မတ်မလီု ၊ နိုဝင်ဘာ ၁၄
ပ္ဍဲကာလဒစးဒုၚ်ပေါဲရုဲမာဲဏံ ပ္ဍဲကဵုတွဵုးရးမန်ဂှ် ဒပ်ပၞာန်ဗမာသွက်ဂွံထပက်ပၞာန် ဒှ်ကၠုၚ်မာန် လၟိဟ်ညးဒဴပၞာန်တံလေဝ် ပဵုဂၠိုၚ်တိုန်မာန်ဂှ်ရ သွက်ဂွံကဵုအာအရီုဗၚ်ပရေၚ်ဗ္စာရဏာမၞိဟ်မာန် ကံၚ်သဳမန်ၜါဂကောံ ကော်ဘိက်ဏာ အာသဳယာန်ကဵုဍုၚ်ဂၠးကဝ်တံရ။
စပ်ကဵုပရေၚ် သွက်ဂွံပံၚ်တောဲရေၚ်တၠုၚ်အာ ကမၠောန်ထံက်ပၚ်ပရေၚ်ဗ္စာရဏာမၞိဟ်တံမာန်တုဲ ပ္ဍဲကဵုနဝ်ဝမ်ပါ ၁၂ ဂှ် ကံၚ်သဳဖိတ်ဒရေဝ်ဍုၚ်မန် MSFC ကဵု ကံၚ်သဳဒုၚ်ကဵုကသပ်ဍုၚ်မန် MSCC တံ ပံၚ်တောဲပတိတ်လဝ် လိက်လလောၚ်တြးရ။
စနူကဵုသၞာံ ၂၀၂၁ အခိၚ်သီလဝ်အဝဵုတေံတုဲ ဟိုတ်နူကဵုဒပ်ပၞာန် စွံပွန်ကု ညးဒေသတွဵုရးမန်တံဝွံ ပရေၚ်ဟွံညိၚ်ဝပ်၊ ပွမ ပကီုပရာတ် နာနာကဵု ပရူပရာ ဒးထောံသ္ၚိဌာန် ဂြိပ်ဒဴလဝ်တံ ဒးဆဵုဂဗကၠုၚ် ပရေၚ်ဘဲပၞာန်ဂှ် လၟိဟ်ကဵုလ္ၚီ နွံမံၚ်ရောၚ်။
ဟိုတ်ဂှ်ရ သွက်ဂွံကဵုအာထံက်ပၚ် ပရေၚ်ဗ္စာရဏာမၞိဟ်တံ ဗွဲမစိုပ်တရဴမာန် ဗွဲတၟေၚ် နူကဵုဂကောံ ပရေၚ်ဗ္စာရဏာမၞိဟ်၊ ဂကောံမှာဇန်ဒုၚ်သ္ဇိုၚ်ကွာန် နူကဵုဒေသ အာသဳယာန်တံကေုာံ သီုကဵု ပရေၚ်ပံၚ်တောဲပါလုပ် ဍုၚ်ဂၠးကဝ်တံကီု ကံၚ်သဳမန်ၜါ ကော်ဘိက်ဏာ မဒှ်ရ။
ပြဟ်ဟ်ဏံ သွက်ပေါဲရုဲမာဲအလီ ကဝ်မယှေန်ပၞာန်ရန်တၟံလဝ် ဆက်ကၠောန်အာပေါဲဗတိုက် ပ္ဍဲကဵုပွိုၚ်ဍုၚ် နွံမံၚ်တွဵုရးမန်တံမာန်တုဲ ခြာဟွံလံဂိတုဂတတေံမ္ဂး ကိစ္စရဲသ္ၚိဌာန်ဟၟဲတံ ပရေၚ်ကာမံက်တိုန် ဘိုအ်ဂွံထပ်ဒှ်ကၠုၚ်မာန် အကာဲအရာတံစၞောန်ပ္ညုၚ်ထ္ၜးမံၚ် သ္ဂးရ။
ကၠာပေါဲရုဲမာဲဟွံဒှ် ပ္ဍဲကဵုသ္ကုတ်ဒေသမန်သၠုၚ်ကျာကဵု သၟဝ်ကျာဒပ်ပၞာန်ထပက်ပၞာန်မာန်တုဲ ညးဒဴပၞာန် လၟိဟ်ကြပ်ကဵုဠက် ပဵုတိုန်ကၠုၚ်မာန်ရောၚ် ညးနွံအခေါၚ်ကံၚ်သဳဖိတ်ဒရေဝ်ဍုၚ်မန် MSFC နာဲမန်သာင် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပြဟ်ဟ်ဏံ ကၠာဟွံစိုပ်ပေါဲရုဲမာဲတေံ ပရေၚ်ထပက်ပၞာန် ပ္ဍဲကဵုသဓီု၊ ၜဳလေၚ်၊ ကျာ်မြဟ်၊ ဇြပ်ဗု၊ လပါ်ရေဝ်တံ ဘိုအ်ဂွံဒှ်ကၠုၚ်မာန် နွံမံၚ်။ ပ္ဍဲဏံ ညးဍုၚ်ကွာန်ကောန်အရာပ်တံ ဒးဘဲမာန်။ ပ္ဍဲကဵုစရၚ်ပြဟ်ဟ်ဏံဂှ် ရဲဒဴပၞာန်အောန်မံၚ်ဏီ။ အပံၚ်ဖအိုတ် ၂၀၀၀၀ ပြၚ်နွံမၚ်။ ပရေၚ်ထပက်ပၞာန်ဇြဟတ်ဇၞော်ဇၞော် မွဲအလန်ဓဝ်ကၠောန်ကၠုၚ်မ္ဂး ဒဵုကဵု ၅၀၀၀၀ ပဵုကၠုၚ်မာန်” သာ်ဝွံ သ္ဂးရ။
အပ္ဍဲကဵုတွဵုရးမန် ၁၀ ပွိုၚ်ဍုၚ်နွံမံၚ်ကီုလေဝ် ပြဟ်ဟ်ဏံ ပ္ဍဲကဵု ၇ ပွိုၚ်ဍုၚ်ဂှ် ဟိုတ်နူကဵုအကာဲအရာပေါဲဗတိုက် ပလီုပလိုက် ကြီုဓဇန် ဘဲဂစိုတ် လ္တူညးဍုၚ်ကွာန်ဒုဟ်ဒဏ်ဟၟဲတံ ဒှ်ကၠုၚ်မာန်တုဲ နူကဵုကံၚ်သဳမန်ၜါဂကောံ ဖျေံကၠုၚ်အစဳဇန် မဒှ်ရ။
ဟိုတ်ဂှ်က ကံၚ်သဳဖိတ်ဒရေဝ်ဍုၚ်မန် MSFC ကဵု ကံၚ်သဳဒုၚ်ကဵုကသပ်ဍုၚ်မန် MSCC တံကၠောန်ဗ္ဒျ်ကောံဓရီု ကာမံက်တိုန် ပ္ဍဲကဵုနဝ်ဝမ်ပါ ၁၁ ဂှ် သၞောတ်ပံၚ်တောဲရီုဗၚ်အာတံ သွက်ဂွံထပေၚ်ကဵုဇြဟတ် တုပ်လဝ်စိုတ်ရ။
အတိုၚ်ပရေၚ်ပံၚ်တောဲရီုဗၚ်မ္ဂး သွက်ဂွံစၟဳစၟတ်ကံက်အာစရၚ်တၚ်နၚ် ညးဍုၚ်ကွာန်ဒဴဘဲပၞာန်တံတုဲ ကၟိန်သ္ၚိဌာန်တၠဒဒိုက်တံ ညံၚ်ဂွံပြံၚ်ပဆုဲကဵုဒၞာဲမာန် သွက်ဂွံကဵုအာအရီုဗၚ် မဒှ်ရ။
တုဲပၠန် သွက်ဂွံထံက်ပၚ်ကဵုအာ စၞစ၊ ဒၞာဲဒၟံၚ်ယာယဳကဵု အထံက်ပၚ်ပရေၚ်ထတ်ယုက်တံဂှ် ပါ်ပရအ်ကဵုအာ သၞောတ်စှ်ေစှ်ေတုဲ ပံၚ်တောဲအာကဵုဇာဖိုၚ်ပရေၚ်မၞိဟ်ကွာန်ဒေသတံ ထမံက်ရုပ်ရဴကၠောန်အာ ယန္တရာပရေၚ်ရီုဗၚ်ထံက်ပၚ်တံရောၚ် သ္ဂးရ။
လ္တူပရေၚ်ကမၠောန်တံ ဒုၚ်သ္ဇိုၚ်ကဵုစိုတ်ဓါတ်မနုဿမၞိဟ်၊ မံၚ်အကြာ၊ ဟွံဗက်မုက်၊ ဒုၚ်လျိုၚ်၊ ပရေၚ်အာက္ဍိုပ် ညးဒေသတံတုဲ ပရေၚ်အရီုဗၚ်တံပၠန် သ္ပလဝ်တိုၚ်ခဳဗဟဵုညးဍုၚ်ကွာန်၊ အရာကၠးမး၊ ပရေၚ်ပါ်ခြာဟၟဲ စဳဇန်အာရောၚ် ကဵုလဝ်သမ္တီရ။
နူကဵုဒေသပယျဵု ပရေၚ်ဂွံအထံက်ပၚ် နူဍုၚ်ဂၠးကဝ်တံ အောန်စှ်ေအာတုဲ သွက်ဂွံကဵုအာအရီုဗၚ် ကမၠောန်ထံက်ပၚ် ပရေၚ်ဗ္စာရဏာမၞိဟ် ပ္ဍဲကဵုဒေသပဋိပက္ခဒှ်မံၚ်တံဂှ် အာတ်မိက်ကု အာသဳယာန် AHA center ရောၚ် နာဲမန်သာၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပရေၚ်အရီုဗၚ်ဂၠးကဝ် တတ်ပယျဵုတုဲ လုပ်ကၠုၚ်မံၚ်ဂွံဆဵု၊ ဆဂး ပရေၚ်အရီုဗၚ် ဂၠးကဝ်အောန်စှ်ေမံၚ်။ ဟွံဂွံ ASEAN AHA center ပုဟ်။ ဟိုတ်ဂှ်ရ ပ္ဍဲကဵုဒေသပဋိပက္ခတံ သွက်ဂွံကဵုပရေၚ်ရီုဗၚ်ထံက်ပၚ် မိက်ဂွံအာတ်မိက်ဏာ” သာ်ဝွံ သ္ဂးရ။
အရီုဗၚ်ထံက်ပၚ်ပရေၚ်ဗ္စာရဏာမၞိဟ်တံ ညံၚ်ဂွံစိုပ်အာ ဇရေၚ်ညးဒးဒုၚ်စလဝ်တံမာန် သွက်ဂွံချိက်ကၠောန်အာ တိုက်ရိုက်ကု ဂကောံအာသဳယာန်၊ ဂကောံဂၠးကဝ်တံတုဲ နူကဵုဂကောံဇြဟတ်ပၠန်ဂတးတိဍာ်ဇကုတံ ထိၚ်လဝ်တံမွဲအဆံၚ် သွက်ဂွံကဵုအာအရီုဗၚ်ကၠောန်အာရောၚ် ကဵုလဝ်သမ္တီရ။
နကဵု ကံၚ်သဳမန်ၜါဂကောံဝွံ ပ္ဍဲတွဵုရးမန် သွက်ညးဍုၚ်ကွာန် ဒးဒုၚ်လဝ်ဟိုတ်နူပဋိပက္ခတံဂှ် သွက်ပရေၚ်ဂီုကၠီုလမျီု၊ ဗၠးဘဲအန္တရာဲ ကေုာံ ပရေၚ်ဗ္စာရဏာမၞိဟ်တံဂှ် သွက်ဂွံပံၚ်တောဲရီုဗၚ်ထံက်ပၚ်အာမွဲစွံ သ္ပလဝ်ကတိရောၚ် သ္ပဒတန်လလောၚ်တြးပတိတ်လဝ်ရ။
ပရိုၚ်-သြၚ်လောန်တိုၚ်မ်
Photo -CJ