ကအ်ကြိက်၊ နိုဝမ်ပါ ၁၄
တွဵုရးကရေၚ် ပ္ဍဲကအ်ကြိက် သ္ကုတ်သၟဝ်ကျာ ကွာန်မိဖာလေဝ် ကေုာံ သၠုၚ်ကျာဗြဝတဳ လေဝ်ကေကဝ် ပွဳပွူဒေသတံဝွံ အကြာဒပ် ကဝ်မယှေန်ပၞာန်ကဵု ဂကောံဇြဟတ်ပၠန်ဂတး KNU တံ ပေါဲဗတိုက် ဆက်ဒှ်မၚ်တုဲ နူဒပ်ကဝ်မယှေန်ပၞာန် ဒပ်ပၞာန်ကျာကဵုလွဟ်ဇၞော် ဗွဲမဂၠိုၚ် ဘိုၚ်ပန်ရီုမံၚ်နွံရဂှ် တမ်ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နူကဵုဂိတုနဝ်ဝမ်ပါ သတ္တဟဒုတိယဂှ် ပ္ဍဲပွိုၚ်ဍုၚ်ကအ်ကြိက် သ္ကုတ်သၟဝ်ကျာ ပွဳပွူကွာန်မိဖာလေဝ်တံ ကရောၚ်ပၞာန် ဒပ်ကဝ်မယှေန်ပၞာန်ထပက်လုပ်မံၚ်ဂှ် ဒှ်လဝ်ပေါဲဗတိုက်ကဵု ဂကောံဇြဟတ်ပၠန်ဂတး KNLA တံတုဲ နူကဵုဒပ်ကဝ်မယှေန်ပၞာန် ဗတိုက်မံၚ်ကဵုၜၚ်ကျာ၊ လွဟ်ဇၞော်ကဵု ဒရုၚ်တံ မဒှ်ရ။
ပ္ဍဲကဵုဂကောံကွာန် မိဖာလေဝ်ဂှ် ဒပ်ကဝ်မယှေန်ပၞာန် ဍိုက်ဗတိုက်မံၚ်နကဵုၜၚ်ကျာ၊ လွဟ်ဇၞော်ကဵု ဒရုၚ်တံ ဗွဲမသကာတ်မြဟ်ဇၞော်ကဵုဇြဟတ် ပေါဲဗတိုက်ဆက်ဒှ်မံၚ်ဂှ်ရ ရဲဒဴပၞာန်တံဟွံဂံၚ်ကလေၚ်စဴကၠုၚ် သ္ၚိဌာန်ညးတံဏီ သ္ဂးရ။
တုဲပၠန် လပါ်သၠုၚ်ကျာဗြဝတဳ ပ္ဍဲကဵုကရပ်လေဝ်ကေကဝ် နူကဵုဒဵုဣသ္ၚိဂှ် ကရောၚ်ပၞာန်ဒပ်ကဝ်မယှေန်ပၞာန် ထပက်ပတဝ်အာမံၚ် လပါ်ကွာန်ဖလူဝွံ ပ္ဍဲကဵုနိုဝင်ဘာ ၁၂ အခိၚ်ဗတမ်ကဵု နိုဝမ်ပါ ၁၃ အခိၚ်နူဂယးဂှ် ဒှ်မံၚ်ပေါဲဗတိုက်ကု ဂကောံဇြဟတ်ပၠန်ဂတးတုဲ နူလပါ်ကဝ်မယှေန်ပၞာန် ဘိုၚ်ပန်ရီုဗၚ်မံၚ်ကဵု လွဟ်ဇၞော်ရဂှ် ညးဒေသမွဲတၠ ဟီုရ။
ပ္ဍဲကဵုဂိတုနိုဝမ်ပါ ၁၃ အခိၚ်နူဂယးဂှ် ဟိုတ်နူကဵုဒပ်ကဝ်မယှေန်ပၞာန် ပန်မံၚ်ကဵုလွဟ်ဇၞော်တုဲ မကမ်ဖတုံစှ်ေအာ ပ္ဍဲဒၞာဲဒပ်ပၞာန်ကရေၚ် ပတုဲဖဵုဒဳမဝ်ကရေသဳ DKBA ထိၚ်ချုက်လဝ် ကွာန်ဖလူဂှ်တှ်ေ မၞိဟ်ဒးဝပ်ချိုတ်အာနွံရဂှ် ညးဒေသ ဖလူမွဲတၠ သ္ဂးရ။
လပါ်သၠုၚ်ကျာဗြဝတဳ ပ္ဍဲကဵုကရပ်ပွဳပွူ လေဝ်ကေကဝ် ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဂှ် ဟိုတ်နူ ဂကောံဇြဟတ်ပၠန်ဂတးတံ ကလေၚ်ဒုင်တဝ်စၞေဟ်တုဲဒးဂိအာလဝ်နွံမံၚ်ဂှ်ကီု ကောန်ပၞာန်လ္ၚဵုတံဂှ်လေဝ် နူကဵုၝောံဒပ် ၂၂ ကၠုၚ်ဖျေံလွဟ်ကဵု ဒပ်ပံၚ်တောဲပၠန်ဂတးတံနွံရ။
ကၠာဟွံစိုပ်ပေါဲရုဲမာဲမ္ဂး လပါ်သၠုၚ်ကျာဗြဝတဳ မွဲဒမြိပ်ဂၠံၚ်ကွဳစက် ဗြဝတဳ-ဝဝ်လေဝ် ကေုာံ ကအ်ကြိက် သ္ကုတ်သၟဝ်ကျာ ဂၠံၚ်တြေံလ္တူဒဵုဒဝ်နကဵု ကွာန်မွဲဒမြိပ်တံ ညံၚ်ဂွံကလေၚ်ထိၚ်ချုက်ကေတ်မာန် နူကဵုဒပ်ကဝ်မယှေန်ပၞာန် စကာလဝ်ဇြဟတ်ဒပ်ဂၠိုၚ်ၚ်တုဲ စနူကဵုဂိတုအံက်တဝ်ပါ၊ နိုဝင်ပါ ကရောၚ်ပၞာန် ထပက်မံၚ်ဟဂှ်ရ။
ပ္ဍဲကဵုကရောၚ်ပၞာန် ဒပ်ကဝ်မယှေန်ပၞာန် ထပက်မံၚ်ဏံ လတူကွာန်ကအ်ကြိက်သ္ကုတ်သၟဝ်ကျာကဵု သၠုၚ်ကျာဗြဝတဳတံဂှ် ၜၚ်ကျာကြဳဗုမ်ကီုပန်ကဵုလွဟ်ဇၞော်ကီု သ္ကာတ်မြဟ်လောန်တုဲ ဘာလကျာ်၊ ဘာဗတောန်လိက်ကဵု သ္ၚိဌာန်ညးဍုၚ်ကွာန်တံလီုလာ်အာလဝ်နွံ ညးဍုၚ်ကွာန်ဗွဲမဂၠိုၚ် ဒးဂြိပ်ပါဲဒဴအာလဝ်ရ။
ပရိုၚ်-သြၚ်လောန်တိုၚ်မ်
Photo – Social Media