိုလ်ဇြဝ်မေန်ထောန် သ္ဂးရ။
လၟေၚ်ကမၠောန်ပေါဲရုဲမာဲတံဂှ် ဖန်ဇန်ကၠောန်လဝ် ပုၚ်သၟူအးအးရတုဲ သွက်ဂွံကၠုၚ်ကျောဝ်ဗဵုရံၚ်အာ လၟေၚ်ပရေၚ်ကမၠောန် ကၠးကၠးမးမးမာန်ဂှ် ကော်ဘိက်လဝ် ဍုၚ်မဟာမိတ်တံကဵုဂကောံဂၠးကဝ် ဍုၚ်နာနာတံ မဒှ်ရ။
ပြဟ်ဟ်ဏံလေဝ် စပ်ကဵုပေါဲရုဲမာဲကဝ်မယှေန်ပၞာန် ကော်ပကောံ ရဲအနုပညာသုခုမ ပရေၚ်ဂီတံတံတုဲ ကၠောန်ဗ္ဒျ်အစဳဇန် စန်ဒက်တြးဝါဒ ရမျှၚ်ကမြေဲ “သွက်ဒဳမဝ်ကရေသဳဂွံခိုၚ်ဗိုန် အာရုၚ်မာဲစိုအ်၊ နူကဵုပေါဲရုဲမာဲ ဇရေၚ်အနာဂတ်ပဵုခိုဟ်ကၟိုဟ်တေံ” ရ။
ညးဍုၚ်ကွာန်မွဲတၠဂှ်တှ်ေ ပေါဲရုဲမာဲ ဂကောံသီအဝဵုကၠောန်အာဏံ ဂလာန်ပတေဟ်ဟၟဲတုဲ မၞိဟ်ဟီုမံၚ်ကၠောန်ကဵု သွက်ညးဍုၚ်ကွာန်တံဂှ်လေဝ် ဟွံပတေဟ်၊ ကၠောန်မံၚ် ပရေၚ်ဇာတ်အလီရဏောၚ် ဟီုရ။
“သီလဝ်အဝဵုတုဲ ကံၚ်သဳပၞာန်(စကမ) ပကီုပရာတ်တံ ကၠောန်ကဵုပေါဲရုဲမာဲဏောၚ်ဟီုဂှ် ကမၠောန်ဗီုလဵုမှဒှ်ဟွံမာန်ဂှ် ကၠောန်မံၚ်။ ဟိုတ်ဂှ်ရ မုက်ဂၞန်မွဲဂှ် ဟွံပတေဟ်စပုဟ်။ မုက်ဂၞန်ၜါ အခေါၚ်အရာသွက်ဇကု မၞိဟ်ဟီုကၠောန်ကဵုဂှ်လေဝ် ဟွံပတေဟ်ပုဟ်။ ပေါဲရုဲမာဲလေဝ် ပတေဟ်စဟွံဂွံပုဟ်။ လ္တူအလဵုအသဳကၠောန်ကဵု ပေါဲရုဲမာဲဂှ်လေဝ် ဂလာန်ပတေဟ်ဟၟဲပုဟ်။ အဓိက ဟိုတ်နူဂလာန်ပတေဟ် ပေါဲရုဲမာဲဒှ်ကၠုၚ်ဏောၚ် အဲခယျ။ ဟိုတ်ဂှ်ရ ပေါဲရုဲမာဲဂလာန်ပတေဟ်ဟၟဲဏံ Lies Story မွဲရဏောၚ် အဲထေၚ်” သာ်ဝွံ သ္ဂးရ။
အတိုၚ် ဂကောံသုတေသနဗၠးၜး ပလက်ဖံၚ်ညးဍုၚ်ကွာန်ချဳဒရာၚ် ကံက်ဂွံလဝ်တၚ်နၚ်မ္ဂး လ္တူပေါဲရုဲမာဲကဝ်မယှေန်ပၞာန် သ္ကိုပ်သ္ကကၠောန်အာဏံ ညးဂလာန်ပတေဟ်ဟၟဲဂှ် ၉၈% နွံမံၚ်ရောၚ် ချူထမံက်လဝ်ရ။
ဂကောံဇြဟတ်ပၠန်ဂတး ဒစဵုဒစးမံၚ်သၞောတ်တၠအဝဵုပၞာန် နဲကဲစုၚ်ၚ်တံဂှ်တှ်ေ ပေါဲရုဲမာဲကၠောန်ဗ္ဒျ်အာ သၟဝ်သ္ဇိုၚ်သၞောဝ်ဥပဒေ ၂၀၀၈ ဝွံ သွက်အယုက်ပၞာန် သၞောတ်တၠအဝဵုပၞာန်ဂွံဂၠိုၚ် ကၠောန်အာပေါဲရုဲမာဲအလီရောၚ် ခုတ်စၟတ်လဝ်ရ။
ဂကောံကောဒေံ မန်-ခမာ သၟတ်ဂကူ ဝ၊ တအာၚ်ကဵု မန်တံလေဝ် ပေါဲရုဲမာဲကဝ်မယှေန်ပၞာန်ကၠောန်ဏံဂှ် ဒစဵုဒစးမံၚ်ကဵု ပၟိက်ဆန္ဒညးဍုၚ်ကွာန်တံ အာတ်မိက်လဝ် ပရေၚ်ဒက်ပ္တန်ကၟိန်ဍုၚ်ဖိတ်ဒရေဝ်ရောၚ် ပတိတ်လိက်ပလောၚ်တြးတုဲ ဒစဵုဒစးလဝ်ရ။
ပရိုၚ်-သြၚ်လောန်တိုၚ်မ်
Photo – CJ