သဓီု၊ နိုဝမ်ပါ ၁၄
တွဵုရးမန် ဍုၚ်သဓီု ပ္ဍဲအရာပ်နာန်ခေဝ် ဂတမုက်ဘဏ်ကမ္ဗဝ်ဇ ၂ ဂှ် သၟတ်ဒးဒုၚ်ပလံၚ် သွက်ဂွံယိုက်ဝန်ပၞာန် ၄ တၠ ဂြိပ်ဗၠးတိတ်အာရဂှ် ဂွံတီကေတ်နူကဵုညးဍုၚ်ကွာန်တံကဵု ရဲကြပ်ကဵုကဝ်မယှေန်ပၞာန်တံရ။
သွက်ဂွံပလံၚ်ဏာ သၟတ်ယိုက်ဝန်ပၞာန်တံ ဇရေၚ်ဘာပၞာန်ဒပ်ဗကတ်ဗကေၚ်ပၞာန်သ္ဇိုၚ် စၟတ် (၉) ပ္ဍဲနဝ်ဝမ်ပါ ၁၂ အခိၚ်တ္ၚဲစေၚ် ၃ နာဍဳ ဒၞာဲဂၠံၚ်ကြေပ် မၞိဟ်ၜေတ်ယှုက်ထုဲ စိုပ်ကၠုၚ်ဂတမုက် ဘဏ်ကမ္ဗဝ်ဇ ၂ ဂှ်တှ်ေ မွဲအလန်ဓဝ် သၟတ်တံဂြိပ်ဆင်စှ်ေအာ နူကဵုကွဳစက်မဒှ်ရ။
အတိုၚ်ညးဆဵုညာတ်နမတ်တံ ဟီုမ္ဂး သၟတ် ၄ တၠတံဝွံ အခိၚ်ကြပ်ဗလးဘာ ကွဳစက်မာတ်ဆိုအ်မံၚ်အကြာဂၠံၚ် ဟိုတ်နူ ဂြိပ်ဆင်စှ်ေအာ နူကဵုကွဳစက်ဂှ်တှ်ေ ဒှ်အာပရေၚ်ရုသံၚ်မွဲကီုရ။
အခိၚ်သၟတ် ၄ တၠ ဂြိပ်ဆင်စှ်ေအာ နူကဵုကွဳစက်ဂှ်တှ်ေ ရဲဂီုကၠီုကဝ်မယှေန်ပၞာန် ဗက်ထဍေၚ်ဂၠာဲရပ်ကီုလေဝ် ဒှ်မံၚ်အခိၚ်မၞိဟ်ကြေပ်တုဲ ဂြိပ်ဗၠးတိတ်အာ ဂွံတီကေတ်ရ။
အခိၚ်ရဲဂီုကၠီုကဝ်မယှေန်ပၞာန် ဂစာန်ဗက်ထဍေၚ်မံၚ်ပၠန်ဂှ် ကွဳစက်ပၞာန်ဒေါအ်မံၚ် ပ္ဍဲလဒေါဝ်ဂၠံၚ်ဒှ်မံၚ်ဂှ်ရ ကွဳစက်အာတရဴ၊ ကွဳစက်ဒုၚ်ပလံၚ်ကွးဘာဂမၠိုၚ် မာအ်ဆိုအ်အာၜိုတ်ကဝက်နာဍဳပြၚ် ယှုက်ထုဲအာ မဒှ်ရ။
အတိုၚ်ညးကြပ်ကဵု ကဝ်မယှေန်ပၞာန်တံဟီုမ္ဂး သၟတ်ဂွံယိုက်ဝန်ပၞာန် ဒးဒုၚ်ပကောံလဝ် နဒဒှ်ကောန်ပၞာန်တၟိ နူကဵု ဒပ်ပကောံကောန်ပၞာန်မတ်မလီု အခိၚ်ပလံၚ်ဗစိုပ်နၚ် ဒပ်ဗကတ်ဗကေၚ် စၟတ်(၉) ဂှ် ဂြိပ်ဗၠးတိတ်အာ ဂွံတီရ။
ပ္ဍဲကဵုတွဵုရးမန် သၟတ်တံဒးဒုၚ်ပကောံ နဒဒှ်ကောန်ပၞာန်တၟိမ္ဂး ဒးအာတိုန်မံၚ်ဘာပၞာန်သ္ဇိုၚ် ပ္ဍဲကဵုဘာဗကတ်ဗကေၚ် ကွတ်ပၞာန်စၟတ်(၉) ဍုၚ်သဓီု ကေုာံ ဘာဗကတ်ဗကေၚ် ဘာပၞာန်တန်သၠုၚ် စၟတ်(၄) ပ္ဍဲကဵုဇြပ်ဗု မဒှ်ရ။
ပရိုၚ်-သြၚ်လောန်တိုၚ်မ်
Photo – CJ