မတ်မလီု ၊ နိုဝမ်ပါ ၁၄
ညးပန်လဝ်သေနာတ် လ္တူဍုၚ်မတ်မလီုဂှ် ကဝ်မယှေန်ပၞာန်ဗက်ဂၠာဲမံၚ်စေအ်အ်ကီုလေဝ် ရပ်ဟွံဂွံမာန်ဏီ ဒှ်မံၚ်ရောၚ် ညးကြပ်ကဵုကဝ်မယှေန်ပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ်နိုဝင်ပါ ၉ ၜိုတ်အခိၚ်ဗ္တံ ၁၁ နာဍဳ လ္တူဍုၚ်မတ်မလီု အရာပ်မျေနဳကုၚ် ပ္ဍဲဂတမုက်ဆေၚ်ကျိုၚ်ကျောဝ် “မျေင်တူလာန်” ညးတြုံ LGBT ၃ တၠတံဂှ် မၞိဟ်ရပ်သေနာတ် ၂ တၠ ကၠုၚ်ပန်ဂစိုတ်လဝ် မဒှ်ရ။
ပ္ဍဲကဵုပရေၚ်ပန်ဂစိုတ်ဏံ ညးတြုံ LGBT တေန်ကိုကိုဥူ ကဵု မနဳ (ကော်) မာမက်အာယောန်တံ မွဲအခိၚ်ဓဝ် ချိုတ်အာဒၞာဲဂှ်တုဲ ရဲဍေံ ဇဲဝေယာန်ထက်မွဲတၠ ဒးအာဝပ်ဇၞော်ကဵုဇြဟတ်ရ။
ပရေၚ်ပန်ဂစိုတ်ဏံက္တဵုဒှ်အာဗက်ဟွံဂတာပ် ကဝ်မယှေန်ပၞာန် မွဲအခိၚ်ဓဝ်သၠုၚ်ပတိုန်အသိၚ်ပရေၚ်ဂီုကၠီု ဗက်မာတ်ဆိုအ်မံၚ် ဇၟာပ်ပ်ဒၞာဲဆက်က်ကီုလေဝ် စနူတ္ၚဲပန်ဂစိုတ်တေံ လအ်ပွိုၚ် ၅ တ္ၚဲ စိုပ်နိုဝမ်ပါ ၁၃ ကီုလေဝ် မၞိဟ်တၠတဲပန်ဂစိုတ်လဝ်တံဂှ် ရပ်ဂွံဟွံမာန်ဏီရ။
လ္တူဍုၚ်မတ်မလီု ဗွဲတၟေၚ် အကြာပတေၚ်စွံလဝ် ပရေၚ်ဂီုကၠီုသၠုၚ်လဝ်အသိၚ် အိုတ်စောန်ကီုလေဝ် ပရေၚ်ပန်ဂစိုတ်လဝ်မၞိဟ်ဏံ ရပ်ဂွံဟွံမာန်ဟီုဂှ် ညးဒေသလ္တူဍုၚ်မတ်မလီုမွဲတၠ လ္တူကဝ်မယှေန်ပၞာန် ပတိတ်လဝ် တၚ်သၟာန်နွံရ။
“ပရေၚ်ပန်ဂစိုတ်ဏံ ရပ်ဂွံဟွံမာန်ဏီပုဟ်ဂှ်တှ်ေ ဆေၚ်စပ်ကဵုပရေၚ်ပန်လဝ်ဏံ စကာလဝ်မကမ် 9mm ။ လပါ်ဍေံတံ ပျူသဝ်ထဳတံ ညးကေတ်လဝ်ဂီုကၠီုတံလေဝ် ရပ်လဝ်လွဟ 9mm နွံဗွဲမဂၠိုၚ်။ လၟုဟ်ဍေံတံ ဗက်ဂၠာဲမံၚ်စေအ်အ်ဖိုအ်။ အကြာပတေၚ်လဝ်ပရေၚ်ဂီုကၠီုဏံ CCTV ကေန်မရာလေဝ် နွံမံၚ်ပေၚ်ထာတ်ကီုဏောၚ်” သာ်ဝွံ သ္ဂးရ။
ပရေၚ်ပန်ဂစိုတ် ပ္ဍဲအရာပ်လ္တူဍုၚ်ဇၞော် က္တဵုဒှ်အာတုဲ ရပ်တၠတဲ ဟွံဂွံဏီဟီုမ္ဂး သွက်ညးဒေသတံလေဝ် ဂီုကၠီုဟၟဲဒှ်မံၚ်တုဲ ပရေၚ်ရပ်လွဟ်လ္တူဍုၚ်နွံဂၠိုၚ်တိုန်မံၚ်ဂှ် ဗီုဗီုပရေၚ်လၟုဟ်ဏံ ဂွိၚ်ဖေက်ထပ်ဒှ်အာပၠန် ဒှ်တိုန်ဒွိၚ်အိုတ်ရဂှ် ညးဆက်ဟီုရ။
မွဲလပါ်ပၠန် ရဲသၟဝ်တဲကဝ်မယှေန်ပၞာန်တံဂှ်တှ်ေ ပတေၚ်လဝ်ပရေၚ်ဂီုကၠီုတုဲ ဗက်မာတ်ဆိုအ်လဝ် ပ္ဍဲကဵုပၞော်လုပ်တိတ်ဍုၚ်ကီု၊ အပ္ဍဲဍုၚ် ဒၞာဲဟွံထေၚ်ခယျတံဒၞာဲမၞိဟ်အာကၠုၚ်ဂၠိုၚ်တံ ကရေပ်ဓရတ်စၟဳစၟတ်မံၚ်ဖိုအ်ရ။
ပ္ဍဲကဵုလ္တူဍုၚ်မတ်မလီု ဒၞာဲကဝ်မယှေန်ပၞာန် ထိၚ်ဂွံလဝ်ပေၚ်ၚ် ရပ်လွဟ်တုဲ ပရေၚ်ပန်ဂစိုတ် ဒှ်လဝ်ကီုလေဝ် ရပ်တၠတဲဟွံဂွံဏီတုဲ အကြာညးဒေသတံ ပရေၚ်ပါ်ပါဲ ဒှ်မံၚ်ရ။
ကဝ်မယှေန်ပၞာန်တံဂှ် အရိုဟ်ဟ်တ္ၚဲ ဂေတ်ဂေၚ်ထ္ၜးစဇြဟတ်၊ မာတ်ဆိုအ်ဗက်ဂၠာဲ၊ နူကဵု CCTV ဂဇအ်စွံလဝ်တံ မၚ်ရံၚ်မံၚ်ကီုလေဝ် လ္တူဍုၚ်မတ်မလီုဂှ် ပရေၚ်ကၠတ်ဂၠံက်၊ ပၠံၚ်ၜး၊ ဂစိုတ်မၞိဟ်သၟးဟွံက ပရေၚ်ဒုဒရိုဟ်တၞဟ်ဟ်တံလေဝ် မွဲဏှမွဲဏှဒှ်မံၚ်ရ။
ပရိုၚ်-သြၚ်လောန်တိုၚ်မ်
Photo – Social Media